1 Arini sari na tinarae na vina tumatumaena sa vinariva egoi, sapu tozi nia Zihova se Mosese pude tavetia koari na tinoni Izireli pa popoa Moabi. Doduru hire si tomo la koa sa vinariva egoi sapu tavetia e Zihova koa rini pa toqere Saenai. 2 Tioko varigara ni e Mosese sari doduru tinoni Izireli meke zamai sa, “Ele dogoro valeania mo gamu, sapu gua evaṉia e Zihova koasa baṉara pa popoa Izipi, meke sari nana palabatu nomadi, meke koasa popoa lavata. 3 Ele dogoro soti gamu sari na oza kaleadi hola, na tinavete variva magasadi, na ṉiṉiradi, saripu taveti e Zihova. 4 Ba kamo tu pa rane ṉinoroi si lopu ele poni gamu Sa sa binalabala, pude tumae nia gamu gua sapu ele dogoria meke avosia gamu. 5 Ura koari ka made ṉavulu puta vuaheni sipu turaṉa gamu e Zihova pa korapa qega, sari na mia poko na sadolo si namu loke lulutudi hokara. 6 Loke gemi bereti na vaeni babe na bia tana napo, ba e Zihova si poni gamu pude lopu ehaka nia keketoṉa, pude mi tumae nia sapu Asa tugo sa mia Tamasa. 7 Meke sipu kamoa gita sa popoa hie, se Sihoni sa baṉara pa popoa Hesiboni, meke se Oqo, sa baṉara pa popoa Basani si raza mae meke varipera koa gamu. Ba la gita meke va kilasi si arini,*Nab 21:21-35 8 meke vagia gita sa dia popoa, meke variva hia nia koari na butubutu te Rubeni, Qadi, meke kukuruna sa butubutu te Manase.

9 Ego, mi va tabea na kopu valeana nia sa vinariva egoi sapu ta tavete pa rane ṉinoroi pude kaqu bokaboka si gamu koari doduru mia tinavete. 10 Pa rane ṉinoroi si turu si gamu pa kenuna e Zihova sa mia Tamasa; gamu doduru, sari na mia koimata, na mia palabatu nomadi, sari na mia tie, 11 na barikaleqe, sari na tumia, meke sari na tie karovodi saripu koadi koa gamu saripu soko poni huda gamu na paleke poni kolo gamu. 12 Mae si gamu pa rane ṉinoroi pude somana nia sa vinariva egoi hie, sapu tavetia e Zihova sa mia Tamasa koa gamu, meke na vina nabuna sa mia zinama tokotokoro koa Sa, 13 pude kaqu va nabu valeania e Zihova kamahire koa gamu, sapu gamu si Nana tinoni soti meke Asa sa mia Tamasa, gua sapu ele va tatara nia Sa koa gamu meke sari na tiatamamia, se Ebarahami, Aisake, meke Zekopi. 14 Ba lopu koa gamu mo si tavetia e Zihova sa vinariva egoi tanisa vina tatara hie. 15 Koa gita doduru mo, sapu turu pa kenuna Sa pa rane ṉinoroi, si tavete mae nia Sa, meke gua tugo koari nada sinage na sage, saripu lopu ele podo vura mae.

16 Mi balabala pulea gamu sa nada tinoa, totoso koa si gita pa popoa Izipi, meke gua sapu ta evaṉa koa gita totoso ene karovo mae gita koari na popoa tadi na votiki butubutu osolae kamo si gita koasa popoa hie. 17 Dogori gamu sari na dia beku saripu ta tavete pa huda, patu, siliva, na qolo, saripu lopu qetu sisigiti ni Sa. 18 Mi balau, pude loke tie na barikaleqe, tatamana babe na butubutu saripu turu tani pa rane ṉinoroi, si kaqu veko pania se Zihova sa nada Tamasa, meke vahesi sari na tamasa huporodi tadi kaiqa butubutu tie. Sa vinahesi beku si kekeṉoṉo guana dadaga huda variva matena sapu toqolo sage pa vari korapa mia gamu.*Hib 12:15 19 Mi balau, pude loke tie koa gamu pu turu tani pa rane ṉinoroi meke avosi sari na tinarae ṉiṉiradi, meke zama va hinokara nia sa, sapu doduru si leadi beto mo koasa gua, ba hiva lulia mo sa sa nana hiniva soti, lopu sapu te Zihova. Sa tie gua asa si kote vata evaṉia sa ṉinovaṉovala koa gamu doduru, saripu leadi babe kaleadi. 20 Namu lopu kaqu taleoso nia e Zihova sa tie sapu gua asa; ba sa binugoro te Zihova sapu huruṉu sage guana nika, si kaqu va kilasia si asa, meke sari doduru tina levei saripu ta kubere koasa buka hie, si kaqu raza koasa, osolae tava murimuri palae sa pozana pa kauruna sa Maṉauru. 21 Kaqu paqaha vagia e Zihova si asa koari doduru butubutu Izireli, pude ta levei ni sa sari doduru tinalevei saripu ele ta kubere koasa buka tinarae hie.

22 Sari na tudia rina tumia saripu kaqu podo mae vugo repere, meke sari na tie karovodi koari na popoa pa seu, si kaqu dogori sari na tinalevei na tinasigiti, arini pu garununi e Zihova koasa Nana popoa. 23 Sari na popoa si ta sulu palae pa nika, meke ta evaṉae na soloti meke na nai beto si arini. Lopu boka ta lete, meke sari duduli ba lopu boka toqolo vasina.*Zen 19:24-25 24 Meke sa doduruna sa kasia popoa si kote nanasa, ‘Na vegua ke tavetia e Zihova sapu guahe koasa popoa hie? Na sa sa ginuana sa Nana binugoro lavata?’ gua. 25 Meke kaqu guahe sa inolaṉa, ‘Ura sari na tinoni te Zihova si va karia sa vinariva egoi sapu tavetia rini koa Sa, sa Tamasa tadi na tiatamadia sapu turaṉa vurani si arini pa popoa Izipi. 26 Vahesi rini sari kaiqa tamasa huporodi saripu lopu hoke hite vahesi rini pukerane. Arini sari na tamasa saripu lopu hivani e Zihova pude vahesi rini. 27 Gua asa ke bugoroni e Zihova sari Nana tinoni, ke va razani tinalevei Sa sa dia popoa, meke sari doduru tinalevei saripu ta kubere koasa buka hie. 28 Meke bugoro sisigitini e Zihova si arini, meke koasa Nana binugoro lavata, si rabutu sageni Sa koari na dia popoa soti, meke vata raovo lani koari na votiki popoa, meke vasina si korapa koa si arini pa rane ṉinoroi,’ gua. 29 Koadia si kaiqa tiṉitoṉa sapu lopu vata gilanani e Zihova, ba sa Nana tinarae si vata dogoro nia Sa, meke gita meke sari na tudia ri na tuda si kaqu va tabei si arini ninae rane ka rane.