127
Blanga preisim YAWEI blanga ola gudwan ting
Song blanga Salaman.
If YAWEI nomo albumbat detlot wekinmen bildimap det haus,
wal det wek im nomo enijing.
If YAWEI nomo maindimbat det taun,
wal im nogud blanga detlot solja blanga maindimbat det taun.
Im nogud blanga wori en adwek brom sangidaptaim raidap sangodantaim blanga gajimbat naf daga,
dumaji YAWEI im dumbat ebrijing langa ol detlot pipul hu laigim im en im gibit olabat taim blanga silip du.
 
YAWEI na oldei gibit pipul biginini.
Olabat brabli speshalwan brom im.
Wen det men im yangbala en abum loda san,
wal detlot san blanga im, olabat jidan jis laik loda spiya langa solja bingga.
Wal det men im hepiwan weya im garram loda san,
dumaji im enami olabat kaan bidim im wen im midap langa olabat.