1 Meke tata pa totoso tugo asa si tuqe vagi sa baṉara Herodi d se Zemisi meke sari kaiqa tiena sa ekelesia pude ṉoṉovali, 2 meke garuni sa sari nana solodia meke la kupa nia magu ruana se Zemisi, sa tasina e Zone. 3 Meke totoso dogoria e Herodi sapu qetu nia rina tie Ziu sapu gua tavetia sa, si la vata pusia pule sa se Pita. Ta evaṉa si hie pa totoso vinarigara pude hena ia sa bereti loke Isitina. 4 Sipu tuqe vagia sa se Pita, si la vekoa sa si asa pa vetu varipusi. Meke luara vala sa si asa koari ka made puku solodia pa vetu varipusi pude kopu nia. Hopeke ka made tie si keke pukuna. Hiva nia Herodi si pude pa mudina sa Inevaṉa Pasova d si kote ta pitu se Pita pa kenudi rina tie, gua.*Ekd 12:1-27 5 Ke ta kopue veko mo pa vetu varipusi se Pita. Ba sa ekelesia si korapa varavara toka sisigiti la nia koe Tamasa si asa.

6 Pana boṉi, sipu lopu ele kamo sa koivugona totoso kaqu ta pitu se Pita, si puta si asa pa varikorapadi ri karua solodia pu kopu totoko nia, meke ta pusie karua seni tugo si asa. Koa dia tugo sari na solodia pu kopu pa sasadana sa vetu varipusi. 7 Meke vura va hodaka la si keke mateana tanisa Baṉara, ke kalalasa sa korapa losena sa vetu varipusi. Zotia sa mateana sa kali tinina e Pita, meke va vaṉunia sa, meke zama, “Tuturei tekulu!” gua si asa. Meke hoqa palae sari na seni koari na limana e Pita.

8 Meke zama sa mateana, “Mu va nabua sa mua belete, mamu va sagei sari na mua sadolo,” gua si asa. Ke tavete gua tugo se Pita. Meke zama pule tugo sa mateana, “Mu va sagea sa mua poko hade, mamu luli au,” gua si asa. 9 Ke lulia Pita si asa, ba lopu gilania Pita sapu na tiṉitoṉa hinokara si korapa evaṉia sa mateana koa sa. Balabala ia Pita si hokara keke dinogodogorae mo si dogoria sa, gua. 10 Ene hola nia ri kara sa puku tie kopu vinakeke, meke la hola nia pule sa vina rua, meke tiqe la kamoa ri kara sa sasada aeana sapu vura la pa vasileana nomana. Meke ta tukele telena sa sasada, ke vura taloa dia sari kara. Meke sipu ene gore la ri kara pa siraṉa, si murimuri taloa nana sa mateana koe Pita.

11 Pa totoso tu asa si tiqe gilania Pita sapu gua ta evaṉa koa sa, ke zama si asa, “Koi, tiqe kamahire tu tumae nia rau sapu hinokara sa Nana mateana tu si garunu mae nia sa Baṉara pude harupau si arau koasa ṉiniraṉira te Herodi, meke koa ri doduru ginugua pu korapa hiva ni rina tie Ziu pude vata evaṉi,” gua si asa.

12 Totoso gilana valeana ia sa sapu gua asa, si topue ene la si asa pa vetu te Mere sa tinana e Zone Maka, vasina korapa varigara na varavara sari kobi tie. 13 La kikia se Pita pa sasada, ke la pude tukelia sa sasada gua si keke nabulu vineki, sapu e Roda pozana. 14 Sipu avoso gilania sa sa mamalaiṉina e Pita, si qetu va hola si asa. Ke haqala pule, ba lopu tukelia sa sa sasada. La tozia sa koa rini sapu e Pita si korapa turu nana pa sada, gua.

15 “Ai, pekipeki si goi,” gua sarini.

Ba toketoke si asa, meke zama, “Lokari, hinokaraqu!” gua si asa.

Ke olaṉa si arini, “Ego, nana*Balabala ia ri kaiqa tie sapu keke mateana si kopu ni hopeke tie te Tamasa. mateana mo si isa,” gua sarini.

16 Ba kikia nono la se Pita, ke la tukelia sa sasada gua rini, si turu nana se Pita, ke magasa hola si arini. 17 Ba va noso la ni limana e Pita si arini, meke tiqe tozi va bakalia sa koa rini, gua meke vata rupahia sa Baṉara si asa pa vetu varipusi. Beto asa, si garuni Pita si arini pude la tozi nia se Zemisi*Zemisi sa tasina Karisito., meke koa ri doduru tie te Karisito sapu gua ta evaṉa. Beto asa si taluarae la pule pa keke vasina se Pita.

18 Pana munumunu si pupuhu sisigiti nia dia rina tie kopu pa vetu varipusi sapu gua ta evaṉa koe Pita. 19 Garuni Herodi sari nana tie pude hata ia se Pita, ba lopu boka dogoria rini si asa. Ke tiqe hata va minakia Herodi koari na tie kopu pa vetu varipusi sa ginugua asa, meke garunu nia sa pude va matei sari kasa tie kopu vetu varipusi arini, gua. Beto asa, si ta luarae pa Ziudia se Herodi, meke la koa paki si asa pa Sizaria.

20 Na bugoro ni e Herodi sari na tie pa popoa Taea meke Saedoni, ke la si keke dia puku tinoni tadi kasa pude dogoria se Herodi. Ba kekenu si la baere pakia tu rini se Balasitasi, sa tie kopu koasa vetu baṉara te Herodi, pude tokani, gua. Beto asa, meke tiqe la tepa ia sa vinaribulei koe Herodi gua, sina sari na dia popoa si hoke la vagivagi ginani mo koari na popoa pu koa pa kinopu te Herodi.

21 Meke sipu kamo sa rane ta mutina, si va sagei Herodi sari nana poko baṉara, meke la habotu si asa pa nana habotuana baṉara, meke tiqe zama koari na tinoni. 22 Velavela sari na tinoni, meke zama, “Na tamasa mo si zama hie, lopu na tie!” gua si arini. 23 Meke pa totoso tugo asa si la sa mateana te Tamasa meke va mohoa se Herodi, sina lopu va lavatia sa sa Tamasa. Ke gania na nokinoki sa tinina, meke mate si asa.

24 Ba sa zinama te Tamasa si ta tarae hoda la, meke soku lala dia saripu avosia meke lulia si asa.

25 Meke sipu va hokotia ri Banabasi e Saula sa ṉatina sa dia inene pa Zerusalema si taluarae pule taloa sari kara. Meke turaṉia rini se Zone Maka.