1 Tavetia Zosaea sa baṉara sa Pasova te Zihova pa Zerusalema pa vina manege made rane pa sidara kekenu meke va matei rini sari na lami tanisa inevaṉa asa. 2 Va turu i sa sari na hiama koari na tinavete tadirini koasa Zelepade te Zihova, meke sovutu i tugo sa pude madi tavete va leana. 3 Zamai tugo sa sari na tie Livaeti, arini pu hoke va tumatumae pa Izireli, saripu ele va madi puleni koe Zihova: “Vekoa sa Bokese Vinariva Egoi pa korapa Zelepade sapu kuria Solomone sa baṉara, sa tuna Devita. Lopu pude paleke lamae nia gamu pa avara mia, ba kaqu nabulu nia gamu se Zihova sa mia Tamasa meke sari Nana tie pa Izireli. 4 La vagi sari mia tuturuana pa Zelepade, luli pa hopeke puku tuti, koari na tinavete pu ta poni ni gamu koe Devita sa baṉara, meke sa tuna se Solomone.*2 Baṉ 8:14 5 Mamu va tana pule ni gamu pude kaiqa gamu si kote boka va nama pude toka ni sari hopeke puku tatamana pa Izireli. 6 Gamu si kaqu va matei sari na tuna sipi na qoti tanisa Pasova. Ego, va via puleni gamu, mamu va nama ni sari na lami pude sari na tasimia pa Izireli si kote boka luli sari na tinarae sapu valani e Zihova koe Mosese.”

7 Vala ni Zosaea sa baṉara si ka toloṉavulu puta tina sipi, na lami, meke qoti vaquradi, meke ka ṉeta tina bulumakao kokoreo pude tadi na tie koasa Inevaṉa Pasova. 8 Sari na nana koimata pa binaṉara ba varitokae la tugo koari na tie, hiama, meke koari na tie Livaeti pude tavetavete ni. Meke sari na ṉati tie pu kopu nia sa Zelepade, Hilikaea, sa ṉati hiama kenukenue, Zakaraea, meke Zehieli si vekoi karua tina onomo gogoto tuna sipi, na qoti vaquradi, meke ṉeta gogoto bulumakao kokoreo pude tanisa inevaṉa pa totoso vukivukihi. 9 Sari na koimata tadi na tie Livaeti: Konania, Semaea sa tasina Netanela, Hasabia, Zeieli, meke Zozabada, si varitokae nia ka lima tina lami, na qoti vaquradi, meke ka lima gogoto bulumakao kokoreo tadi na tie Livaeti pude vukivukihi ni.

10 Totoso hokoto sari doduru vina namanama tanisa Inevaṉa Pasova, sari na hiama na tie Livaeti si la pa dia puku tuturuana, gua sapu garunu ni sa baṉara. 11 Beto va matei rini sari na lami na qoti, si vagi rina tie Livaeti meke vagi pani kapudi, meke sari eharadi si vagi rina hiama meke siburu lani koasa hope. 12 Meke vari hia ni rini pa vari korapa dia, pa puku tatamana, sari na kurukuru pude tana vukivukihi va uququ, pude boka va vukivukihi la koe Zihova lulia gua sa vina turu sapu koa pa Tinarae te Mosese. 13 Va kinai rina tie Livaeti sari na kurukuru tana vukivukihi pa nika, lulia sa tinarae, meke va qototi sari na vinariponi madidi pa raro hite, raro nomadi, meke raro labelabedi, meke tuturei va hia lani rini koari na tie sari masadi.*Ekd 12:8-9 14 Beto asa si vagi masa sipi sari na tie Livaeti pude dia teledia, meke nama poni tugo sari na hiama sapu tuti goredi koe Eroni, sina sari hiama si tupiti osolae kamo lodu rimata, vukivukihi va uququ meke vukivukihi ni rini sari na deana. 15 Sari na tie kerakera pa butubutu Livaeti pa tuti te Asapa si koa pa dia vasidi sapu ta tozi ni arini koe Devita, Asapa, Hemani, meke Zedutuni sa poropita tanisa baṉara. Sari na tie kopu pa sasada si lopu kilu taluarae pa dia tinavete sina ari na tie Livaeti si va nama poni Pasova si arini.*1 Koron 25:1 16 Ke, gua sapu garunu nia Zosaea sa baṉara, sari doduru tinavete si ta tavete beto koasa rane asa pa vina gorevurana sa tinarae te Zihova pa kinopuna sa Inevaṉa Pasova, meke sa vinukivukihi va uququ pa hope. 17 Ka zuapa rane si koa qetuqetu nia ari na tie Izireli pu koa pa totoso asa sa Pasova meke sa Inevaṉa Bereti Loke Isitina.*Ekd 12:1-20 18 Podalae tu totoso te poropita Samuela meke kamo koa sa totoso te Zosaea si lopu hite ta tavete si keke Inevaṉa Pasova kekeṉoṉo gua sapu ta evaṉa kamahire. Loke baṉara tugo ele tavetia sa Inevaṉa Pasova gugua asa pu tavetia Zosaea sa baṉara, sari hiama, sari na tie Livaeti, meke sari na tie pa Ziuda, Izireli, meke Zerusalema. 19 Sa Pasova hie si ta evaṉa pa vina manege vesu vuahenina sa binaṉara te Zosaea.

20 Sipu beto taveti Zosaea sa baṉara sari na tinavete arini koasa Zelepade, si se Neko sa baṉara pa Izipi si turaṉia sa nana qeto minate pude la varipera pa Kasemisi pa Ovuku Iuparetisi. Topue vura la se Zosaea pude la raza i, 21 ba garunu la zinama se Neko koe Zosaea: “Sa vinaripera sapu korapa nia arau hie si lopu soto atu koa goi, na baṉara pa Ziuda. Lopu mae si arau pude raza igo, ba sari na qua kana tu, ura tozi nau sa Tamasa pude tuturei. Sa Tamasa si koa pa qua kalina, ke mamu lopu mae raza au, sina kote va kilasigo sa Tamasa.” 22 Ba hiva varipera tugo se Zosaea. Ke korona avosia sa sa zinama te Tamasa sapu tozi vura nia baṉara Neko, meke poko va paere pule nia si asa, meke la somana pa vinaripera pa pezara pa Meqido.

23 Pa korapana sa vinaripera si gotoa na tupi se Zosaea, sa baṉara. Zamai sa sari nana nabulu, “Vagi taloa nau, bakora va kaleana si rau!” 24 Ke ovulu vura nia rini pa nana totopili varipera, meke va suraṉa la nia pa keke totopili varipera pule tanisa meke suraṉa pule la nia rini pa Zerusalema. Vasina si la mate si asa, meke ta pomunae pa popomunuana tadi na baṉara. Meke besu nia ri doduru tie pa Ziuda meke Zerusalema sa nana minate.

25 Taveti poropita Zeremaea si kaiqa kinera va lukalukana la koe Zosaea sa baṉara. Hoke ta kerae sari kinera lukalukana hire koari na tie kerakera pa Izireli, palabatu na barikaleqe totosona balabala ia rini si asa. Sari na kinera hire si ta kubere gore pa buka kera lukalukana.

26 Doduru tinavete pule pu taveti e Zosaea meke sa nana vina tabena sa tinarae te Zihova, 27 meke sari na tinavete pu taveti sa podalae pa pinodalaena meke kamo pa vinabetona sa nana binaṉara si ta kubere gore beto pa Buka Tadi na Baṉara Izireli meke Ziuda.