119
Alefu̱
1 Bali na mu̱gi̱sa bab̯wo balibatira mu biragiro bya Mukama,
batakora bibiibi.
2 Bali na mu̱gi̱sa bab̯wo bakwata bigambu byamwe,
bamu̱toolya na mitima myab̯u myensei̱.
3 Bab̯wo batakora kibii,
bei̱tu̱ nibalibatira mu mihanda myamwe.
4 Weewe waatu̱ragi̱i̱ri̱
kukwatira ki̱mwei̱ ndagiiro zaamu.
5 Nkusaba mihanda myange misobore kuhondera
mateeka gaamu biro na biro.
6 B̯u̱b̯wo mwomwo ntaliswara,
biteekerezu byange byabbanga ha biragiro byamu.
7 B̯undyega micwere myamu mirungi,
nkwi̱za kukuhaariizanga na mutima gu̱syanu̱.
8 Nkwi̱za kulinda mateeka gaamu,
Ai̱ Mukama, otandekeera ki̱mwei̱.
Beesi̱
9 Haloho mu̱li̱ngo gwa musigazi akusobora kwicala nali mu b̯u̱doori̱?
Akusobora nka kigambu kyamu kukikoba.
10 Na mutima gwange gwensei̱ nkwi̱za ku̱ku̱toolyanga,
otalindeka kwandaara nkaruga ha biragiro byamu.
11 Nyateeri̱ kigambu kyamu mu mutima
aleke ntalikora kibii mu mei̱so gaamu.
12 Ai̱ Mukama, ohaariizib̯we,
onzegesyenge mateeka gaamu!
13 Ndangiira micwere myamu myensei̱
mya mu mu̱nwa gwamu.
14 B̯u̱kei̱so b̯wamu b̯umpa kusemererwa
kukira b̯u̱gu̱u̱da b̯wensei̱.
15 Biteekerezu byange bi̱kwi̱za kwicalanga mu ndagiiro zaamu,
na mei̱so gange ku mihanda myamu.
16 Mateeka gaamu gampa kusemererwa,
tindigumisirana kigambu kyamu.
Gi̱mero
17 Nkolera birungi gya muheereza waamu,
kwokwo nsobore kwomeera na kuhondera kigambu kyamu.
18 Mmbuula mei̱so, aleke mbone
byamahanu bya mu biragiro byamu.
19 Ndi mu̱goonyi̱ haha ku nsi,
otambi̱sanga biragiro byamu!
20 Mwozo gwange gwegomba
micwere myamu b̯wi̱re b̯wensei̱.
21 Ocoomera banyamyehembu, bakyeneerwe,
batahondera biragiro byamu.
22 Ntoolaho bi̱lu̱mo na mugayo gwab̯u,
kubba bigambu byamu biicala mu mutima gwange.
23 Balemi̱ nab̯ubakora nkwe za ku̱ndwani̱sya,
gya muheereza waamu nkwi̱za kuteekerezanga ha mateeka gaamu.
24 Bigambu byamu bindeetera isanyu,
kandi bimpa magezi̱.
Daleesi̱
25 Mutima gwange gwicala mu cuucu,
mmpa b̯womi ku̱si̱gi̱ki̱ra ku kigambu kyamu!
26 B̯u̱nyakwolokeerye mihanda myange, wanzi̱ri̱ri̱mwo,
nzegesya mateeka gaamu!
27 Ompenge kwetegereza ndagiiro zaamu,
aleke nteekerezenge ha milimo myamu mya mahanu.
28 Ndi na kusalirwa kunene mu mutima gwange hab̯wa b̯ujune b̯undi nab̯wo,
ntati̱i̱rya ku̱si̱gi̱ki̱ra ha kigambu kyamu.
29 Ontoolemwo ngesu za b̯u̱gobya,
mu mbabazi̱ zaamu onzegesye biragiro byamu!
30 Ncwi̱ri̱mwo kubba mwesigwa,
mei̱so gange ngateeri̱ hali micwere myamu.
31 Ai̱ Mukama, nyeesiga bigambu byamu,
otandeka kuswara.
