2
Na Tie Varipera Ta Ronuna te Zisu Karisito
1 Ke agoi, na tuqu, mu koa va ṉiṉira pa mia sinoto koasa Baṉara, koasa tataru lopu ta ṉana kamona, pu poni nigo e Zisu Karisito pa tinoa keke koa Sa. 2 Sari na vina tumatumae pu ele avosi goi koa rau pa kenudi ri soku tie va sosode, si mamu va tumatumae ni koari na tie ta ronuedi, pude boka va tumatumae i tugo rini sari na votiki tie.
3 Mamu somana koa gami koasa tinasigiti, guana tie varipera leamu te Zisu Karisito. 4 Mamu tavetavete pude va qetua sa mua Baṉara kekeṉoṉo gua sa tie varipera pu hiva va qetua sa nana koimata pa varipera, ke lopu somana ni sari na tinavete tadi na tie hokara. 5 Mamu kopu ni sari na tinarae te Tamasa, kekeṉoṉo gua sa tie varivose haqala, sapu lopu boka vagia sa sa pinia, be lopu va tabei sa sarini pu tozi nia sa tinarae. 6 Mamu tavetavete va ṉiṉira pude vagia sa mua tinabara, guana tie uma sapu tavetavete va ṉiṉira pa nana inuma, si kaqu pakete kekenua sa sa vuana sa nana tinavete. 7 Ego, mamu balabala i saripu gua zama ni rau hire, sina kote va gilana nigo sa Baṉara sari doduru tiṉitoṉa.
8 Mu balabala ia se Zisu Karisito, sapu turu pule pa minate, pu gore mae gua pa tutina e Devita, gua sapu va tumatumae nia sa Inavoso Leana, sapu tarae vura nia rau. 9 Asa sa Inavoso Leana, sapu ta sigiti nia rau, meke ta pusi nia seni rau, guana keke tie kaleana. Ba sa zinama te Tamasa si lopu boka ta pusi. 10 Gua asa, ke somana ta sigiti ni rau sari doduru tie ta vizatadi te Tamasa, pude arini ba kaqu vagia tugo sa tinaharupu, sapu koa koe Zisu Karisito, meke va kamo gita pa tinoa hola.
11 Hinokara sa zinama hie:
Be ele mate turaṉae koe Karisito si gita,
si kaqu toa turaṉae tugo koa Sa si gita.
12 Be koa va ṉiṉira pa tinasigiti si gita,
si kaqu somana tagoa tugo gita sa ṉiniraṉira koasa Nana Binaṉara.
Be oso nia gita sapu na tie tanisa si gita,
si kaqu osoni gita tugo Sa si gita.*Mt 10:33; Lk 12:9
13 Be guana lopu koa raṉeraṉe si gita,
ba lopu boka hobei Sa sari Nana zinama,
sina lopu na tie kokoha si Asa.
Sa Nabulu Tavetavete sapu Va Qetua sa Tamasa
14 Mamu va balabala ni koari na tie te Tamasa vasina sari na ginugua sara, pude madi somana pa tinasigiti. Mamu va balau zoṉazoṉa ni tugo pa kenuna sa Tamasa, pude madi lopu varivari tokei ni sari na zinama, sina loke tinokae hokara boka vagi ni saripu gugua arini, ba ṉovalia mo sa rinaṉeraṉe tadirini pu va avoso. 15 Mamu tavete valeania sa mua tinavete ninabulu, pude boka va qetua sa Tamasa. Guana nabulu sapu lopu kurekure nia sa nana tinavete, sina variva tumatumae va toṉoto nia goi sa zinama hinokara te Tamasa. 16 Mu lopu somana ni sari na zinamazama duviduvilidi, na hoborodi, sina kote va ilolae taloa i rini koe Tamasa sari na tie. 17 Sa vina tumatumae sea si araha la, kekeṉoṉo guana tubu variva matena, sapu toa meke lopu boka ta salaṉa. Ari Haimeneasi e Piletasi sari karua tie pu variva tumatumae nia sa vina tumatumae kokoha gua asa. 18 Zama sari kara, sapu sa nada tinuru pule si ele ta evaṉa tu koa gita, gua. Ke ele ilolae taloa sari kara koasa vina tumatumae hinokara, meke ṉoṉovalia ri kara sa rinaṉeraṉe tadi kaiqa tie te Karisito. 19 Ba sa patu sinokirae sapu ele vekoa Tamasa pa Nana vetu sapu sa ekelesia, si turu va nabu. Meke koasa patu sana si ta kubere sari na zinama gua hire: “Gilani Nana sa Tamasa saripu Tanisa,” meke, “Asa sapu zama, arau si tanisa Baṉara gua, si mani luara pani sari nana tinavete kaleadi,” gua.*Nab 16:5
20 Koa ke vetu arilaena si koadia sari na votivotiki tiṉitoṉa: Kaiqa si ta tavetae siliva, kaiqa si na qolo, kaiqa sina huda, meke kaiqa pule sina pepeso. Kaiqa si pude tavetavete ni pa vinarigara arilaedi mo, meke kaiqa pule si tadi na tinavete hoborodi mo. 21 Meke koari na tie ba kekeṉoṉo gua tugo asa. Be va ilolo pule nia sa tie koari doduru vina tumatumae kokohadi sara, si kote na tie pu garona pude nabulu nia sa Baṉara pa doduru tinavete arilaedi. Sina madina si asa, pude tanisa Baṉara mo, meke tava nama si asa, pude taveti sari doduru tinavete leadi. 22 Ego, mu govete nia sa hahanana vinari riqihi tadi na tie vaqura. Mamu luli valeania sa tinoṉoto, na rinaṉeraṉe, na tataru, meke na binule; somanae koari na tie pu vahesia sa Baṉara pa bulo viana. 23 Mu lopu somana ni sari na vinari zamai duviduvilidi na hoborodi, gilania mua sapu sa vina betona si kote kamo pa vinaripera. 24 Sa nabulu tavetavete tanisa Baṉara, si lopu kote koa vari tokei si asa. Ba kaqu tataru ni sa sari doduru tie, meke na tie bokabokana, na ṉoṉo pa nana tinavete variva tumatumae si asa. 25 Mani va tumatumae ni pa ṉinoṉo saripu lopu va egoa sa nana vina tumatumae hinokara. Sina hokara kote va malumi Tamasa si arini pude kekere, meke tiqe va hinokara. 26 Meke tiqe kote pulepaho si arini, meke taluarae koasa sipata te Setani, pu hena vagidi visoroihe, meke vata evaṉae ni nana tie pude va tabe sari nana hiniva.