119
Det lowa blanga YAWEI det trubala God
YAWEI, ol detlot pipul hu jidan raitwei langa yu garra jidan gudbinji,
en ol detlot pipul hu oldei bulurrumbat detlot lowa blanga yu garra jidan gudbinji du.
Ol detlot pipul hu dum wanim yu tok jidan gudbinjiwei,
en olabat teiknodis en duwit brabliwei langa yu brom insaid langa olabat hat.
Olabat neba dum ola rong ting, najing.
Olabat oni bulurrumbat det wei blanga yu, YAWEI.
YAWEI, yubin gibit melabat ola lowa,
en yubin dalim melabat blanga teiknodis langa olabat trubalawei.
Ai wandim bulurrum ol detlot lowa blanga yu trubalawei.
Wen mi teiknodis langa detlot lowa blanga yu ai kaan dum eni nogudbala ting blanga meigim mi fil sheim.
Wen mi len ola raitwei en ola trubalawan lowa blanga yu, ai garra preisim yu garram main klinwan hat brabli trubalawei.
Ai garra teiknodis langa ola lowa blanga yu.
YAWEI, yu jidan garram mi en nomo libum mi.
Duwit langa ol detlot lowa blanga YAWEI
Hau ola yang pipul gin abum brabli gudwan laif?
Olabat garra abum det gudwan laif if dei teiknodis en duwit langa detlot lowa blanga yu, YAWEI.
10 Mi oldei wandim wek blanga yu garram holbit main filing.
Yu meigim mi strongbalawan blanga kipgon teiknodisbat langa ol yu lowa.
11 Detlot lowa blanga yu jidan langa main hat,
wulijim ai kaan dum eni nogudbala ting langa yu.
12 Mi preisim yu YAWEI!
Yu lenim mi blanga det wei blanga yu.
13 Ai garra toktok adbalawei blanga ola lowa weya yubin gibit langa melabat.
14 YAWEI, mi brabli gudbinji wen mi teiknodis langa det lowa blanga yu.
Im mobeda blanga abum bigmob ebrijing.
15 Mi jinggabat detlot wed blanga yu olataim,
en mi bulurrum det wei blanga yu.
16 Mi oldei laigim detlot lowa blanga yu brabliwei.
Ai kaan neba fogedabat olabat.
Jidan gudbinji langa detlot lowa blanga YAWEI
17 YAWEI yu gud langa mi, yu wekinmen,
wulijim ai garra jidan laibala blanga teiknodis en duwit langa yu wed.
18 Yu opinim main ai wulijim ai garra luk en sabi ola brabli gudwan wed blanga yu lowa.
19 Mi jidan iya langa dijan kantri nomo blanga longtaim.
Yu shoum mi detlot lowa blanga yu, YAWEI,
en nomo blandim olabat brom mi.
20 Oldei main hat wandim sabi brabliwei blanga detlot lowa blanga yu.
21 Yu streitinimap brabliwei ola praudbala pipul hu nomo teiknodis langa detlot lowa blanga yu.
22 Nomo larram olabat tisimbat en mokimbat mi dumaji mi oldei bulurrumbat yu lowa.
23 Ola boswan oldei majurrumap miselp blanga tok gija blanga dum nogud ting langa mi.
Olabat tok gija blanga wanim olabat garra dum langa mi,
bat ai garra kipgon jinggabat detlot lowa blanga yu.
24 Ol yu lowa meigim mi gudbinji.
Olabat titjimbat mi raitwei.
Preya blanga wandimbat brabliwei blanga teiknodis en duwit langa det lowa blanga YAWEI
25 Mi gulijap dai na.
YAWEI meigim mi strongbala igin jis laik yubin pramis.
26 YAWEI aibin dalim yu blanga ebrijing weya aibin dum en yubin ensim mi.
Yu lenim mi blanga det wei blanga yu.
27 YAWEI, album mi blanga sabi detlot lowa blanga yu,
en ai garra oldei jinggabat ola brabli gudwan ting weya yu oldei dumbat.
28 Mi jidan brabli nogudbinjiwei.
Yu meigim mi strongbala laik yubin pramis, YAWEI.
