1 E Ehazi si hiokona puta vuahenina totoso tava baṉara si asa, meke koa baṉara si asa pa Zerusalema ka manege onomo vuaheni. Lopu luli sa sari na hahanana leadi te Devita sa tutina; ba taveti sa sari na tinavete sapu lopu toṉoto pa dinoṉo te Zihova. 2 Luli sa sari na hahanana kaleadi tadi na baṉara pa Izireli. Na taveti sa sari na bekuna e Beolo pa qolo. 3 Va uququ oto huda humaṉa lea pa Lolomo Hinomu si asa, meke va vukivukihi ni sa sari na tuna koreo soti, pa vinukivukihi la koari na beku. Tavete luli sa sari na tinavete variva malederedi tadi na tie pu hadu vura ni e Zihova totoso nuquru sari na tinoni Izireli pa popoa Kenani. 4 Koari na hope tadi na beku koari na batu toqere, meke pa kaurudi ri ninae huda aqaqoro si va vukivukihi meke va uququ oto huda humaṉa lea se Ehazi.

5-6 Gua asa ke va malumia e Zihova sa Tamasa te Ehazi, sa baṉara pa Siria pude va kilasia se Ehazi. Meke soku tie Ziuda si zau vagi sa baṉara pa Siria meke turaṉa pule lani pa Damasikasi, na tie ta pusidi. Va malumia tugo e Zihova sa baṉara pa Izireli, se Peka, sa tuna e Remalia, pude va kilasia se Ehazi, ke va matei sa baṉara Izireli si ka keke gogoto hiokona puta tina tie varanedi pa Ziuda, pa kekeke rane mo. E Zihova, sa Tamasa tadi na tiatamadia, si va malumia sa ginugua hie pude ta evaṉa, sina sari na tinoni pa Ziuda si kilu ia si Asa.*Ais 7:1 7 Keke tie varipera pa Izireli, pozana si e Zikiri, si va matedi sari Maseia sa tuna sa baṉara Ehazi, e Azirikama sa palabatu koasa vetu baṉara, meke e Elikana sa koimata vina rua tanisa baṉara. 8 Na turaṉadia tugo sari na tie Ziuda, ba la ari pa Izireli meke zau vagi si ka karua gogoto tina barikaleqe na koburu pude na dia tie ta pusidi meke turaṉa la ni pa popoa Sameria, meke paleke vagi dia soku likakalae tugo.

9 Ba keke poropita te Zihova, pozana si e Odedi, si koana pa Sameria. La tutuvi sa sari na tie varipera tadi pa Izireli sipu puledi la pa Sameria turaṉi rini sari na tie ta pusidi, meke zama la si asa, “Se Zihova sa Tamasa tadi na tiatamamia si bugoro ni sarini pa Ziuda ke va malumu gamu Sa pude va kilasi si arini, ba kamahire si avoso nia Sa, sapu toleṉe gua hola sa vina kilasa tavetia gamu. 10 Meke kamahire si hiva va pinausu i gamu sari na tie, na barikaleqe pa Zerusalema meke pa Ziuda. Vea lopu gilania tu gamu, sapu gamu ba tavete va kaleana la koe Zihova sa mia Tamasa? 11 Ego avoso mae koa rau! Sari na tie ta pusidi hire sina tasimia koreo na tasimia vineki si arini. Mamu va pule i, pude lopu gua asa si kote va kilasa gamu sa Tamasa pa Nana tinaṉaziri.”