32 Nyetegeki̱ri̱ kukora ku̱si̱gi̱ki̱ra ha biragiro byamu,
wakagali̱hya kwetegereza kwange.
Hehi̱
33 Ai̱ Mukama, nzegesya mateeka gaamu,
aleke nsobore kugahondera biro byensei̱.
34 Mmpa kwetegereza aleke nkwatenge biragiro byamu,
mbihonderenge na mutima gwange gwensei̱.
35 Onyebembere mu muhanda gwa biragiro byamu,
kubba bimpa kusemererwa.
36 Terekereerya mutima gwange mu kuhondera bigambu byamu,
hatali byange nyankei.
37 Toola mei̱so gange kulingiira bintu bitali na mugasu,
ompe kwomeera mu kigambu kyamu.
38 Odosereerye muragu gwamu hali muheereza waamu,
aleke bakutemwo ki̱ti̱i̱ni̱sa.
39 Ntoolahoona bi̱byo bi̱lu̱mo bi̱nsaagi̱ri̱,
hab̯wakubba micwere myamu mirungi.
40 Wona, nkakunyendya ndagiiro zaamu,
ompenge maani mu mananu gaamu.
Waawu̱
41 Ai̱ Mukama, leka ngonzi zaamu zinene na kujunwa kwamu,
bi̱i̱zenge caali ndi nka muragu gwamu kumili,
42 mwomwo ndisobora kwi̱ramwo bab̯wo bandu̱ma,
kubba nyesiga kigambu kyamu.
43 Onterekereerye kubazanga mananu b̯wi̱re b̯wensei̱,
hab̯wakubba ku̱ni̱hi̱ra kwange kuli mu micwere myamu.
44 Nkwi̱za kukwata biragiro byamu ntakulekeera,
biro byensei̱.
45 Kandi nkwi̱za kulibatiranga hagali,
hab̯wakubba mpondera ndagiiro zaamu.
46 Nkwi̱za kurangiranga bigambu byamu mu mei̱so ga bakama,
ntaku̱ti̱i̱na kuswara,
47 kubba kusemererwa kwange kuruga mu biragiro byamu,
bi̱nyendya.
48 Nditamwo ki̱ti̱i̱ni̱sa biragiro byamu bi̱nyendya,
kandi nteekerezenge ha mateeka gaamu.
Zayi̱ni̱
49 I̱zu̱ka kigambu ki̱waadagani̱si̱rye, gya muheereza waamu,
kimpa ku̱ni̱hi̱ra.
50 B̯umba mu kuwonawona,
muragu gwamu gwogwo gu̱mpu̱u̱mu̱u̱lya.
51 Babiibi batati̱i̱na Ruhanga beicala nibasekereerya,
bei̱tu̱ gya tinkaruganga ha biragiro byamu.
52 Ai̱ Mukama, b̯unteekereza ha micwere myamu mya kadei na kadei,
bimpa maani.
53 B̯umbona babiibi batakuhondera biragiro byamu,
nyeegwa ni̱nku̱hya b̯u̱hi̱ na ki̱ni̱ga.
54 Mateeka gaamu googo byembu byange
mu ngoonyi̱ gyange.
55 Ai̱ Mukama, kantekereza heibara lyamu b̯wi̱re b̯wei̱jolo,
ninkwata biragiro byamu.
56 Mu kukwata ndagiiro zaamu,
hooho ntungira kusemererwa.
Heesi̱
57 Mukama yooyo mugab̯u gwange,
nyeheeri̱yo kukwatanga bigambu byamu.
58 Nkukwesegereerya na mutima gwange gwensei̱,
ongiira mbabazi̱, ku̱si̱gi̱ki̱ra ha muragu gwamu.
59 B̯u̱ntekereza ha mihanda myange,
nzi̱ra nimpondera bigambu byamu.
60 Ntakwesi̱tasi̱ta,
aleke nkwate biragiro byamu b̯wangu b̯wangu.
61 Babiibi nab̯ubatega miguha,
tindyebeera biragiro byamu.