29 Nomo larram mi go langa det rongwei. Dumaji yu kainbalawan YAWEI, lenim mi blanga yu lowa.
30 Ai wandi duwit en teiknodis langa ola lowa blanga yu.
31 YAWEI, aibin kipgon bulurrumbat ola lowa blanga yu.
Nomo larram enijing meigim mi sheim.
32 Mi wandim blanga len brabliwei ebrijing weya yu wandim mi blanga dum,
dumaji ebridei yu na garra meigim mi sabi mowa en mowa.
Preya blanga sabi mowa
33 YAWEI, yu lenim mi wanim detlot lowa blanga yu min,
wulijim ai garra oldei teiknodis langa olabat.
34 YAWEI, yu album mi blanga sabi ol yu lowa, en ai garra teiknodis en bulurrum olabat brabliwei garram main laif holbit.
35 Meigim mi duwit langa detlot lowa blanga yu olataim,
dumaji dei meigim mi brabli gudbinji.
36 YAWEI, meigim mi wandi kipgon duwit langa yu lowa brabliwei,
mowa den blanga meigim miselp ritjwan garram ebrijing.
37 YAWEI, meigim mi nomo wandi teiknodis langa ola nogudwan ting.
Yu jidan gudbala langa mi, jis laik yubin pramis.
38 YAWEI, yu kipum yu pramis langa mi, yu wekinmen,
det pramis weya yubin meigim langa ola pipul hu oldei duwit langa yu.
39 YAWEI, seibum mi brom ol detlot hu mokimbat mi,
dumaji ol yu lowa brabli gudwan.
40 Mi wandi duwit langa detlot lowa blanga yu.
YAWEI, meigim mi jidan gudbalawei igin,
dumaji yu det brabli trubalawan.
Trastim det lowa blanga YAWEI
41 YAWEI, shoum mi haumatj yu laigim mi.
Yu seibum mi jis laik weya yubin pramis.
42 En ai garra ensim ol detlot pipul hu gibit mi adtaim dumaji mi trastimbat yu wed.
43 Album mi tok trubalawei olataim,
dumaji mi oldei trastim detlot lowa blanga yu.
44 Olagijawan na ai garra kipgon bulurrumbat langa yu lowa.
45 Ai garra jidan friwan brabliwei dumaji aibin bulurrumbat yu wed.
46 Ai garra dalim ola bigwan bos detlot lowa blanga yu,
en ai kaan sheim blanga tharran.
47 Brabliwei mi laigim dumbat wanim yu dalimbat mi,
en tharran na meigim mi jidan gudbinjiwei.
48 YAWEI, mi laigim en rispek ol yu lowa.
Olataim ai garra jinggabat detlot lowa blanga yu.
Det lowa blanga YAWEI im gudbala
49 YAWEI, yu jinggabat det pramis yubin meigim garram mi, yu wekinmen.
Im meigim mi wandi kipgon olawei.
50 Aibin abum trabul bat stil aibin jidan gudbinjiwei,
dumaji det pramis blanga yu gibit mi laif.
51 Ola praudbala pipul oldei tok nogudbalawei langa mi,
bat ai nomo bin libum detlot lowa blanga yu.
52 Mi jinggabat detlot lowa blanga yu brom longtaim,
en dei meigim mi brabli gudbinji.
53 Wen mi luk ola brabli nogudbala pipul hu nomo teiknodis langa ol yu lowa,
tharran meigim mi gitwail brabliwei.
54 Mi meigim ola song blanga ol yu lowa,
nomeda wujei mi jidan.
55 YAWEI, wen im naitaim mi jinggabat langa yu en blanga yu lowa.
56 Mi jidanabat brabli gudbinjiwei dumaji mi oldei teiknodis langa yu wed.
Det strongbala filing blanga detlot lowa blanga YAWEI
57 YAWEI oni yu na wanbala mi wandim.
Mi pramis blanga lisin en duwit langa ol detlot lowa blanga yu.
58 Mi askim yu brabliwei brom insaid langa main hat blanga sori langa mi jis laik weya yubin pramis.
59 Aibin jinggabat blanga ola ting weya aibin dumbat,
en mi pramis blanga bulurrumbat yu wei.
60 Wen yu tok, streidawei mi dum wanim yu wandim.
61 Detlot brabli nogudbala pipul bin pudum trep blanga mi,
bat ai nomo bin fogedabat yu lowa.
