1 Gibit theingks langa YAWEI dumaji im na gudwan.

Im filing blanga laigimbat pipul jidan olagijawan.✡1 Kran 16:34; 2 Kran 5:13; 7:3; Esra 3:11; Saam 100:5; 106:1; 107:1; 136:1; Jera 33:11

2 Larram ola Isreil pipul tok,

“Im filing blanga laigimbat pipul jidan olagijawan.”

3 Larram ola serramonimen blanga God tok,

“Im filing blanga laigimbat pipul jidan olagijawan.”

4 Larram ol detlot hu weship im tok,

“Im filing blanga laigimbat pipul jidan olagijawan.”

5 Wen aibin ardimbat, aibin jingat langa YAWEI,

en imbin ensim mi en larramgo mi fri.

6 YAWEI im oldei jidan garram mi.

Ai kaan bradin langa enibodi blanga ardimbat mi.✡Hib 13:6

7 YAWEI na jidan garram mi en im oldei album mi.

En ai garra gudbinji wen ai luk main enamimob kaan win.

8 Im mobeda blanga trastimbat YAWEI blanga jidan seifwan,

bat im nomo gudwan ting blanga trastim pipul blanga enijing.

9 Im mobeda blanga trastimbat YAWEI blanga jidan seifwan,

bat im nomo gudwan blanga trastimbat ola lida blanga enijing.

10 Ola enami brom ola kantri bin raidaran langa mi,

bat aibin binijimap olabat garram det pawa blanga YAWEI.

11 Olabat bin jidan raidaran langa mi,

bat aibin binijimap olabat garram det pawa blanga YAWEI.

12 Olabat bin jadimap mi jis laik ola honet,

bat deibin ol barnap kwikbala jis laik jigiwan gras weya barnap langa bush faiya.

Garram det pawa blanga YAWEI aibin binijimap olabat.

13 Deibin ranimap langa mi en deibin gulijap binijimap mi,

bat YAWEI bin album mi.

14 Oni YAWEI na oldei meigim mi jidan brabli strongbala.

Oni im na ebrijing langa mi.

Oni im na bin seibum mi.✡Eksa 15:2; Aisai 12:2

15 Irrim ola pipul blanga God jinginatbat gudbinjiwei insaid langa olabat tent dumaji deibin win.

Det strongwan pawa blanga YAWEI det trubala God bin meigim olabat bidim olabat enami.

16 Det strongwan pawa blanga YAWEI bin meigim wi win langa wo.

Det strongwan pawa blanga YAWEI bin dum tharran.

17 Ai kaan neba dai. Ai garra jidan laibala,

en ai garra dalimbat wanim YAWEI bin dum.

18 Imbin panishim mi brabliwei,

bat im nomo bin larram mi dai.

19 Opinim ola geit blanga det seikridwan haus blanga mi.

Ai garra go en gibit theingks langa YAWEI.

20 Dijan na det geit blanga YAWEI.

Oni detlot pipul hu oldei dumbat ola raitwan ting lau gowin insaid.

21 Mi preisim yu YAWEI dumaji yubin ensim mi,

en yubin seibum mi.

22 Det ston weya detlot kapinta bin tjakidawei,

wal tharran bin det meinwan ston na.

23 YAWEI na bin dum dijan.

Im brabli gudwan orait.✡Meth 21:42; Mak 12:10,11; Luk 20:17; Eks 4:11; 1 Pida 2:7

24 Dijan na det dei blanga YAWEI,

en wi garra gudbinji brabliwei en abum bigwan padi.

25 YAWEI, seibum melabat.

Seibum melabat en meigim melabat win.✡Meth 21:9; Mak 11:9; Jon 12:13

26 YAWEI, jidan kainbala langa det king hu kaman langa yu neim.

Melabat preisim yu brom det Serramoni Pleis blanga yu.✡Meth 21:9; 23:39; Mak 11:9; Luk 13:35; 19:38; Jon 12:13

27 YAWEI im na det trubalawan God, en imbin shainim im lait langa melabat.

Garram ola bushis langa yumob bingga, yumob abum det hepiwan serramoni weya yumob wok raidaran langa det teibul blanga ofring.

28 Yu na main God en ai garra gibit yu theingks,

en ai garra kipgon tok blanga ebrijing yubin dum blanga meigim yu jidan mowa haibala.

29 Gibit theingks langa YAWEI dumaji im na gudwan.

Im filing blanga laigimbat pipul jidan olagijawan.