62 Mbyoka i̱jolo itumbi kukuhaariiza,
hab̯wa micwere myamu mirungi.
63 Nnywana bab̯wo baku̱ti̱i̱na,
bab̯wo bakwata ndagiiro zaamu.
64 Ai̱ Mukama, nsi gyensei̱ gi̱i̱zwi̱ri̱ ngonzi zaamu zinene,
nzegesya mateeka gaamu!
Teesi̱
65 Ai̱ Mukama, onkori̱ kurungi gya muheereza waamu,
ku̱si̱gi̱ki̱ra mu kigambu kyamu.
66 Nzegesya ncwamwo, magezi̱ na kwetegereza kurungi,
hab̯wakubba nzikiririza mu biragiro byamu.
67 B̯uwaali otakanfu̱u̱bi̱ri̱ nyaahabengi̱,
bei̱tu̱ hataati̱, mmpondera kigambu kyamu.
68 Oli murungi kandi okora birungi,
nzegesya mateeka gaamu!
69 Bamyehembu banteeri̱ho bigambu bya b̯u̱gobya,
bei̱tu̱ gya nkwata ndagiiro zaamu na mutima gwange gwensei̱.
70 Mitima myab̯u timilimwo kakwetegereza,
bei̱tu̱ nsanyu̱ki̱ra mu biragiro byamu.
71 B̯u̱wanfu̱u̱bi̱ri̱ kyabbeeri̱ kirungi,
hab̯wakubba kyampeeri̱ kwega mateeka gaamu.
72 Biragiro byamu bya muhendu,
kukira nku̱mi̱ na nku̱mi̱ za zaabbu na feeza.
Yoodi̱
73 Mikono myamu myambumba b̯u̱mbi̱ri̱ kandi myampangi̱ri̱,
mpa kwetegereza nsobore kwega biragiro byamu.
74 Bab̯wo bakutamwo ki̱ti̱i̱ni̱sa, b̯ubalimbona balijaguza,
hab̯wakubba ndi naku̱ni̱hi̱ra mu kigambu kyamu.
75 Ai̱ Mukama, nkyegi̱ri̱ nti micwere myamu mibba myamananu,
kandi nti onfu̱bi̱i̱ri̱ mu b̯u̱doori̱.
76 Leka ngonzi zaamu zinene zimbudab̯ude,
ku̱si̱gi̱ki̱ra ha muragu gwamu hali muheereza waamu.
77 Ongiire mbabazi̱ aleke kimpe kwomeera,
kubba biragiro byamu byobyo binsemeza.
78 Leka banyamyehembo baswarenge,
hab̯wa kumpangiira ntali na ki̱nkoori̱,
bei̱tu̱ gya nkwi̱za kwicala nintekerezanga ha ndagiiro zaamu.
79 Leka bab̯wo bakutamwo ki̱ti̱i̱ni̱sa bei̱ze hali gya,
aleke basobore kwega bigambu byamu!
80 Leka mutima gwange gubbe gwa mananu hali mateeka gaamu,
aleke ntaswara!
Kaafu̱
81 Mutima gwange gwegomba kujunwa kwamu,
ku̱ni̱hi̱ra kwange kuli mu kigambu kyamu.
82 Mei̱so gange gajwahi̱ri̱ naakulindiira muragu gwamu,
nku̱b̯u̱u̱lya “Olinjuna di̱i̱?”
83 Nfoki̱ri̱ nka kisahu kya maaci ki̱badengeteerye mu mwi̱ca,
bei̱tu̱ tindyebeera mateeka gaamu.
84 Gya muheereza waamu, ndigumisiriza kudwa di̱i̱?
Olibacwera di̱i̱ bakumparana?
85 Bantu ba myehembo bandi̱mi̱i̱ri̱ bi̱i̱na ngwemwo,
tibomeera ku̱si̱gi̱ki̱ra ha kiragiro kyamu.
86 Biragiro byamu byensei̱ bibba byabiribiri,
bakumparanira b̯usa, njuna!
87 Kadooli̱ bantoole mu nsi,
bei̱tu̱ ntakaruge hali ndagiiro zaamu.