62 Mi gidap midulnait blanga preisim yu,
dumaji wen yu jadjimbat pipul, yu gibit olabat feyago.
63 Mi jidan fren blanga ol detlot pipul hu bulurrum yu,
en teiknodis langa detlot lowa blanga yu.
64 YAWEI, yu garram det filing blanga oldei laigim pipul langa ola kantri.
Yu titjimbat mi blanga ol detlot lowa blanga yu.
Blanga yu lowa im brabli gudbala
65 Yubin kipum yu pramis YAWEI,
en yu jidan brabli gud langa mi, yu wekinmen.
66 Meigim mi sabi ebrijing gudwei, dumaji mi trastim detlot wed blanga yu.
67 Basdam aibin oldei dum rong ting,
bat yubin streitinimap mi en tudei mi teiknodis langa yu wed na.
68 Yu brabli gudwan YAWEI en yu brabli kainbalawan du.
Yu lenim mi detlot lowa blanga yu.
69 Ola praudbala pipul bin dalimbat ola laiyawan stori blanga mi,
bat mi teiknodis langa detlot lowa blanga yu brabliwei brom insaid langa main hat.
70 Detlot pipul nomo sabi enijing,
bat mi oldei gudbinji langa ol yu lowa.
71 Wen yubin streitinimap mi blanga main nogudbalawei,
tharran na bin brabli gud ting blanga mi.
Imbin meigim mi len ola lowa blanga yu.
72 Bigmob mani langa dijan wel nomo enijing langa mi.
Oni detlot lowa blanga yu na jidan nambawan langa main laif.
Det lowa blanga YAWEI im gibit pipul feyago
73 YAWEI, yubin meigim mi en yu oldei kipum mi seifwan.
Meigim mi sabi brabliwei wulijim ai garra len detlot lowa blanga yu.
74 Ol detlot pipul hu rispek yu garra gudbinji wen olabat garra luk langa mi,
dumaji mi trastimbat langa yu wed.
75 Ai sabi ol yu lowa nomo garram enijing rong en im brabli trubalawan, YAWEI.
Yubin panishim mi brabliwei dumaji yu brabli trubalawan.
76 Larram yu ron filing blanga laigimbat, meigim mi gudbinji, jis laik yubin pramisim mi, det wekinmen blanga yu.
77 Yu sori langa mi en larram mi jidan laibala,
dumaji mi laigim teiknodis langa detlot lowa blanga yu brabliwei.
78 Larram detlot praudbala pipul sheim miselp dumaji olabat oldei dalimbat laiya stori blanga mi,
bat mi, ai garra duwit langa wanim yu titjimbat mi.
79 Larram ol detlot pipul hu rispek yu kaman langa mi blanga sabi ol yu lowa.
80 Meigim mi teiknodis langa ol yu lowa brabliwei wulijim ai kaan sheim blanga dum enijing.
Preya blanga seibum
81 YAWEI, mi brabli wikwan na brom weidabat blanga wotaim yu garra seibum mi,
bat mi trastimbat oni langa yu wed.
82 Mi nokap brom weidabat blanga wanim yubin pramisim.
Mi askim yu, “Wotaim yu garra album mi?”
83 Mi brabli olwan en kaan wek enimo, jis laiga olwan letha but weya nobodi kaan yusum enimo,
bat stil ai nomo bin fogedabat detlot lowa blanga yu.
84 Haulong ai garra weidabat?
Wotaim yu garra panishim ol detlot pipul hu oldei dumbat nogudbala ting langa mi?
85 Detlot praudbala pipul hu nomo teiknodis langa yu lowa bin grajim dipwan hol blanga trepam mi.
86 Detlot lowa blanga yu, olabat trubalawan.
Ola pipul gibitbat mi adtaim garram ola laiyawan stori.
Yu album mi, YAWEI.
87 Olabat bin gulijap kilim mi ded,
bat ai nomo bin fogedabat detlot lowa blanga yu.
88 YAWEI, dumaji yu kipgon laigimbat pipul detmatj,
wal yu nomo larram mi dai wulijim ai garra teiknodis langa ol yu lowa.
Bilib langa ol detlot lowa blanga YAWEI
89 YAWEI, blanga yu wed garra jidan olagijawan.
Im olagijawan deya langa hebin.
