47
Sa Kinorokorotae pa Guguana Pilisitia
1 Hiera sa zinama te Zihova sapu kamo mae koe Zeremaea sa poropita pa guguadi ari pa Pilisitia sipu lopu ele rapatia Pero si pa Qaza:* Ais 14:29-31; Izk 25:15-17; Zol 3:4-8; Em 1:6-8; Zepa 2:4-7; Zak 9:5-7
2 Hiera gua si zama nia e Zihova:
“Doṉo la, na kolo si korapa mae gua pa kali gede;
kote meke ta evaṉae na naqe ṉiṉirana sia.
Kote ene betoa sa sa popoa meke sari doduru tiṉitoṉa vasina,
sari vasileana meke sarini pu koai.
Sari tie si kote kabo vura;
doduru pa popoa si kote uui,
3 koasa mamalaiṉi nene hose haqaladi,
sa vevehedi rina totopili varipera
meke sa qaleṉana tadi na totopili.
Sari tiatamadia si lopu kote taliri pude tokani sari dia koburu;
na kote malohoro sari limadia pa minatagutu.
4 Ura sa rane si ele kamo
pude kote ta huara sari doduru pa Pilisitia
meke va mate pani saripu lopu ele mate
saripu kote hiva la tokani sari pa Taea meke Saedoni.
E Zihova si va nama pude huara pani sari pa Pilisitia,
sari ka visavisa koa holadi koasa raratana pa nusa Kiriti.
5 Qaza si kote neri va golu pa tinalotaṉa;
Asikeloni si kote lopu vevehe.
Kei, gamu ka visavisa pu koa hola mia pa pezara,
vea seunae gua si kote kuliusu si gamu?
6 ‘Kei, na vedara te Zihova,’ kabo gua si gamu,
‘Totoso sa si kote magogoso si goi?
Pule la koasa mua vovoina;
mamu noso.’
7 Ba vegua meke kote magogoso sia
totoso e Zihova tu na garunia,
totoso Asa tu na tozi nia
pude rapatia si pa Asikeloni meke arini pu koa pa raratana?”