88 Mu ngonzi zaamu zinene njuna,
b̯u̱b̯wo mwomwo ndilinda bigambu byamu.
Lamedi̱
89 Ai̱ Mukama, biro byensei̱ kigambu kyamu,
kiicala kinyamaani mwiguru.
90 B̯wesigwa b̯wamu tib̯ulihinduka biro na biro,
nka ku̱waakahangi̱ri̱ nsi kwokwo giicala.
91 Bintu byensei̱ ku̱doosya na kiro kiki,
bili nka ku̱waakacwi̱ri̱mwo, hab̯wakubba byensei̱ biheereza weewe.
92 Kakubba ntahonderengi̱ biragiro byamu,
nnaku zaku̱nzi̱ti̱ri̱.
93 Tindyebeere ndagiiro zaamu biro byensei̱,
hab̯wakubba bindeetera b̯womi.
94 Ndi waamu, njuna,
hab̯wakubba mpondera ndagiiro zaamu,
95 Babiibi nab̯ubandaliira kunswaswana,
bei̱tu̱ gya mutima gwange gwicala ha bigambu byamu.
96 Birungi byensei̱ bili na habisambiira,
bei̱tu̱ kiragiro kyamu kiicala hensei̱.
Meemu̱
97 Kanyegomba biragiro byamu,
ka byobyo nteekerezaho kiro kyensei̱
98 Kiragiro kyamu kimpa magezi̱ gakukira ga banyanzigwa bange,
kubba b̯wi̱re b̯wensei̱ gabba nagya.
99 Beegesa bange bensei̱ mbansi̱nga kwetegereza,
kubba bigambu byamu byobyo nteekerezaho.
100 Kwetegereza kundi na kwo kukira kwa bagu̱lu̱u̱su̱,
hab̯wakubba nkwata ndagiiro zaamu.
101 Nyeehala kukwata muhanda gubiibi,
aleke mpondere kigambu kyamu.
102 Timpugukahuguka kuruga ha micwere myamu,
kubba weewe obi̱nzegesya.
103 Bigambu byamu ka binola,
mali̱ kwo bi̱nwereerya mu kanwa kange kukira na b̯uhooki!
104 Kwetegereza kwange kuruga mu ndagiiro zaamu,
kyokyo nnobera muhanda gwensei̱ gwa b̯u̱gobya.
Nuuni
105 Kigambu kyamu gili taara hali magulu gange,
kandi kyererezi̱ hali muhanda gwange.
106 Ndahi̱i̱ri̱ kandi nindagana,
kukwata micwere myamu mya mananu.
107 Ai̱ Mukama, kambwenaweeni̱,
mpa b̯womi ku̱si̱gi̱ki̱ra ha kigambu kyamu.
108 Ai̱ Mukama, ikiriza nkuhe bihongwa byange bya kukuhaariiza,
kandi nzegesya micwere myamu.
109 Biro byensei̱ nab̯unyakabba ni̱nku̱hi̱gwa,
ntindyebeera biragiro byamu.
110 Nkori̱ za bibii zintegi̱ri̱ mutegu
bei̱tu̱ ndagiiro zaamu tizikandugangaho.
111 Bigambu byamu byobyo mugab̯u gwange biro byensei̱,
byobyo ku̱si̱i̱ma kwa mutima gwange.
112 Biro byensei̱ ku̱doosya ha mmaliiro,
mutima gwange gwakwatanga mateeka gaamu.
Sameki̱
113 Nnoba bantu bateesigwa,
bei̱tu̱ nyeegomba kiragiro kyamu.
114 Weewe b̯wi̱ru̱ki̱ro b̯wange, kandi ngab̯u gyange
ku̱ni̱hi̱ra kwange kwicala mu kigambu kyamu
115 Nywe nkori̱ za bibii, mundeke,
mundeke nkwate biragiro bya Ruhanga wange.
116 Nnsagikanga, ai̱ Mukama, nka muragu gwamu kugukoba,
mwomwo ndyomeera, kandi ku̱ni̱hi̱ra kwange kutalimpemura.