90 Det trubalawei blanga yu im kipgon olagijawan.
Yubin meigim dijan wel blanga jidan langa im raitwan pleis,
en im jidan lagijat olagijawan.
91 YAWEI, garram yu ronwan wed yubin meigim ebrijing
en olabat jidan tudei, en ebrijing na wek laik yubin tok.
92 If ai nomo bina abum detlot lowa blanga yu blanga meigim mi gudbinji,
ai bina dai brom main trabul.
93 Ai nomo wandi libum detlot wed weya yubin titjimbat mi,
dumaji olabat meigim mi jidan gudbalawei.
94 Mi blanga yu YAWEI.
Yu seibum mi, dumaji mi oldei teiknodis langa ol yu lowa.
95 Ola brabli nogudbala pipul weidabat blanga kilim mi ded,
bat ai garra kipgon jinggabat ol yu wed.
96 Ai sabi ebrijing weya jidan tudei garra binij,
bat yu lowa im jidan brabli trubalawan en kaan neba binij.
Yu garra laigim ol detlot lowa blanga YAWEI brabliwei
97 Trubala mi laigim detlot lowa blanga yu brabliwei.
Mi oldei jinggabat detlot lowa blanga yu.
98 Dumaji ai garram yu lowa blanga shoum mi wanim blanga dum,
im meigim mi sabi brabliwei, mowa den main enami olabat.
Dei nomo sabi enijing.
99 YAWEI, ai sabi mowa den main titja olabat,
dumaji mi jinggabat wanim yu oldei titjimbat mi.
100 Mi sabi mowa den detlot ol pipul,
dumaji mi oldei duwit langa detlot lowa blanga yu.
101 Ai nomo bulurrum det nogudbalawei,
dumaji ai wandi duwit langa yu wed.
102 Ai nomo bin libum detlot lowa blanga yu dumaji yu na main titja.
103 Detlot shugabeig, olabat switwan,
bat detlot lowa blanga yu, olabat brabli switwan.
104 Detlot lowa blanga yu meigim mi sabi blanga ebrijing.
Blanga tharran na mi nomo laigim ola nogudbalawei.
Ol detlot lowa blanga YAWEI jis laiga lait
105 YAWEI, yu wed im shain laiga lait blanga shoum mi det wei blanga go,
en im laik det lait weya im totjim main roud.
106 Ai garra kipum main pramis langa yu blanga teiknodis langa detlot trubalawan lowa blanga yu.
107 Mi ardimbat brabliwei brom main enami olabat.
YAWEI, yu nomo larram mi dai, jis laik yubin pramis.
108 YAWEI, irrim main preya weya mi tok theingkyu langa yu,
en lenim mi ol detlot lowa blanga yu.
109 Mi oldei jidan redi blanga go thru langa trabul nomeda wanim hepin langa main laif. Ai nomo fogedabat ol yu lowa.
110 Ola brabli nogudbala pipul meigim trep blanga mi,
bat mi oldei teiknodis langa detlot lowa blanga yu.
111 Detlot lowa blanga yu garra jidan olagijawan garram mi,
jis laik mi kipumbat main ronwan ebrijing,
en dei oldei meigim mi jidan brabli gudbinji.
112 Aibin jinggabat blanga kipgon bulurrumbat detlot lowa blanga yu raidap mi dai.
Bulurrum ol detlot lowa blanga YAWEI en jidan seifwan
113 Ai nomo laigim detlot tufeis pipul hu nomo jidan trubalawei langa yu,
bat mi, ai laigim ol yu lowa.
114 Yu na tharran hu oldei maindimbat mi en kipumbat mi seifwan.
Ai trastimbat yu wed.
115 Yumob nogudbala pipul, yumob gowei brom mi.
Ai garra teiknodis oni langa detlot lowa blanga main God.
116 Meigim mi strongbala jis laik yubin pramisim mi,
en ai garra jidan laibala.
Nomo larram mi jidan nogudbinji wen mi weidabat blanga yu blanga seibum mi.
117 Holdim mi en ai garra jidan seifwan,
en ai garra teiknodis langa detlot lowa blanga yu olataim.
