138
Song blanga gibit theingks
Song blanga Deibid.
YAWEI, ai gibit theingks langa yu garram ol main hat.
Ai sing preis song langa yu lida langa ol detlot najalot drimin.
Ai weship en preisim yu.
Yu filing blanga laigim jidan olagijawan en yu jidan trubalawan.
Yu neim en yu wed jidan brabli haibala.
Yubin ensim mi wen aibin jingat langa yu.
Garram yu pawa yubin meigim mi strongbala.
 
YAWEI, ola king langa dijan wel garra preisim yu,
dumaji deibin irrim ol yu pramis.
Olabat garra sing song blanga wanim yubin dum,
en blanga yu haibalawanwei.
Nomeda yu jidan deya langa top,
yu kain langa pipul hu jidan lobalawei,
en praudbala pipul kaan haidim miselp brom yu.
 
Wen detmatj trabul kaman langa mi,
yu kipum mi seifwan.
Yu seibum mi garram yu pawa brom ol main enami olabat wen dei wail langa mi.
Yu garra dum ebrijing yubin pramis.
YAWEI, yu filing blanga laigim mi jidan olagijawan.
Yu binijim det wek yubin olredi stat dumbat.