117 Nnsagikanga, aleke ncungurwe,
kandi nkwatenge mateeka gaamu biro byensei̱.
118 Ocoomera bensei̱ bahaba kuruga ha mateeka gaamu,
kubba magezi̱ gaab̯u gabagobya b̯u̱gobya.
119 Babiibi bensei̱ ba mu nsi, obawona nka bisasiro,
kyokyo nyegombira bigambu byamu.
120 Hab̯wa ku̱ku̱ti̱i̱na mubiri gwange gwegwa nigukukankana,
hab̯wa micwere myamu.
Ayi̱ni̱
121 Nkoori̱ kya b̯winganiza kandi kya mananu,
otandeka mu mikono mya banyanzigwa.
122 Weeraga hab̯wa b̯urungi b̯wa muheereza waamu
otekirizanga banyamyehembo kunjooga.
123 Kanjwahi̱ri̱ kukanula mei̱so kulindiira kujunwa kwamu
na kulindiira bi̱weeragi̱ri̱ bya b̯wesige b̯wamu.
124 Gya muheereza waamu, nkolera ku̱si̱gi̱ki̱ra ha ngonzi zaamu zinene,
onzegesye mateeka gaamu.
125 Gya muheereza waamu, mpa kwetegereza,
mwa kwega bigambu byamu.
126 Ai̱ Mukama kaka kooko kei̱re kakukora,
hab̯wakubba babi̱nyi̱ri̱ ndagiiro gyamu.
127 Nahab̯waki̱kyo, nyeegomba biragiro byamu
kukirahoona zaabbu gi̱sengeeje.
128 Bei̱tu̱ ntwala ndagiiro zaamu zensei̱ kubba zi̱doori̱,
kandi nnoba mihanda myensei̱ mya b̯u̱gobya.
Pe
129 Bigambu byamu byamahanu,
kyokyo mutima gwange gubihondera.
130 Asoma bigambu byamu atunga kyererezi̱,
kileetera ntwarwa kwetegereza.
131 Mu kwegomba biragiro byamu,
mu̱nwa gwange gu̱dokere b̯u̱dokeri̱ kubibaza.
132 Nnzi̱rahoona, ongiire mbabazi̱,
nka kwokoranga bab̯wo beegomba ibara lyamu.
133 Onterekereeryenge magulu ku̱si̱gi̱ki̱ra ha muragu gwamu,
aleke ntalifugwa kibii.
134 Ncungura hali bab̯wo baku̱mbonawonesya,
aleke mpondere ndagiiro zaamu.
135 Omulikire gya muheereza waamu,
onzegesye mateeka gaamu.
136 Ndira b̯u̱li̱ri̱ mali̱ga
hab̯wa bantu batahondera biragiro byamu.
Ti̱zaade
137 Ai̱ Mukama, kooli murungi,
na micwere myamu mibba mi̱terekereru̱.
138 Bigambu bi̱waaragi̱i̱ri̱ bibba byamananu,
bibba byakwesigira ki̱mwei̱.
139 Ndi na ki̱ni̱ga kinene,
hab̯wa banyanzigwa bange kwebeera bigambu byamu.
140 Muragu gwamu gwa mananu mali̱,
kyokyo gya muheereza waamu ngwegomba.
141 Kambe ntali wa ki̱ti̱i̱ni̱sa kandi akugaywa,
bei̱tu̱ nab̯wo tindyeb̯wa ndagiiro zaamu.
142 B̯urungi b̯wamu b̯wa biro byensei̱,
kandi biragiro byamu bya mananu.
143 Kambe na b̯ujune na kutuntura,
bei̱tu̱ biragiro byamu bindeetera kusemererwa.
144 Bigambu byamu biicala bya mananu biro byensei̱,
mpa kwetegereza mwa kwomeera.
Koofu̱
145 Ai̱ Mukama, nkukweta na mutima gwange gwensei̱ nzi̱ramwo!
Nkwi̱za kukwata mateeka gaamu.
146 Nkukuliriira, njuna,
aleke nkwate bigambu byamu.
147 Mbyoka mambya atakasari ninkweta onjune,
ku̱ni̱hi̱ra kwange kuli mu bigambu byamu.