118 Yu gibit bekboun langa detlot pipul hu nomo duwit langa detlot lowa blanga yu.
Ola nogudbalawei blanga olabat nomo enijing.
119 YAWEI, langa yu, ola nogudbala pipul jidan jis laik rabish. Blanga tharran na, ai laigim bulurrumbat ol yu lowa.
120 YAWEI, mi bradin langa yu en mi sheiksheik nomo lilbit dumaji yu det brabli haibalawan God en ai sabi hau yu jadjim pipul.
Duwit langa ol detlot lowa blanga YAWEI
121 Aibin dum wanim im rait en gudwan blanga dum.
Nomo libum mi langa main enami olabat.
122 Yu pramis blanga album mi, yu wekinmen.
Nomo larram detlot praudbala pipul dum krulwan ting langa mi.
123 Main ai dubala taid na brom lukinatbat wotaim yu garra seibum mi en meigim mi fri weya yubin pramisim mi.
124 Yu shoum mi yu kipgon laigimbat mi, yu wekinmen,
en yu titjim mi ol yu lowa.
125 Mi wek blanga yu, YAWEI.
Meigim mi sabi brabliwei wanim yu titjimbat mi.
126 YAWEI, im taim blanga yu blanga kaman en panishim ola pipul na,
dumaji olabat nomo duwit langa detlot lowa blanga yu.
127 Trubala mi laigim brabliwei detlot lowa blanga yu.
Olabat mowa gudwan den ola gudwan golwan ston.
128 Blanga tharran na ai bulurrum ol detlot lowa blanga yu.
Ai nomo laigim ola nogudbalawei.
Wandimbat blanga duwit ola lowa blanga YAWEI
129 Ol yu lowa brabli gudwan.
Mi teiknodis langa detlot lowa blanga yu brom insaid langa main hat.
130 YAWEI, yu wed im shoum pipul wanim blanga dum jis laiga lait langa dakbala pleis.
Im meigim pipul sabi ebrijing brabliwei.
131 Mi oldei wandim ol yu lowa olataim.
Brabliwei na mi wandim olabat jis laik wen mi brabli thestibala blanga woda.
132 YAWEI, yu kaman en sori langa mi,
seimwei laik yu oldei dum langa ol detlot pipul hu laigim yu.
133 Garram yu wed, yu album mi blanga wok langa yu wei,
en nomo larram eni nogudbalawei jidan bos langa mi.
134 Yu seibum mi brom ol detlot pipul hu oldei dum nogudbala ting langa mi,
wulijim ai garra teiknodis en duwit langa detlot lowa blanga yu.
135 Yu jidan gudbala langa mi YAWEI,
en lenim mi blanga ol yu lowa.
136 Wen mi krai main tiyas randan jis laik weya riba randan,
dumaji ola pipul nomo teiknodis langa ol yu lowa.
Ol detlot lowa blanga YAWEI gibit pipul feyago
137 YAWEI, yu dum ebrijing raitwei,
en ol yu lowa olabat gibit pipul feyago.
138 Detlot lowa weya yubin gibit,
olabat gibit feyago raitwei.
139 Mi gitwail brabliwei laiga faiya weya im barn,
dumaji main bedfren olabat nomo teiknodis langa ol yu lowa.
140 Blanga yu pramis im tok trubalawan.
Mi laigim det pramis brabliwei.
141 Mi nomo jidan haibala.
Mi nomo enijing, en nobodi laigim mi,
bat ai nomo fogedabat wanim yu titjimbat mi.
142 Det trubalawei blanga yu garra jidan olagijawan na.
Yu lowa im oldei trubalawan.
143 Mi jidan garram loda trabul en mi jidan nogudbinjiwei,
bat detlot lowa blanga yu meigim mi jidan brabli gudbinji.
144 Detlot lowa blanga yu gibit feyago olataim.
Meigim mi sabi olabat, en ai garra jidan laibala.
Preya blanga seibum
145 Mi jingat langa yu garram ol main hat.
YAWEI, ensim mi en ai garra duwit langa detlot lowa blanga yu.
146 Mi jingat langa yu, YAWEI.
Yu seibum mi en ai garra kipum detlot lowa blanga yu.
147 Bifo det san gidap mi jingat langa yu blanga album mi.
Mi jidan en weidabat langa yu pramis.
Mi trastim langa yu wed.
