1 YAWEI, mi brabli nogudbinji en im jis laik mi jidanabat langa dakwan pleis.

Mi jinginatbat langa yu blanga album mi.

2 YAWEI, yu lisin langa mi wen mi jinginatbat langa yu blanga album mi.

3 YAWEI, if yu bina raidimdan ol melabat nogudbalawei,

ebribodi bina git panish en dai.

4 Bat yu nomo bin peiyimbek melabat blanga melabat nogudbalawei,

wulijim melabat gin shoum rispek langa yu.

5 Mi weit garram opin hat blanga YAWEI blanga album mi,

en mi trastim langa im wed.

6 Mi weidabat blanga yu YAWEI garram opin hat brabliwei,

jis laik detlot men hu oldei wek wotjimbat olnait,

en weidabat blanga wotaim im garra ailibala.

7 Trastim YAWEI ol yumob Isreil pipul.

Im kaan neba stap laigimbat yumob,

en im oldei redi blanga seibumbat yumob.

8 Oni im na garra seibum ol yumob Isreil pipul brom ol yumob nogudbalawei.✡ Meth 1:21; Tai 2:14