1 Doṉo la si rau meke dogoria rau sa kineha habohabotuana baṉara sapu ta tavetae pa patu ṉedala sapaea*Sapaea si kala buma guana lamana peava., pana uluna sage sa galegalearane sapu kali sage pa batudi rina mateana serubimi.*Izk 1:26; Rev 4:2 2 Zama la sa Tamasa koasa tie sage poko lineni, “La koari vari korapadi ri na totopili pa kaurudi ri na kurukuru. Mamu va siṉi ni sari limamu koari na motete leradi pa vari korapadi rina serubimi, mamu la vuvusu ni pa doduruna sa vasileana Zerusalema.” Totoso korapa doṉo la si rau si nuquru la si asa.*Rev 8:5

3 Ego sari serubimi si turu dia pa kali matao*Kali matao, be tia la pa kali gasa rimata sa tie, sa kali matao si pa kali saoti. koasa Zelepade totoso nuquru sa tie pa varikorapadi ri na mateana, meke siṉia na lei sa varivarigarana pa kenuna sa Zelepade. 4 Meke ale sage sa tinolava ṉedalana te Zihova pa kali sage koari na serubimi meke rizu la pa nuqunuquruana koasa Zelepade. Siṉia na lei sa Zelepade meke sa varivarigarana si siṉia na ṉinedalana e Zihova. 5 Sa mamalaiṉidi ri na tatapurudi ri na serubimi si boka ta avoso la tu pa varivarigarana lavata pa sadana la tu, guana mamalaiṉina sa Tamasa pu tagoi sari doduru ṉiniraṉira pana zama si Asa. 6 Totoso garunu ia e Zihova sa tie pu poko lineni, “Vagia sa nika pa vari korapadi ri na totopili, sapu pa varikorapadi ri na serubimi,” gua, si nuquru la sa tie meke la turu pa kalina keke totopili. 7 Totoso asa si qaqama vura nia keke ari serubimi sa limana la koasa nika sapu koana koa rini. Vagi i sa si kaiqa meke la vekoi sa pa limana sa tie pokopoko lineni, meke vagi sa meke vura taloa. 8 Pa kauru tatapurudi ri na serubimi si boka ta dogoro sapu doṉo gua na kinehadi rina lima tie.

9 Doṉo la si rau, meke dogori rau si ka made totopili, keke totopili pa kali dia ri hopeke serubimi; sari totopili si pinoro guana patu ṉedala.*Izk 1:15-21 10 Sa dinoṉodi si doṉo kekeṉoṉo mo si arini; hopeke doṉo guana keke totopili sapu viloro pa korapana keke totopili vilorona pule. 11 Totoso rizu rini si la gua si arini pa keke koa ri ka made kalina sapu vasina tia la sari na kurukuru pa doduru vasina sapu hiva la si rini. Sari serubimi si rizu la mo pa vasina sapu tia la sa batuna, ba lopu taliri si arini totoso rizu si arini. 12 Sa doduruna sa tinidia, sari mudidia, limadia meke tatapurudia, si koa betoi mo na mata, sari ka made totopili ba gua tugo.*Rev 4:8 13 Avosia rau sapu sari na totopili si pozani, “Sari totopili viloviloro,” arini. 14 Sari serubimi si hopeke ka made isumatadi: Keke isumata si tana serubimi, vina rua isumata si tana tie, vina ṉeta si na isumata laione meke sa vina made isumata si tana atata.*Izk 1:10; Rev 4:7

15 Meke ale sage sari serubimi. Hire mo sari na kurukuru toadi sapu dogori arau pa taqele Ovuku Keba. 16 Totoso rizu sari serubimi si rizu tugo sari totopili pa kali dia; meke totoso repahi ri serubimi sari tatapuru dia pude sage ta luarae pa pepeso, si lopu ta luarae pa kali dia sari totopili. 17 Totoso turu noso sari serubimi, si noso tugo sari totopili; meke totoso tapuru sage sari serubimi si somana sage turaṉi tugo arini, sina sa maqomaqodi ri na kurukuru toadi hire si koa koarini.

18 Meke ta luarae sa tinolava ṉedalana te Zihova pa nuqunuquruana pa Zelepade meke la noso panaulu, kali sage koari na serubimi. 19 Sipu korapa doṉo la rau si repahi ri serubimi sari tatapuru dia meke nebe sage, ta luarae pa pepeso meke sipu ta luarae rini si somana luli sari totopili. La noso si arini pa nuqunuquruana koasa sasadana sa goba pa kali gasa rimata koasa Zelepade te Zihova, meke sa tinolava ṉedalana te Tamasa pa Izireli si pa kali sage koa rini.

20 Hire mo sari kurukuru toadi sapu dogori rau pa kauruna sa Tamasa pa Izireli pa taqele Ovuku Keba, meke tiqe tumae nia rau sapu na serubimi si arini. 21 Hopeke ka made isumatadi meke ka made tatapurudi, meke pa kauru tatapurudi si doṉo guana kinehadi rina lima tie. 22 Sari isumatadia si kekeṉoṉo gua tugo sari kineha sapu dogori rau pa taqele Ovuku Keba. Hopeke arini si tapuru toṉoto la pa kenu dia.