148 Naitaim ai nomo silip,
dumaji mi wandim jinggabat wanim yu oldei dalimbat mi.
149 YAWEI, yu irrim mi, dumaji yu filing blanga laigimbat im olagijawan.
Yu sori langa mi en seibum main laif!
150 Detlot krulbala pipul kaminap gulijap na,
ol detlot pipul na hu nomo bulurrum yu lowa.
151 Bat yu jidan gulijap langa mi YAWEI.
Det trubalawei blanga yu garra jidan olagijawan na.
Yu lowa im oldei trubalawan.
152 Longtaim aibin len blanga detlot lowa blanga yu.
Yubin meigim detlot lowa blanga jidan olagijawan.
Mi jinginat langa YAWEI blanga album mi
153 YAWEI, luk langa ol main trabul en seibum mi,
dumaji ai nomo bin fogedabat yu lowa.
154 Yu lukaftum mi YAWEI, en meigim mi fri.
Yu seibum mi jis laik yubin pramis blanga dum.
155 YAWEI, dumaji ola wikitwan pipul nomo teiknodis langa detlot lowa blanga yu,
yu nomo seibum olabat.
156 YAWEI, det kainbalawan filing blanga yu im jidan detmatj na.
Yu sori langa mi en yu seibum mi.
157 Ai garram loda enami en bedfren hu oldei tridim mi nogudwei,
bat ai nomo tenawei brom detlot lowa blanga yu.
158 Wen mi luk langa detlot pipul hu nomo bilib langa yu im meigim mi fil brabli nogudbinji,
dumaji olabat nomo bulurrum detlot lowa blanga yu.
159 Yu luk haumatj mi laigim detlot lowa blanga yu YAWEI.
Wen yu laigim pipul, tharran kaan tjeinj. Im olagijawan na.
Yu shoum yu laigim mi en yu seibum mi.
160 YAWEI, yu wed im trubala,
en ebrijing weya yu titjimbat pipul garra jidan olagijawan.
Laigim en dum ol detlot lowa blanga YAWEI brabliwei
161 YAWEI, ola brabli haibala pipul nomo gibit mi feyago nomo garram risan,
bat brabliwei mi rispek yu lowa.
162 Dumaji blanga ol yu pramis mi brabli gudbinji,
jis laik sambodi hu gudbinji brabliwei wen im faindim samting brabli gudwan.
163 Brabliwei ai nomo laigim detlot pipul hu dalimbat laiya,
bat mi laigim ol yu lowa.
164 Sebenbalataim ebridei mi tok theingkyu langa yu dumaji wen yu jadjim pipul yu gibit olabat feyago.
165 Detlot hu laigim yu lowa, olabat jidan brabli gudbalawei.
Najing kaan meigim olabat go nogudbalawei.
166 YAWEI, mi weit langa yu blanga seibum mi.
Mi dum wanim yu dalim mi.
167 Mi duwit langa ol yu lowa,
en mi laigim olabat insaid langa main hat.
168 Mi lisin en bilib blanga ol detlot lowa blanga yu en langa wanim yu tok.
Yu sabi ebrijing weya mi dum.
Preya langa YAWEI blanga album
169 YAWEI, mi jingat langa yu blanga album mi,
Yu meigim mi sabi yu wed brabliwei jis laik yubin pramis.
170 YAWEI, irrim main preya.
Seibum mi jis laik yubin tok langa yu pramis.
171 Ai garra oldei preisimbat yu,
dumaji yu oldei lenimbat mi blanga ol yu lowa.
172 Ai garra sing song blanga ol yu lowa,
dumaji ol yu lowa im trubalawan, nomo garram enijing rong.
173 YAWEI, jidan redibala blanga album mi,
dumaji mi bulurrum detlot lowa blanga yu.
174 Mi oldei wandim yu blanga seibum mi brabliwei, YAWEI.
Detlot lowa blanga yu meigim mi jidan gudbinjiwei.
175 Larram mi jidan laibala, wulijim ai garra oldei preisim yu.
Larram detlot lowa blanga yu album mi.
176 Mi wokaranbat laiga ship weya imbin los.
Wal yu kaman en lukabat mi, yu wekinmen,
dumaji ai nomo bin fogedabat ola lowa blanga yu.