3
Sinea meke Hinarupu te Zerusalema
1 Mani talotaṉa sa vasileana lavata sapu siṉia na tie ṉoṉovala,
na tie va karikaridi, na tie seke tinarae meke boni dia hahanana!
2 Lopu va tabe la pa keke tie si asa,
lopu hiva tava toṉoto si asa.
Lopu raṉe la si asa koe Zihova,
meke lopu tata la si asa koasa nana Tamasa.
3 Sari nana palabatu tinavete si guari na laione kurumudi,
sari nana tie varipitui si guari na siki pinomo oviadi,
sapu lopu hoke va bogisi ginani.
4 Sari nana poropita si ṉiṉira hola sa dia vinahesi pule;
na tie sekesekei meke lopu boka ta ronu si arini.
Sari nana hiama si va boni ia rini sa Zelepade
meke luli nia dia hiniva rini sa tinarae te Zihova.
5 Se Zihova sapu koa pa korapana sa si toṉotona;
loke Nana sinea si Asa.
Ninae munumunu si variponi nia Sa sa vinilasa va toṉoto,
meke lopu va hola ia Sa si keke rane vaqura,
ba saripu lopu koa va toṉoto si loke dia kinurekure.
6 Zama se Zihova, “Sari na butubutu si ele seke pani Rau;
sari dia vasidi ṉiṉiradi si ta huara palae.
Sari dia siraṉa si va ivulu pani Rau,
ke loke tie ene nuquri.
Sari dia vasileana lavata si ta huara;
loke tie si kote koa hola, lopu keke hokara.
7 Zama la ia Rau sa vasileana lavata,
‘Hinokara kote pamaṉa Nau agoi
meke kote va tabei goi sari ginegese!’ gua.
Pude lopu ta seke palae sa nana vetu kinoa,
meke lopu kamo la koa sa sari Qua vina kilasa.
Ba korapa ṉiṉira hola tu koa rini
si pude tavete va kaleana koari doduru dia tinavete.
8 Gua ke aqa va leana Nau,” zama vura gua se Zihova,
“koasa rane sapu kote turu sage si Arau meke zutu gamu Rau.
Ele va ego ia Rau pude varigarani sari butubutu,
pude varigarani sari butubutu baṉara
pude Maqu zoropo la nia koa rini sa Qua tinaṉaziri,
sa doduruna sa Qua binugoro ṉiṉirana.
Doduruna sa kasia popoa si kote ta gani va mate
koasa huruṉuna sa Qua kinonokono bugorona.”
Sa Vina Tatarana sa Kinekere
9 Zama pule se Zihova, “Meke tiqe kote va via i Rau sari berudi ri tinoni,
pude boka vahesia ri doduru sa Pozana e Zihova
meke va nabulu varigara la si arini koa Sa.
10 Podalae pa kalina la koari na ovuku pa Itiopia
si arini pu vahesi Au, sari Qua tinoni ta hurakataedi,
si kote mae veko vinariponi koa Rau.
11 Koasa rane asa si lopu kote tava kurekure si gamu
koari doduru sinea sapu tavete maeni gamu koa Rau,
sina kote va rizu i Arau koasa vasileana lavata hie
sarini pu qetuni sari dia vinahesi pule.
Lopu kaqu va titie pule si gamu
koasa Qua toqere hopena.
12 Ba kote veko hola i Arau pa varikorapa mia
saripu koa va pepekae,
arini pu raṉe ia sa Pozana e Zihova.
13 Sari ka visavisa tie koa holadi pa Izireli si lopu kote tavete va kaleana;
loke koha si kote zama nia rini,
loke sinekesekei si kote vura pa ṉuzudia.
Kote hena si arini meke eko dia
meke loke tie kote va matagutu i.”*Rev 14:5
Sa Kinera Qetuqetu
14 Mu kera Zerusalema pa Zaione.
Kukili vura, agoi Izireli!
Mu qetuqetu pa doduruna sa bulomu,
agoi Zerusalema!
15 Ele vagi pania e Zihova sa vina kilasamu agoi,
ele va kekere pule ia Sa sa mua kana.
Se Zihova, sa Baṉara pa Izireli, si koa Nana koa goi;
lopu keketoṉa si kote matagutu pule nia agoi.
16 Pa rane asa si kote zama si arini koe Zerusalema,
“Kei Zaione, mu lopu matagutu si agoi;
lopu va malumi sari limamu pude sigoto guana lima matedi.
17 Se Zihova sa mua Tamasa si koa turaṉigo,
na ṉiṉira hola si Asa pude variharupi.
Kote qetu hola nigo Sa si agoi,
kote va noso igo Sa koasa Nana tataru,
kote vata dogoro nia Sa sa Nana qinetu pa kinerakera.
18 Sari tinalotaṉadi ri na inevaṉa ta vizatadi
si kote va rizu pani Rau koa goi;
na vari mamati si arini meke na kinurekure koa goi.
19 Dotu, pa totoso asa si kote va lipulipu i Rau sari doduru pu tavete va kaleana atu koa gamu;
kote harupi Rau saripu ike
meke varigara ni sarini pu ta hurakatae.
Kote poni vinahesi Arau meke na vina lavata
pa doduru popoa pu tava kurekure si arini.
20 Pa totoso asa si kote varigara ni gamu Arau;
pa totoso asa si kote turaṉa puleni gamu Rau pa mia popoa.
Kote ponini gamu vinahesi Arau meke vina lavata pa vari korapadi ri doduru tiena sa popoa pepeso
totoso poni puleni gamu Rau sari mia tinago
sipu korapa doṉototo mia,”
zama gua se Zihova.