15
Kote Huaria Tamasa si pa Moabi
1 Hie sa kinorokorotae pa guguana Moabi:* Ais 25:10-12; Zer 48:1-47; Izk 25:8-11; Em 2:1-3; Zepa 2:8-11
Sa vasileana Ara pa Moabi si ta huara;
ta huara pa keke boṉi mo!
Sa vasileana Kira pa Moabi si ta huara;
ta huara pa keke boṉi mo!
2 Sari tie pa Diboni si sage la pa dia zelepade,
pude la kabo koari na dia vasina hopedi.
Kote kaboi rini sari pa Nebo meke Medeba.
Neri va golu sari batu dia pa tinalotaṉa
meke koto palae sari gumi dia.
3 Pa sisiraṉa si va sage poko baika si arini;
pa batu vetu meke koari na varivarigarana pa vasileana si kabo si arini,
meke lukalukana si arini.
4 Sari tie pa Hesiboni meke Eleale si kabo vura,
sa mamalaiṉidi si ta avoso kamo latu pa Zahazi.
Sari na varane pa Moabi ba kabo vura,
na matagutu sari bulodia.
5 Kaboa buloqu si pa Moabi;
sari tiena si govete kamo latu pa Zoara* Loti si govete la pa Zoara pukerane.,
seu kamo latu pa Eqalati Selisia.
Ene sagea rini sa siraṉa la pa Luhiti,
kabokaboi meke ene la;
meke pa siraṉa la pa Horonaimi,
si lukalukana nia rini sa tinasuna tadirini.
6 Sari kolo pa Nimirimi si popa taloa,
meke harahara sari duduli,
sari linetelete si lopu koa,
meke loketoṉa sapu buma si koa hola.
7 Ke sari tinagotago sapu vagi rini meke veko va naqiti
si paleke karovoni rini koasa lolomo tadi na huda Popola.
8 Sa dia kinabo si kokodala lulia sa sa voloso pa Moabi;
sa uui tadirini si kamo latu pa Eqilaimi,
sa dia lukalukana si kamo latu pa Bia Elimi.
9 Sari kolo pa Diboni si siṉi na ehara,
ba lopu ele beto nia Arau sa tinasuna pa Diboni.
Na laione kote hata vagi sari tie pa Moabi sapu govete
meke gua tugo sarini pu koa hola pa popoa.
*15:1 Ais 25:10-12; Zer 48:1-47; Izk 25:8-11; Em 2:1-3; Zepa 2:8-11
*15:5 Loti si govete la pa Zoara pukerane.