30
Kote Va Kilasia Zihova sa Popoa Izipi
1 Kamo mae koa rau sa zinama te Zihova: 2 “Tuna na tie, mu korokorotae, mamu zama guahe: ‘Hiera gua si zama nia e Zihova sa Baṉara:
Kabo, mamu zama guahe,
“Kei, kote kamo mo sa rane.”
3 Ura sa rane si tata,
sa rane te Zihova si tata,
na rane opoadumu ia na lei,
na totoso tasuna tadi na butubutu.
4 Na vedara si kote mae raza pa Izipi,
meke na tinasigiti si kote kamo koe Itiopia.
Totoso hoqa pa Izipi saripu ta seke,
si kote ta paleke taloa sari tinagotago tanisa
meke sa sinokirae tanisa si kote ta huara palae.
5 Sari pa Itiopia meke Libia, Lidia, meke doduruna sa popoa Arebia, meke sari doduru Qua tinoni pu somana koasa popoa vinariva egoi si kote hoqa turaṉae koe Izipi koasa vedara.
6 Hiera gua si zama nia Arau Zihova:
Sari baere te Izipi si kote hoqa,
sa nana ṉiniraṉira sapu vahesia sa si kote noso.
Podalae pa Miqidoli kamo pa Asavani
si kote hoqa koasa vedara,
zama vura gua si Arau Zihova sa Baṉara.
7 Kote ta huara si arini,
somanae koari popoa ele ta huaradi,
meke sari dia vasileana lavata si kote koa
somanae koari vasileana lavata sapu ivuludi.
8 Pude madi tumae nia sapu Arau tugo se Zihova
totoso sulu ia Rau si pa Izipi
meke doduru pu toka nia si tava mate.
9 Koasa rane asa si kote garunu taloa tie paleke inavoso si Arau pa vaka, la pa Itiopia pude va matagutu ia koasa nana kinoa va leana. Na tinalotaṉa na tinasigiti si kote kamo koa rini pa rane tinahuara te Izipi, ura na kote hinokara kamo sia.
10 Hiera gua si zama nia Arau Zihova sa Baṉara:
Kote va kokoi i Rau sari qeto minate te Izipi
koasa limana e Nebukaneza, sa baṉara pa Babiloni.
11 Asa meke sa nana qeto minate, sapu kaleanana hola koari doduru butubutu,
si kote ta turaṉa mae pude huara ia sa popoa.
Kote lobusu vagi rini sari dia vedara pude raza ia si pa Izipi
meke va siṉi nia tie ta sekedi sa popoa.
12 Kote va popai Rau sari na tototolo pa Ovuku Naelo
meke holuholu la nia koari na tie kaleadi sa popoa;
pa lima dia ri na tie pa votiki popoa
si kote huara ia Rau sa popoa meke sari doduru tiṉitoṉa pa korapana.
Arau Zihova si ele zama.
13 Hiera gua si zama nia Arau Zihova sa Baṉara,
kote huari Arau sari na beku
meke va noso i sari na kineha pa Memipisi.
Lopu kote koa pule ia na koburu tavia si pa Izipi,
meke kote va matagutu ia Rau sa doduruna sa popoa.
14 Kote huaria Rau si pa Izipi Ulu,
sulu pania si pa Zoani,
meke va kilasia si pa Tibesi.
15 Sa Qua tinaṉaziri si kote zoropo la nia Rau pa Pelusimu,
sa popoa ṉiṉirana pa Izipi;
meke va betoa sa tinagotago pa Tibesi.
16 Kote va katu nia nika Rau sa popoa Izipi;
Pelusimu si kote pekutu lamae pa tinasigiti,
Tibesi si kote ta raza meke hoqa pa vinaripera;
meke Memipisi si kote koa matagutu doduru rane.
17 Ari tie vaqura pa Heliopolisi meke Bubasiti
si kote hoqa pa vedara,
meke sari vasileana lavata si kote ta raovo.
18 Kote huporo sa rane pa Tapanesi
totoso moku ia Rau sa ioki d pa Izipi;
vasina kote noso sa nana ṉiniraṉira sapu vahesia sa.
Kote opoadumu ia na lei si asa,
meke sari nana vasileana hitekedi si kote ta raovo.
19 Ke kote va kilasia Rau sa popoa Izipi,
pude madi tumae nia sapu Arau tugo se Zihova.’ ”
Sa Ṉiniraṉira Tanisa Baṉara pa Izipi si Ta Kumata
20 Pa vina manege eke vuaheni, pa sidara kekenu, koasa vina zuapa rane, si kamo mae koa rau sa zinama te Zihova: 21 “Tuna na tie, ele moku ia Rau sa limana e Pero sa baṉara pa Izipi. Lopu ta pusi sa limana pude salaṉa babe ta hade va sigoto pude tuturei ṉiṉira pude taṉini pule vedara. 22 Gua ke hiera gua si zama nia Arau Zihova sa Baṉara: Kana ia Rau se Pero, sa baṉara pa Izipi. Na kote moku betoi Arau sari karua limana, sapu leanana meke sapu ele mokuna, meke va hoqa ia sa vedara pa limana. 23 Kote va talahuarae i Arau sari tie Izipi koari na butubutu meke hurakatae lani koari na pinaqaha popoa. 24 Kote va ṉiṉira i Arau sari limana sa baṉara pa Babiloni meke vekoa sa Qua vedara pa limana sa, ba kote mokui Rau sari limana e Pero, meke kote silava si asa pa kenuna sa nana kana, guana tie bakorana meke tata mate. 25 Na kote va ṉiṉira i Arau sari limana sa baṉara pa Babiloni, ba sari limana e Pero si kote sigoto pa kalina sa. Totoso vekoa Rau sa Qua vedara pa limana sa baṉara pa Babiloni meke seke nia sa pa popoa Izipi, si kote madi tumae nia sapu Arau tugo se Zihova. 26 Kote va talahuarae i Arau sari tie Izipi koari na butubutu meke hurakatae lani koari na pinaqaha popoa. Pude madi tumae nia sapu Arau tugo se Zihova.”