12 Ka made tie tuturaṉa koari pa butubutu Izireli, Azaria sa tuna e Zehohanani, e Berekaea sa tuna e Melesimoti, Zehizekia sa tuna e Salumu, meke e Amasa sa tuna e Hadalai, si lopu qetu nia tugo sa tinavete sapu tavetia ri na tie varipera. 13 Ke zama si arini, “Lopu turaṉa maeni tani sari na tie ta pusidi isara! Ele tavete va sea si gita koe Zihova, meke ele ta ṉaziri si Asa pada pude tava kilasa si gita. Kamahire si hiva taveti pule gamu si kaiqa tinavete saripu kote tomoi sari nada sinea.” 14 Ke la ri na tie varipera meke va malumu lani koari na koimata sari na tie ta pusidi, meke sari na likakalae pu paleke maeni rini. 15 Ke sari ka made tie arini si ta vizata pude poni ni poko na sadolo sari na tie ta pusidi arini koari na likakalae saripu ta paleke maedi. Ke poni ni poko na sadolo rini pude va sagei, poni ni ginani na kolo napo tugo rini, meke ṉuzapa ni oela olive rini sari bakoradi. Saripu malohoro sisigiti meke lopu boka ene, si va hakei rini pa doṉ'ki, meke ta turaṉa pule sari doduru tie ta pusidi, kamo la pa Zeriko, sa popoa huda pamu. Meke vasina si tiqe kekere pule la pa dia popoa pa Vasileana Sameria sari na tie Izireli.

16-17 Pa totoso asa si podalae rapatia ari pa Edomu sa popoa Ziuda, meke soku hola sari na tie ta pusidi si vagi rini, ke tepa la tinokae sa baṉara Ehazi koe Tiqalati Pilesa, sa baṉara pa Asiria. 18 Korapa gua asa si la rapata tugo sari pa Pilisitia koari na popoa pa hubi toqetoqere pa kali lodu rimata, meke pa Neqevi d pa popoa Ziuda. Zau vagi rini sari na vasileana pa Beti Semesi, Aizaloni meke Qederoti, meke sari na popoa pa Soko, Timina, meke Gimizo turaṉae na dia vasileana hitekedi pa vari likohaedi tugo, meke la va soto kinoa si arini vasina. 19 Koa gua sapu turaṉa va sea i e Ehazi, sa baṉara pa Ziuda, sari na tinoni meke kilua rini se Zihova, ke poni ni tinasuna Sa sari pa Ziuda. 20 Sa baṉara pa Asiria si mae, ba lopu toka nia sa se Ehazi; la poni nono nia tinasuna tu sa si asa. 21 Ke vagi qolo se Ehazi pa Zelepade, pa vetu baṉara, meke koari na koimata pa butubutu, meke vala ni koasa baṉara pa Asiria, ba lopu ta tokae nia tugo sa sapu gua asa.

22 Totosona sapu kaleana hola sa tinasuna tanisa, si tavete nono latu pa tinavete kaleadi si asa pa kenuna e Zihova. 23 Va vukivukihi la si asa koari na tamasa tadi pa Siria, arini pu tiqe va kilasana si asa. Zama si asa, “Sari na tamasa beku tadi pa Siria si toka nia sa baṉara pa Siria, ke be va vukivukihi la si rau koa rini, si kote toka nau tugo rini,” gua. Koa sa ginugua asa si va kamo tinasuna si asa meke sari pa nana popoa. 24 Meke vagi tugo sa sari na tiṉitoṉa tavetaveteana pa korapa Zelepade, meke seke poraka va umumi sa. Tukua sa sa Zelepade, meke taveti sa sari na hope pa ninae vasina mo pa Zerusalema. 25 Pa doduru popoa, hiteke na lavata, pa Ziuda, si kuri i sa sari na hope vinahesihesi huporo, pude va uququ oto huda humaṉa lea la koari na tamasa tadi na tie karovodi. Pa ginugua hie si raza la koasa telena sa tinaṉaziri te Zihova, sa Tamasa tadi na tiatamana.

26 Sari kaiqa ginugua pule pu ta evaṉa pa nana binaṉara, podalae pa podalaena kamo pa vina betona, si ta kubere gore beto koa Sa Buka Tinozi tadi na Baṉara pa Ziuda meke Izireli. 27 Mate sa baṉara Ehazi meke ta pomunae si asa pa Zerusalema, ba lopu koasa popomunuana baṉara. Sa tuna koreo, se Hezikaea, si hobena si asa pa binaṉara.*Ais 14:28