4
1 Meke doṉo pule la si rau meke dogori rau sari doduru ṉinovaṉovala saripu korapa ta evaṉa pa kauruna sa rimata:
Dogori rau sari na kolomata tadi na tie ta ṉovaladi,
meke loke tie va manoti.
Loke tie va manoti sina sa ṉiniraṉira si pa kalina tadi na tie ṉoṉovala.
2 Meke zama si rau sapu arini pu ele mate,
si qetu hola ni sarini pu toadi.
3 Ba sapu leana holani sari karua
si asa pu lopu ele podo,
asa pu lopu ele dogoria sa kinaleana
sapu ta tavete pa kauruna sa rimata.
4 Meke dogoria rau sapu doduru minabo pa tinavete meke doduru binokaboka si vuradi koasa inokoro tanisa tie pude tagoa gua sapu tagoa sa turaṉana. Meke hie tugo si loketoṉa laena, na hadu luli givusu mo.
5 Sa tie pekipeki si poloi sari limana, ovia si asa,
meke ṉovala pule nia, sina korona tavetavete.
6 Leana si be tagoa goi si keke sinara lima pa binule
hola nia sapu be karua sinara lima ba pa minabo meke hadu lulia sa givusu.
7 Dogoria pule rau si keketoṉa sapu loke laena pa kauruna sa rimata:
8 Koa nana si keke tie koa ekeina;
loke tuna koreo babe tasina koreo si asa.
Loke vina betona sa tinavetavete tanisa,
ba sari na matana si lopu manoto ni sari nana tinagotago.
“Ura, esei si korapa tavetavete ponia rau,” gua si asa,
“meke na vea ke hukata pule nau pude qetuqetu qua?”
Hie tugo ba loketoṉa laena,
keke ginugua sapu variva hakohakona.
9 Karua si leana hola nia sapu keke,
sina kote noma laena sa dia tinavete.
10 Be hoqa si keke,
ba sa nana baere kote ovulu sage pule nia!
11 Meke be karua si eko varigara, si kote vari maṉini.
Ba vea meke kote boka koa maṉini si keke tie telena?
12 Ura keke tie si kote boka ta komiti,
ba karua si kote boka lavelave pule ni.
Na iku sapu ta tavete koari ka ṉeta aroso
si lopu kote boka tuturei kumata.
13 Leana be sa tie vaqura si malaṉana ba gilaena hola nia sa baṉara sapu barogoso meke pekipeki sapu lopu boka vagi vina balau. 14 Sa tie vaqura si gina koa maena pa vetu varipusi meke evaṉae baṉara nana, babe podo maena pa minalaṉa koasa nana butubutu. 15 Dogoria rau sapu doduru pu toa meke ene pa kauruna sa rimata si lulia sa tie vaqura, sa hinobe tanisa baṉara. 16 Soku hola saripu totoli ni sa baṉara, ba sa sinage pu sage luli mae si kilua sa hinobena sa baṉara. Hie tugo si loketoṉa laena, na hadu luli givusu mo.