2
Na Tinioko pude Kekere
1 Mi varigara gamu, mi varigara,
agoi na butubutu variva kurekuremu,
2 sipu lopu ele kamo sa totoso ta mutina
meke givusu taloa nia sa rane asa guana duduli popana,
sipu lopu ele kamo atu koa gamu sa binugoro te Zihova,
sipu lopu ele kamo atu koa gamu sa rane tinaṉaziri te Zihova.
3 Mi hata ia se Zihova, doduru gamu pu va pepekae koasa popoa,
pu taveti gua sapu garunu ni Sa.
Hata ia sa tinoṉoto, hata ia sa vina pepekae;
hokara kote tava aqoro si gamu
koasa rane tanisa binugoro te Zihova.
Sa Tinahuara Tadina Popoa pa Pilisitia
4 Qaza si kote ta veko palae
meke Asikeloni si kote ta huara.
Pana korapa rane si kote kokoba sa popoa Asidodi
meke Ekoroni si kote ta rabutu.*Ais 14:29-31; Zer 47:1-7; Izk 25:15-17; Zol 3:4-8; Em 1:6-8; Zak 9:5-7
5 Mi ta lotaṉa si gamu pu koa pa raratana,
kei gamu tie pa Pilisitia;
sa zinama te Zihova hie si raza atu koa gamu,
kei gamu pa Kenani, sa popoa tadi pa Pilisitia.
“Kote huara pani gamu Rau
meke lopu keke si kote koa hola.”
6 Sa popoa pa kali masa, vasina koa sari tie Pilisitia,
si kote na vasina tadi na sepati meke bara tadi na sipi.
7 Kote dia ri ka visavisa tie koa holadi pa butubutu te Ziuda;
vasina kote la kopu sipi si arini.
Pana veluvelu si kote eko dia
pa vetu tadi tie Asikeloni.
Se Zihova sa dia Tamasa kote kopuni;
kote poni pule ni Sa sari dia tinago.
Varipitui La koari Moabi meke Amoni se Zihova
8 Zama se Zihova, “Ele avosi Rau sari vina sisire tadi pa Moabi
meke sari hinegere tadi tie Amoni,
pu va sisire ni sari Qua tinoni
meke hiva la rapati sari dia popoa.*Ais 15:1 kamo hinia 16:14, 25:10-12; Zer 48:1 kamo hinia 49:6; Izk 21:28-32, 25:1-11; Em 1:13-15
9 Gua ke, sapu hinokara gua sapu toaqu si Arau,”
zama vura gua se Zihova Tadi na Qeto Minate, sa Tamasa tadi pa Izireli,
“hinokara sapu Moabi si kote gua sa popoa Sodomu,
Amoni si kote gua sa popoa Qomora,
na vasina sapu duduli mo koa ia, meke na pou soloti,
na vasina sapu kote loke laena ninae rane ka rane.
Sari Qua visavisa tie koa holadi kote la vagi pani sari dia tinago;
saripu koa hola koasa Qua butubutu kote tago hobei sari dia pepeso.”*Zen 19:24
10 Hie si kote vagia rini koasa dia vinahesi pule,
koasa dia vina sisire meke hinegeredi rina tinoni te Zihova Tadi na Qeto Minate.
11 Kote variva matagutu hola se Zihova koa rini
totoso huari Sa sari doduru tamasa koasa popoa.
Sari butubutu pa doduru vasina kote vahesi ia si Asa,
doduru arini pa hopeke dia popoa.
Varipitui La koari Itiopia meke Asiria
12 “Gamu tugo, na tie pa Itiopia,
ba kote ta seke koasa Qua vedara,” gua se Zihova.*Ais 18:1-7
13 Kote nadoro vura la nia Sa sa Limana koari pa kali gede
meke huaria si pa Asiria,
se Ninive sa ṉati vasileana si kote ivulu
meke popa gua pa qega.*Ais 10:5-34, 14:24-27; Nehu 1:1 kamo hinia 3:19
14 Sipi meke bulumakao si kote eko vasina,
sari kurukuru pa doduru kineha mo.
Sari duduru si kote mae tavete vori koari na dedegere vetu.
Pana titioko rini si kote kokodala nuquru koari na vuida,
remoremo patu si kote tukui sari sasada nuquru,
meke sari huda sida sapu gasogasoni si kote ta ṉovala koari na ruku na rimata.
15 Hierana sa vasileana lavata sapu vahesi pule hola nia
sapu koa loketoṉa matagutu nia.
Zama guahe si asa telena,
“Arau mo, meke loketoṉa pule si pa kaliqu rau,” gua.
Namu doṉo hikare toa si asa kamahire,
na putaputana tadi na kurukuru pinomo!
Doduru pu ene hola si hegere
meke hiruni lima dia, na qetu.
*2:4 Ais 14:29-31; Zer 47:1-7; Izk 25:15-17; Zol 3:4-8; Em 1:6-8; Zak 9:5-7
*2:8 Ais 15:1 kamo hinia 16:14, 25:10-12; Zer 48:1 kamo hinia 49:6; Izk 21:28-32, 25:1-11; Em 1:13-15
*2:13 Ais 10:5-34, 14:24-27; Nehu 1:1 kamo hinia 3:19