3
Gua asa, ke totoso lopu boka hokara pude aqa nono la si gami si vizatia gami si pude koa mo si gami kara Saelasi pa Atenisi.* TTA 17:15 Ba garunu atu nia mo gami koa gamu se Timote, sa tasida. Na tie tavetavete te Tamasa si asa, pude tavetavete turaṉae koa gami pa vina enena sa Inavoso Leana te Zisu Karisito. Garunu atu nia gami si asa, pude va ṉiṉira gamu, meke tokani gamu koari na mia rinaṉeraṉe, pude loke tie koa gamu si kote hiva luara pania se Karisito, sina koa gua koari na ṉinovaṉovala hire. Ura gilania mia gamu sapu sari na pinodeke gugua arini, si na hiniva tugo te Tamasa koa gita. Sipu korapa koa gami koa gamu, si ele tozi va kenue ni gamu tu gami, sapu kote ta ṉoṉovala si gita. Meke gilania mia gamu sapu asa tugo si ta evaṉa koa gita. Gua asa, ke totoso lopu boka hokara pude aqa nono la si rau, ke hiva avoso gilania rau sapu be korapa koa va nabu si gamu. Ke garunu atu nia rau koa gamu se Timote, pude va avosi vegua sa mia rinaṉeraṉe. Ura mala nia rau sapu be ele toketoke gamu e Setani, meke kote ta okipalae hoboro mo sari na mami tinavete koa gamu.
Ba kamahire si ele pule mae se Timote, meke ele paleke mae nia sa koa gami sa inavosona sa mia rinaṉeraṉe na tataru. Meke ele tozini gami tugo sa sapu hoke ta balabala si gami koa gamu pa qinetuqetu, meke hiva dogoro sisigiti gami gamu, gua tugo sapu gami ba hiva dogoro sisigiti gamu.* TTA 18:5 Ke kasa tasimami, koasa mia rinaṉeraṉe mo gamu, si tava ṉiṉira sari na bulomami koari doduru mami tinasuna na ṉinovaṉovala. Ura kamahire si qetuqetu na tava ṉiṉira sa mami tinoa, koa gua sapu turu va nabu si gamu pa tinoa keke koasa Baṉara. Ke zama leanani gamu gami koasa nada Tamasa kamahire. Zama leana nia gami sa qinetuqetu, sapu tagoa gami pa laemia gamu, sapu koa koari na bulo mami pa vinaravara pa kenuna sa nada Tamasa. 10 Rane na boṉi si varavara la koe Tamasa si gami pa doduru bulo mami, pude boka atu dogoro pule gamu gami, pude boka va toṉoti saripu gua sea koari na mia vina hinokara.
11 Telena sa nada Tamasa sa Tamada, meke sa nada Baṉara Zisu, si mani turaṉa toṉoto atuni gami, pude atu dogoro gamu. 12 Mani tokani gamu sa Baṉara si gamu, pude mi koa varivari tatarue, meke pude mi tataru ni sari doduru tie. Mani va ṉiṉira gamu sa Tamasa, pude toqolo va gigiri hola latu sa mia tataru, pude kekeṉoṉo gua sa mami tataru koa gamu. 13 Mani va ṉiṉirai Sa sari na bulomia, pude mi tavamadi, na loke tinazutu mia pa kenuna sa nada Tamasa sa Tamada, pana pule mae se Zisu sa nada Baṉara turaṉi sari doduru Nana tie madidi* Ginuana sari “Nana tie madidi” si ari na tie te Karisito pu ele mate, meke toa turaṉia si Asa pa Maṉauru, meke sari na Mateana..

*3:1 TTA 17:15

*3:6 TTA 18:5

*3:13 Ginuana sari “Nana tie madidi” si ari na tie te Karisito pu ele mate, meke toa turaṉia si Asa pa Maṉauru, meke sari na Mateana.