1 Ol detlot pipul hu teiknodis langa YAWEI en hu bulurrum im wei,

olabat na garra jidan gudbinjiwei.

2 Yu garra dum wek blanga gajim ola enijing blanga yu laif,

en yu garra jidan gudbalawei.

3 Yu waif garra abum detmatj biginini jis laik greiptri weya abum detmatj daga,

en olabat garra jidan raidaran langa yu faiya pleis.

4 Lagijat na YAWEI im gibit ola gudbala ting langa pipul hu teiknodis en duwit langa im.

5 Ai askim YAWEI blanga gibit yu ola gudbala ting brom im serramoni pleis langa Saiyan,

en blanga larram yu luk Jerusalem abum ebrijing brom tudei raidap yu dai.

6 Ai prei yu garra jidan laibalawan raidap yu luk yu bigininimob biginini olabat.

YAWEI, yu meigim ola Isreil pipul jidan gudbinjiwei!