5
Lopu Bebeno Tavete Vina Tatara
1 Mu kopu pule nigo totoso la si agoi pa Zelepade te Tamasa. Leana pude mu tata la pude va avoso meke va tabe, hola nia si be vukivukihi gua tadi tie pekipeki. Lopu gilania rini sapu tavete va sea si arini.
2 Mu lopu tuturei zama nia sa ṉuzumu,
lopu bebeno zama ni sapu pa bulomu
pude va tatara pa kenuna sa Tamasa.
Ura sa Tamasa si pa maṉauru,
meke agoi si pa pepeso
ke va pada i sari mua zinama pa kenuna Sa.
3 Na putagita si kamo pana soku sari na tinasuna na tinalotaṉa,
meke sa zinama pekipeki si ta tozi vura be guana zama va soku sa tie.
4 Pana zama va tokotokoro goi koe Tamasa, si mu tuturei va gorevura ia. Tamasa lopu qetu ni sari tie pekipeki; va gorevura ia sapu tokotokoro nia agoi.*Sam 66:13-14 5 Leana hola si be lopu va tokotokoro, hola nia si pude tokotokoro meke lopu tava gorevura. 6 Lopu va malumia sa ṉuzumu pude turaṉa va sea igo. Lopu la koasa hiama meke tozi nia sapu lopu boka gorevura i goi sari mua zinama. Na vevelaso si gua asa. Lopu leana be kote bugoro ni Tamasa sari mua zinama meke huara pani Sa sari doduru pu taveti goi pa limamu. 7 Soku pinutagita meke soku zinama si loke laedi. Gua ke mu noso mamu koa pamaṉa nia sa Tamasa.
Tinoa si Loke Laena
8 Pana dogoria goi sapu ta ṉoṉovala sa tie malaṉa, sapu sa ṉinoṉo meke tinoṉoto si lopu ta poni nia sa, si mu lopu magasa nia. Ura sa tie qavuna si ta kopue koasa pu kali sage koasa, meke ari karua si ta kopu koasa pu ululuna sage la tu. 9 Sapu ta gavoro koasa pepeso si hia betoa mo ri doduru, meke sa baṉara ba vagi tugo koari na inuma.
10 Asa pu tataru nia sa poata si lopu qetu nia gua sapu gavoro va soku si asa;
asa pu okoro hiva tagotago si lopu boka qetuni sapu ele tagoi sa.
Hie tugo si loke laena.
11 Pana soku sari likakalae pu tagoi goi,
si kote soku tugo sarini pu kote vagi pani.
Ke sa sa laedi koa goi pu tagodi?
Na pude doṉo lani mata meke beto mo?
12 Sa pinuta tanisa tie tavetavete si lomoso hola,
lopu kiluna be hena va soku si asa ba vasinahite mo,
ba sa tago va soku tanisa tie tagotago,
si lopu boka puta va leana nia sa.
13 Dogoria rau si keke tiṉitoṉa kaleana hola pa kauruna sa rimata:
Sa tinagotago sapu ta naqiti meke tinasuna nia sa,
14 meke sa tinagotago sapu ta ṉovala pa kaiqa tinasuna,
meke totoso vagi tuna koreo sa,
si loketoṉa boka veko hola ponia.
15 Dodohona sa koburu totoso vura si asa pa tiana sa tinana;
mae gua asa si asa, ke mani pule gua tugo asa.
Loketoṉa koasa nana minabo sapu ele vagia sa
si kote boka paleke taloa nia sa pa limana.*Zob 1:21; Sam 49:17; 1 Tim 6:7
16 Hie tugo si keke ginugua kaleana hola:
Limalimana sa tie totoso mae, si gua tugo pana taloa si asa,
ke sa mo si va gavoria sa?
Na guana tavetavete ponia mo sa sa givusu.
17 Doduruna sa nana tinoa si henahena mo si asa pa huporo,
pa korapa tinasuna, tinasigiti, meke binugoro.
18 Meke tiqe tumae nia rau sapu na leana tu meke gotogoto pude hena na napo sa tie, meke pude vagi kaiqa lineana koari na tinavete pu mabo ni sa pa kauruna sa rimata koari ka visavisa rane pu ponia sa Tamasa koasa. Ura asa mo sa nana hinia. 19 Ura, pana ponia tinagotago sa Tamasa si keke tie, meke va boka ia Sa pude qetu ni sari nana vinagi pa tinavete, si leana pude va egoa sa sa nana hinia, meke tavetavete qetuqetu si asa pa nana tinavete. Ura arini mo sari na vinariponi te Tamasa.
20 Lopu hoke balabala sisigitia sa sapu vea papakana gua sa nana tinoa, sina va tupitia Tamasa si asa koasa qinetuqetu pa bulona.