148 I̱jolo lyensei̱ ndaala ntebbaki̱ri̱,
nintekereze ha muragu gwamu.
149 Ai̱ Mukama, hab̯wa ngonzi zaamu zinene weegwa iraka lyange,
ompe b̯womi ku̱si̱gi̱ki̱ra ha b̯winganiza b̯wamu.
150 B̯ab̯wo banyankwe kabanyesegereerye heehi̱ na bigyendeerwa bibiibi,
biragiro byamu tibabihondera.
151 Ai̱ Mukama, kaweewe omba heehi̱,
biragiro byamu byensei̱ byamananu.
152 Kuruga kadei na kadei ninyeega bigambu byamu,
nka kubiicala bya biro na biro.
Reesi̱
153 Wona kuwonawona kwange oncungure,
kubba tindyebeera biragiro byamu.
154 Ntonganiira oncungure,
mpa b̯womi ku̱si̱gi̱ki̱ra ha muragu gwamu.
155 Babiibi tibalijunwa,
hab̯wakubba tibahondera mateeka gaamu.
156 Ai̱ Mukama, mbabazi̱ zaamu ka za maani,
mpa b̯womi ku̱si̱gi̱ki̱ra ha micwere myamu.
157 Banyanzigwa bakumparana banene,
bei̱tu̱ tindiruga hali bigambu byamu.
158 B̯umbona bantu batakwikiririzamwo ntammwa b̯utamwa,
hab̯wakubba tibahondera kigambu kyamu.
159 Ai̱ Mukama, wona nka kunyegomba ndagiiro zaamu,
mpa b̯womi hab̯wa ngonzi zaamu zinene.
160 Bigambu byamu byensei̱ gabba mananu,
na micwere myamu mirungi mya biro na biro.
Si̱i̱ni̱
161 Balemi̱ bamparanira b̯usa,
bei̱tu̱ mutima gwange gu̱ti̱i̱na bigambu byamu.
162 Kansanyukira kigambu kyamu,
nka muntu agu̱mbwi̱ri̱ kyeitungu kinyamaani.
163 Kantamwa b̯u̱gobya,
bei̱tu̱ kandi nyeegomba biragiro byamu.
164 Nkuhaariiza mirundi musanju b̯uli kiro,
hab̯wa micwere myamu mya mananu.
165 Bab̯wo beegomba kiragiro kyamu babba na b̯u̱si̱nge b̯unene hoi̱,
tihaloho kikusobora kubaleetera kukiibbala.
166 Ai̱ Mukama, ndi na ku̱ni̱hi̱ra mu kujunwa kwamu,
Nnkora biragiro byamu.
167 Mutima gwange guhondera bigambu byamu,
kubba mbyegombera ki̱mwei̱.
168 Mmpondera ndagiiro zaamu na bigambu byamu,
hab̯wakubba mihanda myange myensei̱ omyegi̱ri̱.
Taawu̱
169 Ai̱ Mukama, leka kusaba kwange kukudwereere,
ompe kwetegereza ku̱si̱gi̱ki̱ra ku kigambu kyamu.
170 Leka kwesengereerya kwange kukudwereere,
ncungura ku̱si̱gi̱ki̱ra ha muragu gwamu.
171 Kanwa kange kaakuhaarizanga,
hab̯wakubba onzegesya mateeka gaamu.
172 Kalimi kange kahi̱i̱manga kigambu kyamu,
kubba biragiro byamu byensei̱ bya mananu.
173 Leka mukono gwamu gwetegeke kunjuna,
hab̯wakubba nsi̱i̱ma ndagiiro zaamu.
174 Ai̱ Mukama nyeegomba kujunwa kwamu,
kandi biragiro byamu byobyo bimpa masanyu.
175 Leka mutima gwange gwomeerenge, kandi gukuhaariizenge,
leka micwere myamu minjunenge.
176 Mpabi̱ri̱ nka ntaama gi̱syereeri̱,
ntoolya gya muheereza waamu,
kubba tinyeebeera biragiro byamu.