31
Ta Padapada La koasa Huda Sida sa Popoa Izipi
1 Pa vina manege eke vuaheni, pa vina ṉeta sidara koasa rane kekenu, si kamo mae koa rau sa zinama te Zihova: 2 “Tuna na tie, mamu la zama guahe koe Pero sa baṉara pa Izipi meke sari nana tinoni:
‘Koe sei boka ta padapada la sa mua binaṉara tolavaena?
3 Doṉo la koe Asiria, na huda sida pa Lebanoni pukerane,
leleadi lelaṉana sapu va maqomaqo gore la koari na hudahuda pa soloso;
ululu hola si asa,
sage kamo la tu koari na lei.
4 Ta poni va leana kolo si asa,
sari bukaha pa kauru pepeso va toqolo ululu ia;
sari tototolo si koa dia
pa vari likohaena sa
meke garunu taloa kolo
koari doduru huda pa soloso.
5 Ke toqolo ululu hola la tu si asa
holani sari doduru huda pa soloso;
vaze va soku si asa
meke gele la tu sari lelaṉana,
araha sina ta poni va leana kolo si asa.
6 Doduru kurukuru tapuru pa galegalearane
si tavete dia vori koari na lelaṉana,
doduru kurukuru pinomo pa soloso
si hira pa kauru lelaṉana sa;
doduru butubutu nomadi
si koa aqoro dia koa sa.
7 Na doṉo lea sa tinolava tanisa,
repaha valeana sari lelaṉa,
ura sari karosona si gore pa pepeso
kamo la vasina sapu soku ia na kolo.
8 Sari huda sida pa inuma te Tamasa*Zen 2:9
lopu boka ṉana kamoa,
sari huda paeni
si loke lelaṉadi si gugua tanisa,
sari huda hoborodi
ba lopu kamoi sari lelaṉana sa,
loke huda pa inuma te Tamasa
boka ṉana kamoa sa tinolava tanisa.
9 Arau tavete va leleana ia pude doṉo lea
meke va soku i sari lelaṉana.
Asa sa inokoro tadi doduru huda pa Idini,
sa inuma te Tamasa.
10 Gua ke hiera gua si zama nia Arau Zihova sa Baṉara: Sina nomana meke ululu holani sa sari kaiqa, kamo la gua tu koari na lei, meke sina vahesi pule nia sapu ululu hola si asa gua, 11 ke vala nia Rau si asa koasa baṉara koari na butubutu, pude asa kote va kilasia, luli gua koasa nana tinavete kaleana. Ke veko vata kale ia Rau. 12 Sari tie karovodi sapu kaleadi hola na maho gore nia meke veko pania. Sari vazena si hoqa koari na toqere pa doduru lolomo; sari lelaṉana si hoqa mokuni koari na tabahoara koasa popoa. Doduru butubutu pa popoa pepeso si vura koasa nana aqoro meke veko pania rini. 13 Doduru kurukuru tapuru pa galegalearane si la habotu dia koasa huda hoqana, meke doduru kurukuru pinomo pa soloso si koa dia koari na lelaṉana. 14 Gua ke loke huda pule, kapae pa kolo, si kote ululu va titie pule gua asa, sapu ovulu va kamoni batu dia koari na lei. Loke huda pule sapu kamo va leana i na kolo si kote ululu kamo pule gua asa; doduru arini si kote kamo pa minate, la pa kauruna sa pepeso, koari na tiena sa pepeso, arini pu gore la pa lovu.
15 Hiera gua si zama nia Arau Zihova sa Baṉara: Koasa rane sapu tava lodu gore la si asa pa minate si tamuni Rau sari na bukaha pa kauru pepeso pa tinalotaṉana sa; noso i Rau sari na tototolo meke va popa i Rau sari na ovuku. Koa gua koa sa si opoadumu ia Rau si pa Lebanoni, meke doduru huda pa soloso si harahara palae. 16 Va neneqara i Arau sari na butubutu koasa dugalana sa hinoqa tanisa, totoso va gore ia Rau si asa pa lovu, turaṉae ari kasa pu gore la pa minate. Totosona asa si sari doduru huda pa Idini, pu ele kamo pa minate, si kote tava manoto beto, sari huda ta vizatadi meke leanadi pa Lebanoni, doduru huda sapu koa va leana i na kolo pa kauru pepeso si kote tava manoto. 17 Doduru pu koa aqoro koa sa, sari nana baere koari na butubutu, si somana luli la koasa pa lovu, somana tugo sari kasa pu mate pa vedara.
18 Huda savana pa Idini si boka vari pada atu nia Rau koa goi pa tinolava na linavata? Gua ba agoi tugo ba kote ta turaṉa gore la pa kauru pepeso turaṉae koari na huda pa Idini; kote koa turaṉi gamu sari tie huporo meke arini pu tava mate pa vedara.
Kote gugua asa, se Pero meke sari doduru nana qeto minate, zama vura gua si Arau Zihova sa Baṉara.’ ”