4
Vinahesi pa Maṉauru
1 Meke sipu beto saripu gua sara, si doṉo la si rau, meke dogoria rau, si keke sasada ta tukelena pa Maṉauru. Meke sa tie sapu avoso kekenua rau, sapu sa mamalaiṉina si guana buki si zama: “Sage mae tani, maqu va dogoro nigo sapu gua kote ta evaṉa vugo repere,” gua. 2 Meke hinoqa koa si rau pa ṉiniraṉira tanisa Maqomaqo Hope, meke dogoria rau pa Maṉauru si keke sapu korapa habotu Nana koasa ṉati habotuana Baṉara.*Izk 1:26-28, 10:1 3 Meke Asa sapu habotu vasina, si doṉodoṉo guana patu sapu viana guana qelasi, meke ziṉara guana ehara. Meke keke bigobigo sapu buma guana patu emerolo*Sa patu emerolo hie si buma guana karamahi., si vari likohae nia sa habotuana Baṉara. 4 Meke pa vari likohaena sa ṉati habotuana Baṉara, si koadia pule sari ka hiokona made habotuana baṉara. Meke habotu dia vasina sari ka hiokona made koimata, saripu pokopoko keoro meke toropae ni dia sari na toropae baṉara saripu ta tavetae qolo. 5 Meke vura va hodaka mae koasa ṉati habotuana Baṉara sa malarana sa kapi, meke ta avoso sa pidalana sa paka maṉauru na lulusu. Meke pa kenuna sa ṉati habotuana Baṉara si koadia sari ka zuapa zuke huruṉudi. Arini sari ka zuapa Maqomaqona sa Tamasa.*Ekd 19:16; Rev 8:5, 11:19, 16:18; Izk 1:13; Rev 1:4; Zak 4:2 6 Meke koa nana pa kenuna sa ṉati habotuana Baṉara si keke tiṉitoṉa, sapu doṉo guana kolo sapu bule sisigiti, meke kekeṉoṉo gua na qelasi viana. Meke pa vari likohaena sa ṉati habotuana Baṉara asa, si koadia sari ka made kurukuru toadi, saripu tale matadi mo kenudi na mudidi.*Izk 1:22 *Izk 1:5-10, 10:14 7 Sa kurukuru kekenu si doṉo guana laione, meke sa vina rua si doṉo guana bulumakao kokoreo, meke sapu vina ṉeta si doṉo guana tie mo sa isumatana, meke sa vina made si doṉo gua tugo na atata tapuruna. 8 Meke hopeke onomo tatapurudi sari ka made kurukuru hire, meke tale matadi mo doduru tinidi si arini, meke pa kauru tatapurudi ba gua tugo. Meke rane na boṉi si lopu makudo zama guahe sa dia vinahesi:*Izk 1:18, 6:2-3, 10:12
“Hopena, hopena, hopena sa Baṉara, sa Tamasa sapu tagoi sari doduru ṉiniraṉira,
sapu koa pukerane, meke korapa koa kamahire, meke sapu kaqu mae,” gua.
9 Meke doduru totoso vahesihesia, na va lavalavatia, meke zama leana la ia ri ka made kurukuru toadi si Asa pu habotuna koasa ṉati habotuana Baṉara, meke sapu toa hola ninae rane ka rane, 10 si hoqa todoṉo sari ka hiokona made koimata pa kenuna Sa, pu habotu koasa ṉati habotuana Baṉara, meke vahesia rini si Asa, sapu toa hola ninae rane ka rane. Meke pa vinahesi si veko lani rini pa kenuna sa ṉati habotuana Baṉara sari na dia toropae baṉara, meke zama:
11 “Ke Tamasa mami Baṉara, garomu tugo
pude vagia Goi sa vinahesi, na vina lavata meke na ṉiniraṉira.
Ura Agoi mo kuri sari doduru likakalae,
meke pa Mua hiniva mo Goi si koa meke toa si arini,” gua.