107
Preisim God blanga im kainbalawei
1 “Gibit theingks langa YAWEI dumaji im gudwan.
Blanga im filing blanga laigim pipul jidan olagijawan.”✡1 Kran 16:34; 2 Kran 5:13; 7:3; Esra 3:11; Saam 100:5; 106:1; 118:1; 136:1; Jera 33:11
2 Tok lagijat na blanga preisim YAWEI ol yumob hu imbin seibum.
Imbin seibum yumob brom ol yumob enamimob,
3 en imbin bringimbek yumob brom ola streinja kantri langa sangidapwei en sangodanwei en brom nowathwei en sauthwei.
4 Sambala pipul bin gitbush langa deset kantri nomo garram eni roud blanga bulurrum,
en nomo bin faindim eni bigwan taun blanga jidan deya.
5 Olabat bin ol hanggri en thestiwan,
en deibin ol gibap na.
6 Brom deya langa olabat trabul, deibin jingat langa YAWEI,
en imbin seibum olabat brom olabat trabul.
7 Imbin deigim olabat langa streitwan roud langa det bigwan taun blanga jidan.
8 Dei garra gibit theingks langa YAWEI dumaji im kipgon laigim olabat olagijawan,
en blanga ola gudwan ting weya imbin oldei dum blanga olabat.
9 Im meigim sedisfaid ol detlot hu jidan thestiwan,
en im meigim bulap detlot pipul hu jidan hanggriwan garram ola gudwan daga.
10 Sambala bin jidan nogudbinjiwei langa brabli dakbala pleis.
Deibin prisana garram tjein en deibin ardimbat,
11 dumaji dei nomo bin teiknodis ola wed blanga det brabli Boswan God,
en deibin nokambek wanim imbin tok.
12 Olabat bin nokap brom dumbat adwek.
Deibin oldei buldan en nobodi bin albumbat olabat.
13 Bat deibin jinginat langa YAWEI blanga olabat trabul,
en imbin seibum olabat.
14 Imbin deigimat olabat brom det dakbala pleis,
en imbin breigimap hafenhaf ol detlot tjein blanga olabat.
15 Dei garra gibit theingks langa YAWEI dumaji im laigimbat olabat olagijawan,
en blanga ola gudwan ting weya imbin oldei dum blanga olabat.
16 Im oldei breigimap ola kopawan geit blanga olabat enamimob,
en im smeshimap ola aiyanwan ba blanga larram im pipul jidan fri.
17 Sambala pipul bin siliwan,
en deibin ardimbat dumaji deibin oldei dumbat brabli nogudbala ting.
18 Olabat nomo bin wandi dagat daga en deibin gulijap dai.
19 Bat deibin jingat langa YAWEI,
en imbin seibum olabat brom olabat trabul.
20 Imbin meigim olabat gudwan garram im wed,
en imbin seibum olabat brom greibyad.
21 Dei garra gibit theingks langa YAWEI dumaji im kipgon laigim olabat olagijawan,
en blanga ola gudwan ting weya imbin oldei dum blanga olabat.
22 Dei garra gibit theingks langa YAWEI garram sekrifais ofring,
en garram ola hepiwan song blanga dalimbat pipul blanga ebrijing imbin dumbat.
23 Sambala pipul bin oldei go langa solwoda garram bigwan bout weya deibin oldei wekwekbat blanga mani.
24 Deibin luk wanim YAWEI gin dum wen imbin dum ola gudwan ting langa solwoda.
25 Imbin jis tok en strongbala win bin blo,
en det solwoda bin sterrimap ola weib.
26 Detlot ola bigwan bout bin lidap ontop en deibin kamdan adbala insaid langa det solwoda.
Detlot men hubin wek langa detlot bout bin brabli bradin dumaji imbin brabli deinjawan.
27 Deibin buldanbat en wokaranbat jis laik drangginbala pipul.
Deibin sabi hendulum bout, bat deya na dei nomo bin sabi wanim blanga dum.
28 Bat deibin jingat langa YAWEI,
en imbin seibum olabat brom olabat trabul.
29 Imbin meigim det bigwan win seduldan,
en detlot woda bin jidan kwaitwan.
30 Deibin gudbinji dumaji ebrijing bin jidan kwaitwan,
en imbin meigim olabat kamat seifwan langa det pleis weya deibin wandi go.
31 Dei garra gibit theingks langa YAWEI dumaji im kipgon laigim olabat olagijawan,
en blanga ola gudwan ting weya imbin oldei dum blanga olabat.
32 Dei garra tok blanga im haibalawei langa ola pipul,
en preisim im langa ol detlot lidamob.
33 YAWEI bin meigim ola riba draiyap brabliwei,
en det kantri bin jidan brabli draiwan.
34 Imbin meigim ola gudwan graun jidan garram solt,
dumaji ol detlot hubin jidan langa det kantri bin dumbat ola brabli nogudwan ting.
35 Bat imbin meigim deset kantri jidan garram ola bilibong,
en draiwan graun imbin meigim kamat garram ola springwoda.
36 Imbin larram ola hanggriwan pipul blanga jidan deya,
en deibin bildimap bigwan taun blanga jidan.
37 Deibin growimap ola gadin blanga olabat en deibin plentimbat ola greiptri,
en deibin gedimbat detmatj daga brom detlot gadin.
38 Imbin dum gudwan ting blanga im pipul olabat en olabat bin abumbat detmatj biginini.
Imbin meigim olabat buligimob kipgon abumbat detmatj gabigabi du.
39 Wen detlot enamimob blanga ola pipul blanga God bidim olabat,
en kilim ded detmatj pipul, en oni lilbit stil jidan,
en detlot enamimob gibitbat olabat adtaim en ardimbat olabat,
olabat jidan sheimwan.
40 En God garra jidan nogudbinji en panishim detlot enamimob,
en meigim olabat wokaranbat langa deset kantri.
41 Bat im garra seibum ola powan pipul brom olabat trabul,
en meigim olabat femilimob jidan detmatj na, wulijim ship.
42 Ola pipul hu jidan trubala langa God sabi dijan,
en olabat brabli gudbinji.
Bat ola nogudwan pipul kaan tok enijing blanga tharran.
43 Larram ol detlot hu jidan sabibalawei jinggabat dislot ting.
Larram olabat jinggabat det filing blanga YAWEI weya im kipgon laigimbat olagijawan.