1 Deya gulijap langa detlot riba langa Bebalon wibin jidan,

en deya na wibin krai nomo lilbit wen wibin jinggabat Saiyan.

2 Wi nomo bin abum filing blanga sing en plei gita, en wibin heingimap olabat langa gulijapwan tri.

3 Detlot Bebalon pipul hubin meigim wi prisana bin dalim wi blanga sing,

“Yumob sing song langa melabat blanga Saiyan.”

4 Hau wi garra sing song langa YAWEI iya langa dijan streinja kantri?

5 Nomo larram mi plei gita igin if mi fogedabat yu, Jerusalem.

6 Nomo larram mi sing igin if mi fogedabat yu,

en if ai nomo jinggabat yu weya yu jidan det nambawan blanga mi.

7 YAWEI, yu jinggabat wanim detlot pipul blanga Idam bin dum detaim wen deibin teikoba Jerusalem.

Yu jinggabat hau deibin kipgon toktok, “Nokamdan im holbit raitdan langa graun.”

8 Pipul blanga Bebalon, bambai yumob garra binijap.

Detlot pipul hu garra peiyimbek yumob blanga wanim yumob bin dum langa melabat, garra gudbinji.✡Reb 18:6

9 Olabat garra deigim yumob beibimob en smeshimap olabat langa bigwan ston.