108
Preya wen melabat enami olabat kaman
Song blanga Deibid.
Ola Saam 57:7-11; 60:5-12
Ai garra kipgon trastimbat yu, God.
Trubala, ai garra kipgon trastimbat yu.
Ai garra sing en preisim yu!
Mi dalimbat miselp, “Jidan gudbinji!
Gajim yu gita en sing!
Ai garra gidap bifo det san en sing!”
 
YAWEI, ai garra gibit yu theingks lida langa ola pipul.
Ai garra preisim yu lida langa ola pipul brom ebri kantri.
Yu filing blanga kipgon laigimbat pipul im jidan ebriweya,
brom longwei ontop raitdan langa graun.
Yu trubalawei im gajimap det skai.
 
God, yu shoum pipul yu haibala pawa deya ontop langa skai,
en yu larram pipul luk yu brabli shainiwan lait ebriweya langa dijan wel.
Ensim main preya en seibum melabat garram yu pawa,
wulijim ola pipul hu yu laigim yu garra jidan seifwan.
 
God bin tok brom im brabli seikridwan pleis,
“Gudbinjiwei ai garra kadimat det taun gulum Shekam,
en gibit det kantri Sukait Beli langa main pipul olabat.
Det dubala kantri gulum Giliyad en Manesa blanga main.
Det kantri Ifreiyim jidan jis laik main speshalwan het,
en det kantri Juda im jidan jis laik main speshalwan stik.
Bat ai garra meigim det kantri Moweb jidan wulijim rabishwan pleis weya tjakam dardiwan woda,
en ai garra tjakam main but langa det kantri Idam blanga shoum mi bos blanga im.
Mi jingat gudbinjiwei, dumaji aibin bidim detlot Filistain pipul.”
 
10 God, hu garra album mi en deigim mi langa det bigwan taun garram haibala wol?
Hu garra album mi en deigim mi langa det kantri gulum Idam?
11 Maitbi yubin libum melabat olagijawan na God.
Yu garra stil go garram melabat ami olabat o najing?
12 Yu album melabat fait langa dislot enami.
Pipul kaan album melabat. Najing!
Olabat nomo strongwan.
13 Oni God na garra meigim wi win.
Im na garra bidim wi enami olabat.