3
Kaqu Pitui Tamasa sari na Butubutu
Zama se Zihova, “Koasa totoso tu asa sipu vala pule nia Rau sa minamutu pa Ziuda meke pa Zerusalema,
si kaqu varigara ni Rau sari doduru butubutu,
meke kaqu turaṉa lani Rau koasa Lolomo Vinaripitui te Zihova.
Vasina si kaqu va kilasi Rau si arini koari doduru tinavete kaleadi pu tavete lani rini koari na Qua tie.
Ele talahuarae lamae sari na tie Izireli pa votiki popoa,
meke va hihia ia rini se Izireli sa Qua pepeso.
Mudumudukeda si arini pude gilania sapu esei si kaqu vagi sari na tie ta raovodi gua.
Holuholu ni rini sari na koreo na vineki pa tinapusi,
meke sari na poata vagi rini si pude holui na tabarani sari na maqota, meke la pa ninapo vaeni.
 
Gamu pa Taea meke Saedoni, meke doduruna sa pinaqaha popoa Pilisitia, na sa si korapa podekia gamu pude tavete mae nia koa Rau? Korapa podekia gamu pude tabara Nau keketoṉa si Rau? Be gua asa si gamu, kaqu tuture tabara hobe pule atu si Rau!* Ais 14:29-31, 23:1-18; Zer 47:1-7; Izk 25:15 kamo hinia 28:26; Em 1:6-10; Zepa 2:4-7; Zak 9:1-7; Mt 11:21-22; Lk 10:13-14 Ele paleke taloani gamu sari Qua siliva na qolo meke paleke lani tugo gamu koari na mia zelepade sari Qua tinagotago. Ele turaṉa taloani gamu sari na tie Izireli, meke Zerusalema seu pa dia popoa soti meke holuholu ni koari na tie Quriki d. Ba kamahire si kaqu turaṉa vura puleni Rau si arini koa sa vasina sapu holuni gamu rini. Kaqu tavete atunia Rau koa gamu gua sapu tavete la nia gamu koa rini. Kaqu va malumi Rau sari na tumia koreo na vineki pude ta holuholue koari na tie Ziuda; meke kaqu ta holuholue pule si arini koari na tie Sabeani pa vasina seudi pa Arebia d. Arau Zihova zama nia si hie.
Mi tozi vura nia sa inavoso hie koari na votiki butubutu:
‘Va namanama pude varipera;
tioki sari mia tie varane;
varigarani sari doduru mia tie varipera,
mamu ene la!
10 Taveteni magu varipera sari na mia tiṉitoṉa geligeliana pepeso,* Ais 2:4; Mka 4:3
meke sari na mia kotokotoana lelaṉa si mi taveteni hopere.
Meke saripu malohorodi ba kaqu somana varipera tugo.
11 Mi tuturei mae, gamu doduru butubutu pu koa lamae,
meke varigara koasa lolomo.’ ”
Ke Zihova, Mu garunu gore mae nia sa Mua qeto minate.
Mamu rapati si arini.
12 “Kaqu va namanama sari doduru butubutu, madi mae koasa Lolomo tana Vinaripitui.
Meke Arau, Zihova si kaqu habotu meke pitui sari doduru butubutu pu koa pa vari likohae.
13 Toleṉe gua kaleadi sisigiti si arini;* Rev 14:14-16,19-20, 19:15
seke gunini gedi na huiti pa totoso pakepakete,
munali gedi guana qurepi sapu ta muzara va napere osolae totolo vura mae sa vaeni.”
14 Tina na tina si ele koa koasa Lolomo Vinaripitui.
Gua asa ke sa rane te Zihova si lopu sana kaqu mae vasina.
15 Sa rimata meke sa sidara si kaqu tava huporo,
meke lopu kaqu pelara sari na pinopino.
Kaqu Manani e Tamasa sari Nana Tie
16 Velavela vura mae gua pa Toqere Zaione se Zihova* Em 1:2
velavela guana laione,
pidala guana paka maṉauru sa mamalaiṉina pa Zerusalema,
tarazuzu sa pepeso meke sa maṉauru.
Ba kaqu lavelave hukatani Sa sari Nana tie.
17 “Meke agoi, Izireli, kaqu gilania goi sapu Arau se Zihova sa mua Tamasa.
Koa si Arau pa Zaione, sa Qua toqere hopena;
Zerusalema si kaqu na vasileana hopena,
meke sari na votiki butubutu si lopu kaqu boka va kilasa pulea si asa.
18 Pa totoso asa sari na toqere si kaqu tale inuma vaenidi mo,
meke sari na rovana bulumakao, sipi, na qoti, si kote ta dogoro pule pa doduru toqere.
Kaqu ruku si asa pude sari na tototolo koa koari na lolomo popadi pa Ziuda.
Keke leana si kaqu totolo vura mae pa Zelepade te Tamasa,
kaqu va koloa sa sa Lolomo Akasia.
19 Izipi si kaqu ta ilirae na qega,
meke Edomu si keke vasina ta huara va inetena,
sina rapatia rini sa popoa Ziuda,
meke va matei rini sari na tie loke dia ginugua vasina.
20-21 Kaqu hobei Rau saripu ele mate;
kaqu va kilasi Rau sari na tie kaleadi.
Ba Ziuda meke Zerusalema si kaqu koa hola ninae rane,
meke Arau Zihova si kaqu koa pa Toqere Zaione,” gua si Asa.

*3:4 Ais 14:29-31, 23:1-18; Zer 47:1-7; Izk 25:15 kamo hinia 28:26; Em 1:6-10; Zepa 2:4-7; Zak 9:1-7; Mt 11:21-22; Lk 10:13-14

*3:10 Ais 2:4; Mka 4:3

*3:13 Rev 14:14-16,19-20, 19:15

*3:16 Em 1:2