1 Kamo koa rau sa zinama te Zihova:*Zer 49:1-6; Izk 21:28-32; Em 1:13-15; Zepa 2:8-11 2 “Tuna na tie, taliri, mamu tia la pa Amoni, mamu korokorotae la i. 3 Zama la guahe koa rini: ‘Mi avosia sa zinama te Zihova Baṉara. Hiera gua si zama nia e Zihova sa Baṉara: Sina qetu si goi totoso tava boni sa Qua Zelepade, meke totoso ta huara gore sa popoa pa Izireli, meke totoso dogori gamu ta raovo sari tie pa Ziuda, 4 gua ke kote valani gamu Rau pude na tinago tadi na butubutu pa kali gasa rimata. Kote mae si arini meke tavete dia kinoa meke va turu ipi pa vari korapa mia; kote henai rini sari mia vuvua meke napoi sari mia meleke. 5 Sa vasileana lavata pa Raba, si kote evaṉae na popoa duduli tadi kameli meke sa popoa Amoni si kote na magomagogosoana tadi na sipi. Pa totoso asa kote tumae nia gamu sapu Arau tugo se Zihova. 6 Ura hiera gua si zama nia Arau Zihova sa Baṉara: Sina popohara ni goi sari limamu meke puza nia nenemu pa pepeso, na qetu sisigiti si goi sina kana ia goi sa popoa Izireli, 7 ke kote nadoro atu nia Rau sa Limaqu koa goi meke variponi nigo guana vinagi pa vinaripera koari na butubutu. Kote kumata pani igo Arau koari na butubutu meke va murimuri pani igo koari na pinaqaha popoa. Kote huara pani igo Rau, pude mamu tumae nia sapu Arau tugo se Zihova.’ ”

8 “Hiera gua si zama nia e Zihova sa Baṉara: ‘Sina zama guahe sari pa Moabi meke pa Seira, “Doṉo la, sa butubutu baṉara tadi pa Ziuda si kamahire si ta evaṉae gugua mo sari doduru butubutu,” gua.*Ais 15:1 kamo hinia 16:14, 25:10-12; Zer 48:1-47; Em 2:1-3; Zepa 2:8-11 9 Ke kote ta rapata sari vasileana te Moabi pu koa pa voloso, sari popoa tolavaedi, sari Beti Zesimoti, Beolo Meoni, meke Kiriataimi. 10 Kote variponi nia Rau sa popoa Moabi turaṉae nia sa popoa Amoni, la koari pa kali gasa rimata pude na dia tinago, pude lopu kaqu ta balabala pule sa popoa Amoni koari na butubutu baṉara, 11 meke kote tava kilasa koa Rau sa popoa Moabi. Pude madi tumae nia sapu Arau tugo se Zihova.’ ”

12 “Hiera gua si zama nia Arau Zihova sa Baṉara: ‘Sina tubehe se Edomu koa sa butubutu Ziuda meke sina sea si asa totoso tavete gua asa si asa,*Ais 34:5-17, 63:1-6; Zer 49:7-22; Izk 35:1-15; Em 1:11-12; Obd 1-14; Mal 1:2-5 13 gua ke hiera gua si zama nia Arau Zihova sa Baṉara: Kote va nadoro la nia Arau sa limaqu koa sa popoa Edomu meke va matei sari nana tie meke na kurukuru made nene. Kote huara ia Rau, meke podalae pa Temani kamo pa Dedani si kote mate pa vedara si arini. 14 Kote tubehe ia Rau si pa Edomu pa limadi ri na qua tinoni pa Izireli. Arini kote tavete la nia koa sa popoa Edomu gua sapu goto pa Qua binugoro meke tinaṉaziri; madi tumae nia arini sapu Arau si tubehe, zama vura gua si Arau Zihova sa Baṉara.’ ”

15 “Hiera gua si zama nia Arau Zihova sa Baṉara: ‘Sina sari pa Pilisitia si va kanakana la koe Ziuda meke va tubehe la pa tinaṉaziri, meke na seunaena sa dia hiniva pude va huara pania si pa Ziuda,*Ais 14:29-31; Zer 47:1-7; Zol 3:4-8; Em 1:6-8; Zepa 2:4-7; Zak 9:5-7 16 gua ke hiera gua si zama nia Arau Zihova sa Baṉara: Nama si Arau pude nadoro la nia sa limaqu koari pa Pilisitia. Kote va matei Rau meke huara pani sari pu koa hola koasa raratana. 17 Kote tavete vura nia Rau sa vina tubehe nomana koa rini meke va kilasi koasa Qua tinaṉaziri. Pude madi tumae nia totoso tubehe si Arau koa rini, sapu Arau tugo se Zihova.’ ”