SA BUKA TE
HAQAI
Sa Vinabakala
Poropita Haqai si koa keke gua pa totoso te poropita Zakaraea. Ari karua sovuti sarini pu puledi pa tinaraovo pude va hokoto ia sa kinuri pulena sa Zelepade te Tamasa. Sa tinavete pa Zelepade si ele podalae tu pa totoso baṉara se Saerasi pa Pesia. Asa va malumu i sari kaiqa tie ta raovodi pa Babiloni pude pule la pa Ziuda meke kuri pule ia sa Zelepade pa Zerusalema. Ba ta qoraqora sa tinavete meke noso si asa. Sipu baṉara hobe se Dariasi pa Pesia si va malumu i sa pude hoda ia sa tinavete koasa Zelepade. Asa sa totoso sapu ta garunu se Haqai pude zama vura ni sari zinama te Tamasa.
Sa buka te Haqai si papakana mo, tata gugua mo te Obadaea, ba sari inavoso tanisa si arilaedi hola. Va bakalia Haqai sa laena sa sineke tinarae meke sa linuli tinarae. Lopu masuru sa pepeso meke lopu nonoga pavei la sari poata sokudi, sina sa Tamasa meke sa Nana vetu si lopu ta galagalae. Ke qaqiri sari tie meke kuri va hokoto ia rini sa Zelepade te Tamasa.
Sa vetu si lopu leleana sisigiti gugua sapu te Solomone ba sa tinolava tanisa pa vugo repere si kote noma hola nia sapu te Solomone, gua sa zinama te Tamasa sapu zama vura nia e Haqai.
Sari Ṉati Pinaqapaqahana sa Buka
Ta garunu koe Tamasa pude ta kuri pule sa Zelepade. Hinia 1:1-15
Inavoso variva manotona meke koa ia na rinoverove. Hinia 2:1-23
1
Na Tinioko Pude Kuri Pulea sa Zelepade
1 Koasa vina rua vuaheni pa binaṉara te Dariasi, pa rane kekenu koasa vina onomo sidara, si kamo la koe Haqai sa poropita sa zinama te Zihova pude tozi lania koe Zerubabele sa tuna koreo e Silitili, sa qavuna pa Ziuda meke koe Zosua sa tuna koreo e Zehozadaki, sa ṉati hiama kenukenue:*Ezr 4:24 kamo hinia 5:2, 6:14
2 Hiera gua si zama nia e Zihova Tadi na Qeto Minate: “Zama guahe sari tie hire, ‘Sa totoso si lopu ele kamo pude kuri ia sa Zelepade te Zihova,’ gua.”
3 Meke kamo la gua koe poropita Haqai sa zinama te Zihova: 4 “Vea, na mia totoso eke mo gamu sia pude koa koari na vetu sapu ta goba va leleana, totoso koa ta huara eko mo sa Zelepade Taqarau hie?” gua si Asa.
5 Ego, hiera gua si zama nia e Zihova Tadi na Qeto Minate: “Viliti va leana i sari mia hahanana, 6 Ele lete va soku si gamu, ba vasinahite mo si paketi gamu. Henahena si gamu, ba lopu boka deṉa. Napo tugo ba lopu pada. Sage poko ba lopu maṉini. Vagi tinabara si gamu ba voi i gamu pa huneke vovoina poata sapu koa i na lopa.”
7 Hiera gua si zama nia e Zihova Tadi na Qeto Minate: “Viliti va leana i sari mia hahanana. 8 Sage la koari na toqere mamu paleke gore mae ni sari na lalabete mamu kuri ia sa Qua vetu, pude Maqu qetu si Arau pa korapana meke tava lavata,” zama gua se Zihova.
9 “Sokudi si balabala i gamu pude vagi, ba vasinahite mo si vura. Sapu paleke mae ni gamu koari na mia vetu si ivu pani Rau. Na vegua?” zama vura gua se Zihova Tadi na Qeto Minate. “Koa gua koasa Qua vetu sapu koa ta huarana eko mo, sipu korapa tupiti taveti gamu sari mia vetu soti. 10 Gua ke, koa gua koa gamu, si kote tuqe pule nia sa galegalearane sari nana ruku meke sa pepeso kote tuqe pule nia sa nana linetelete. 11 Na soṉe si veko la nia Rau koari na pezara na toqere, koari na linetelete, na inuma vaeni, na huda olive, meke nasa pule si vura pa pepeso, koari na tie meke kurukuru, meke koari na tinavete pa lima mia,” gua si Asa.
Va Tabea rina Tinoni sa Ginarunu te Zihova
12 Meke va tabe ia ri Zerubabele sa tuna koreo e Silitili, Zosua sa tuna koreo e Zehozadaki, sa ṉati hiama kenukenue, meke sari doduru ka visavisa tinoni koa holadi sa zinama te Zihova sa dia Tamasa meke sa inavoso te Haqai sa poropita. Ura e Zihova sa dia Tamasa na garunia si asa, meke pamaṉa nia rina tie se Zihova.
13 Meke poni Haqai, sa tie paleke inavoso te Zihova, sa inavoso te Zihova hie koari na tinoni: “Arau korapa koa turaṉa gamu si gamu,” zama vura gua se Zihova. 14 Ke va gevuru ia e Zihova sa maqomaqona e Zerubabele sa tuna koreo e Silitili, sa qavuna pa Ziuda, sa maqomaqona e Zosua sa tuna koreo e Zehozadaki, sa ṉati hiama, meke sari maqomaqodi ri doduru ka visavisa tinoni koa holadi. Ke mae si arini meke podalae tavetavete koasa Zelepade te Zihova Tadi na Qeto Minate, sa dia Tamasa, 15 koasa rane vina hiokona made pa vina onomo sidara koasa vina rua vuahenina sa binaṉara te Dariasid.