23
Sa Kinorokorotae pa Guguana Taea
1 Hie sa kinorokorotae pa guguana Taea:* Izk 26:1 kamo hinia 28:19; Zol 3:4-8; Em 1:9-10; Zak 9:1-4; Mt 11:21-22; Lk 10:13-14
Mi taruqoqo gamu na tie pu koa pa vaka pa Tasisi!
Ura ta huara sa vasileana pa Taea
meke sa popoa tana vaka si ta huara meke lopu keke vetu si koa hola,
meke loke sigotoana si koa hola.
Totoso kekere pule maedi pa nusa Saeparasi sari vaka si kamo sa inavoso.
2 Mi lopu kulu, gamu pu koa pa nusa
meke gamu tie holuholu pa Saedoni,
pu va tagotago gamu ari na tie ene holuholu pa vaka.
3 Koari na kolo lamana
mae gua sari kiko huiti pa Izipi;
saripu ta pakete vagi pa taqele Ovuku Naelo si na poata tadi pa Taea,
meke ta evaṉae na vasina holuholuana si asa tadi soku butubutu.
4 Kei Saedoni, mu kurekure.
Sa kolo lamana sapu poza luli koasa tamasa ṉiṉira tamugamu
sapu raṉea gamu guana tamamia meke tinamia,
si hakohakoni gamu sa,
ura sa kolo lamana asa si ele zama:
“Arau si loke tuqu,
loke tuqu koreo babe vineki.”
5 Pana kamo sa inavoso pa Izipi pa guguana Taea,
si kote hodahodaka si arini meke talotaṉa.
6 Mi karovo la pa Tasisi;
mi taruqoqo gamu na tinoni pa nusa.
7 Vea, Taea tugo sa vasileana nomana sapu koa qetuqetu lamo,
sa vasileana pukeranena hola,
sapu garunu taloa tie pa seu,
meke la veko kinoa pa popoa seudi?
8 Tesei sa hiniva hie si pude huaria si pa Taea,
sa popoa sapu va turui sari soku butubutu binaṉara,
sapu sari nana tie holuholu pa popoa seu si guana koburu tavia,
ta gilanadi koari na popoa pa pepeso?
9 E Zihova Tadi na Qeto Minate va nama nia si hie,
pude va kokoi ia sa tinolava tanisa vinahesi pule,
meke pude va pepekae i sarini pu ta gilanadi pa popoa pepeso.
10 Gamu pa Tasisi, la mamu tavete inuma nomadi gua ari inuma pa Izipi,
sina sari na vaka si lopu kaqu suraṉa mae ni sari ginani koa gamu.
Ura ele ta huara si pa Taea.
11 E Zihova si nadoro vura la nia Sa sa limana koasa kolo lamana
meke va matagutu neneqara i Sa sari na butubutu koasa popoa pepeso.
Ele vala nia Sa sa zinama pa guguana Ponisia,
sapu sari nana vasileana ta gobadi na ṉiṉiradi si kote ta huara beto!
12 Zama si Asa, “Kokoi mo sa mia qinetuqetu,
kei, na vasileana lavata pa Saedoni, kamahire si hoqa huara inete nigo!
Tekulu sage, mi karovo la pa Saeparasi,
ba vasina ba loke binule si kote vagia gamu.”
13 Mi doṉo la koasa popoa tadi na tie pa Babiloni,
sari tie sapu kamahire lopu koa beto!
Ari pa Asiria tavete guni nia asa,
na vasina tadi na kurukuru pa qega;
va turu i rini sari dia rogaroga ululudi tana rapata karovo goba,
meke huari sari dia goba ṉiṉiradi,
meke iliri nia remoremo rini sa vasileana lavata.
14 Mi taruqoqo gamu pa vaka pa Tasisi;
sa mia vasileana ta gobana si ele huara!
15 Pa totoso asa si sa popoa Taea si kote ta muliṉae ka zuapa ṉavulu puta vuaheni. Padana sa doduru tinoa tanisa keke baṉara si asa. Ba pa vina betona ka zuapa ṉavulu puta vuaheni, si kote ta evaṉa koe Taea, gua sapu pa kinera tanisa barikaleqe tuturue:
16 “Mu taṉini vagia sa mike, mamu ene nuquria sa vasileana lavata,
agoi sa maqota ta muliṉaemu;
mu lopilopi valeana nia sa mike, mamu kerani soku kinera,
pude ta balabala vagi pule si agoi.”
17 Pa vina betona ka zuapa ṉavulu puta vuaheni, si kote va tana va leana pule ia Zihova sa Taea. Kote la holuholu pule nia si asa koasa nana tinavete holuholu likakalae sapu doṉo guana tinavete tana maqota meke kote na tuturue si asa koari doduru butubutu pa popoa pepeso. 18 Gua ba, sari poata vagi sa meke sari nana tinabara si kote ta veko vata kale pude te Zihova. Lopu kaqu tava naqiti si arini babe ta tome. Sari poata taveti sa si kote ta vala koarini pu koa pa kenuna e Zihova, pude holuni ginani rini meke poko arilaedi.