12
Hali Mu̱handu̱ wa Bahi̱i̱mi̱. Zabbu̱li̱ gya Dau̱di̱.
1 Ai̱ Mukama, tu̱ju̱ne, hab̯wakubba tihaloho noomwei̱ akutamwo ki̱ti̱i̱ni̱sa,
munanu waahimwo mu bantu.
2 Bagobyangana bankei na bankei,
nibehaariizangana na bigambu bitalimwo.
3 Ai̱ Mukama, ijala mi̱nwa mikwehaariiza,
weetekereerye bensei̱ bakwepankapanka,
4 nibakoba, “Tu̱kwi̱za ku̱bagobya ni̱tu̱basi̱ngu̱ra,
byakubaza tuli nabyo, naani akusobora kuturagira?”
5 Mukama akoba yati, “Hab̯wa kuwonawona kwa museege,
na b̯ujune b̯wa munaku, nkwi̱za kwi̱za mujune.
Nkwi̱za kumuta mu kiikaru kya b̯u̱si̱nge ki̱yendyenge.”
6 Mukama b̯uyeeraga, yeeraga byabiribiri,
kiragaanu kye kiisana feeza gi̱sengeeje ha kyoto mirundi musanju.
7 Ai̱ Mukama, otulindenge biro byensei̱,
otujune bantu ba mu̱hi̱hi̱ gugu.
8 Babiibi basaaseeni̱ hensei̱,
ki̱heeri̱ bantu kuhaariiza b̯ubiibi.