1 Meke zama la koe Mosese se Zihova, “Kaqu vata evaṉae gunigo Rau e Tamasa koasa baṉara si goi, meke se Eroni sa tasimu, si kaqu zama ponigo koasa baṉara guana mua poropita si asa. 2 Mamu tozi koe Eroni sari doduru tiṉitoṉa saripu zamani Rau koa goi meke kaqu tozi sa koasa baṉara, pude va malumu taloai sari na tie Izireli pa nana popoa. 3-4 Kote sokudi sari na tinavete variva matagutudi saripu taveti Rau pa popoa Izipi, ba kote va luli nia Rau nana hiniva sa baṉara, meke lopu kaqu hiva avoso gamu sa. Ba kaqu va kilasa sisigitia Rau sa popoa Izipi, beto asa meke kaqu turaṉa vurani Rau sari na Qua tinoni koasa popoa asa.*TTA 7:36 5 Meke kaqu gilania rina tinoni pa popoa Izipi sapu Arau se Zihova, sapu tubehi si arini sipu va sagea Rau sa limaqu meke turaṉa vurani sari na tinoni Izireli pa popoa Izipi.” 6 Meke vata evaṉa betoi Mosese, e Eroni sapu gua zamani e Zihova. 7 Ka vesu ṉavulu puta vuahenina se Mosese, meke ka vesu ṉavulu ṉeta vuahenina se Eroni pa totoso sipu zama koe Pero sa baṉara si arini.

8 Meke zama la koari Mosese e Eroni se Zihova, 9 “Be hiva vina sosode sa baṉara pude tavetia si keke tinavete variva magasana, si mamu zama ia se Eroni, pude vagia sa nana kolu hodu. Mani oki gore nia pa kenuna sa baṉara, meke kaqu ta ilirae noki si asa.” 10 Ke topue la koasa baṉara sari Mosese e Eroni, meke taveti saripu gua garununi e Zihova. Gona gore nia Eroni sa nana kolu hodu pa kenuna sa baṉara meke sari nana palabatu, meke ta ilirae noki si asa. 11 Meke tioki tugo sa baṉara sari nana tie tumatumaedi na tie vakuvakutae, meke koasa dia tinavete sekesekei si tavete kekeṉoṉo puta gua tugo asa si arini. 12 Oki goreni rini sari na dia kolu hodu, meke ta ilirae noki si arini. Ba la sa kolu hodu te Eroni meke onolo betoi sapu tadirini. 13 Ba namu lulia sa baṉara sa nana hiniva soti, gua puta tugo sapu zama nia e Zihova, meke korona avosi sa sari Mosese e Eroni.

14 Meke zama la koe Mosese se Zihova, “Namu lulia nana hiniva sa baṉara meke korona va taloai sa sari na tinoni Izireli. 15 Ke mamu la munumunu, pude tutuvia si asa, pana ene gore la si asa koasa Ovuku Naelo. Mamu palekia sa kolu hodu sapu ilirae noki, mamu la aqa nia si asa pa taqelena sa ovuku. 16 Mamu zama guahe koasa baṉara, ‘Se Zihova, sa Tamasa tadi na tinoni Hiburu, si garunau si rau pude tozi nigo, pude va taloa i sari Nana tie, pude la vahesia rini si Asa pa korapa qega. Ba kamoa kamahire si lopu ele va malumi goi si arini. 17 Ego, guahe si zama nia e Zihova: Kaqu gilania goi kamahire esei si Arau koasa tinavete hie sapu kaqu tavetia Rau. Kaqu seke nia kolu hodu Rau sa beruna sa kolo, meke kaqu ta ilirae ehara si asa.*Rev 16:4 18 Meke kaqu mate beto sari na igana, meke kaqu humaṉa hikare sisigiti sa kolo, meke lopu kaqu boka napoa rina tinoni pa popoa Izipi si asa.’ ”

19 Meke zama la koe Mosese se Zihova, “Mu tozi nia se Eroni pude taṉini va ululia sa nana kolu hodu koari doduru leana, na kolo pa gineli kolo tototolo pepeso, meke sari na kopi pa popoa Izipi. Meke sari na vovoina saripu ta tavetae huda, meke sari na zagi patu tugo, ba kaqu ta ilirae ehara sa kolo, meke kaqu tale eharana mo sa doduruna sa popoa,” gua si asa.

20 Meke tavetia ri Mosese e Eroni sapu gua garunu nia e Zihova koari kara. Ovulu sage nia Eroni sa nana kolu hodu pa kenuna sa baṉara, meke sari nana palabatu, meke sekea sa sa beru kolo koasa ovuku, meke ta ilirae ehara beto sari doduru kolo. 21 Meke mate beto sari doduru igana pa kolo meke humaṉa hikare sisigiti, meke lopu boka napoa rina tinoni pa popoa Izipi sa kolo, meke doduru vasina pa popoa Izipi, si tale eharana mo. 22 Beto asa, si tavete kekeṉoṉo puta gua tugo asa sari na tie vakuvakutae koari na dia tinavete sekesekei, ke luli nana hiniva mo sa baṉara. Kekeṉoṉo gua puta tugo sapu ele zama nia e Zihova, si korona avosi sa baṉara sari Mosese meke se Eroni. 23 Ba pule la nana pa nana vetu baṉara, meke lopu hiva va gunagunana nia sa gua sapu ta evaṉa. 24 Meke gelia ri doduru tinoni pa popoa Izipi sa taqelena sa ovuku, pude napo gua, sina lopu boka napoa rini sa kolo koasa ovuku.

25 Ka zuapa rane si ele hola gua sipu sekea e Zihova sa kolo.