29
Sa Kinorokorotae pa Guguadi ri na Tie pa Izipi
1 Pa vina manege puta vuaheni, pa vina manege puta sidara koasa vina manege rua rane, si kamo mae koa rau sa zinama te Zihova:*Ais 19:1-25; Zer 46:2-26 2 “Tuna na tie, taliri, mamu tia la ia se Pero sa baṉara pa Izipi, mamu korokorotae la ia si asa meke sari doduru pa Izipi. 3 Mamu zama la guahe koasa: ‘Hiera gua si zama nia e Zihova sa Baṉara:
Arau kana igo si agoi Pero, sa baṉara pa Izipi,
agoi si na malivi nomana sapu eko mua pa korapana sa mua ovuku.
Zama guahe si agoi, “Sa Ovuku Naelo si taqarau;
arau telequ tavetia pude na qua.”
4 Ba kote rita nigo vinetuṉu Rau asemu
meke va napiti lani pa kapumu sari igana pa mua ovuku.
Kote kave vura nigo Rau koasa ovuku,
turaṉae sari na igana sapu napiti pa kapumu.
5 Kote la veko pani igo Arau pa qega,
agoi meke sari doduru igana.
Kote hoqa la si agoi pa pezarana
meke loke tie kote atu vagi igo babe pudiki igo.
Kote variponi nigo Rau guana ginani
koari na kurukuru pinomo pa pepeso meke kurukuru tapuru pa galegalearane.
6 Meke doduru pu koa pa Izipi si kote tumae nia sapu Arau tugo se Zihova.*Ais 36:6
Agoi si na kuli sapu na kolu hodu tanisa butubutu Izireli. 7 Totoso saputu vagi igo rini pa lima dia si viqala tu si agoi meke sopele pa ababe dia; totoso kalavarae si arini koa goi, si moku si agoi meke vari sea i mudi dia.*2 Baṉ 18:21
8 Gua ke hiera gua si zama nia Arau Zihova sa Baṉara: Na vedara si kote paleke mae nia Rau koa goi pude va matei sari mua tie na kurukuru made nene. 9 Kote ta evaṉae na popoa ta huarana sa popoa Izipi. Gua pude tumae nia rini sapu Arau se Zihova.
Sina zama guahe si agoi, “Sa Ovuku Naelo si taqarau; na arau tavetia,” gua, 10 Gua ke kana igo Arau si agoi meke sa mua Ovuku Naelo, ke kote iliri ia Arau sa popoa Izipi pude na popoa ta huarana meke loke ginugua leana koa ia, podalae pa Miqidoli kamo pa Asavani, meke seu kamo la pa voloso pa popoa Kusi. 11 Koari ka made ṉavulu puta vuaheni si loke tie babe kurukuru kote ene nuquru ia; meke loke tie tugo kote koa ia. 12 Kote huaria Rau sa popoa Izipi pude mani gua ari na popoa ta huaradi, meke sari nana vasileana lavata si kote koa ta huara meke ivulu ka made ṉavulu puta vuaheni. Meke kote va talahuarae i Arau sari pa Izipi koari na butubutu meke va hurakatae i koari na pinaqaha popoa.
13 Gua ba hiera gua si zama nia Arau Zihova sa Baṉara: Pa vina betona sa made ṉavulu puta vuaheni si kote varigara puleni Arau sari tie Izipi koari butubutu sapu ta hurakatae la si arini. 14 Kote turaṉa pule maeni Arau pa tinaraovo meke va pule lani pa Izipi Ulu, pa popoa tadi tiatamadia. Kote na butubutu baṉara hite mo si asa vasina. 15 Kote asa sa butubutu baṉara hitekena koari doduru meke lopu kaqu va sage pule nia si asa koari kaiqa butubutu pule. Kote va malohoro pani ia Arau si asa meke lopu kaqu ṉati hiniva puleni sa sari kaiqa butubutu pule. 16 Izipi si lopu kaqu raṉe pule ia ari tinoni pa Izireli ba kote va nonoga pule ia Izireli sa dia sinea sapu taliri la si arini koa sa pude hata tinokae koa sa. Meke kote tumae nia rini sapu Arau tugo se Zihova Baṉara.’ ”
17 Pa vina hiokona zuapa vuaheni, pa sidara kekenu koasa rane kekenu, si kamo mae koa rau sa zinama te Zihova: 18 “Tuna na tie, turaṉa la nia e Nebukaneza, sa baṉara pa Babiloni, sa nana qeto minate pa keke vinaripera mamatana pa Taea; doduru batu si golu meke sari avara dia si gulata beto. Ba lopu ta pia si asa meke sa nana qeto minate totoso razaia sa sa popoa Taea. 19 Gua ba hiera gua si zama nia Arau Zihova sa Baṉara: Sa popoa Izipi si kote variponi la nia Rau koe Nebukaneza, sa baṉara pa Babiloni, meke asa kote paleke taloani sari nana tinagotago. Asa kote pudiki meke zalo pania sa popoa, guana tinabara tanisa nana qeto minate. 20 Poni la nia Rau sa popoa Izipi koasa, guana nana pinia koari nana minabo sina tavetavete poni Au sa meke sa nana qeto minate, zama vura gua si Arau Zihova sa Baṉara.
21 Koasa rane asa si kote va ṉiṉira pule ia Rau sa butubutu tie Izireli, meke kote tukelia Rau sa ṉuzumu agoi Izikeli pude ta avoso si agoi koa rini. Pude madi tumae nia sapu Arau tugo se Zihova.”