22
Sa Kinorokorotae pa Guguana Zerusalema
1 Hiera sa kinorokorotae pa guguana Zerusalema, sa Lolomo Tanisa Dinogodogorae.
Na sa si korapa ta evaṉa?
Na vegua ke haqala la pa batu vetu sari doduru tie?
2 Agoi na vasileana sapu sokua na vevehe,
agoi na vasileana nomana sapu siṉia na ṉoveoro.
Sari na mua tie matedi si eko doduru vasina,
ba lopu mate pa vedara babe pa vinaripera si arini.
3 Doduru mia koimata si govete pa keke totoso;
ta zau vagi si arini sipu lopu ele ta gonae pa keke tupi.
Doduru si ta vagi varigara, na dia boso,
na govetedi sipu korapa mae tu pa seu sari kana.
4 Gua ke zama si rau, “Mi taliri va seu koa rau;
pude maqu kabo na kuliusu ni.
Lopu podekia pude va manotau
koasa tinasuna tadi na qua tinoni.”
5 Sa Baṉara, se Zihova Tadi na Qeto Minate,
si koa keke Nana rane sapu variva matagutu, variva nunala meke variva holoqoruna
koasa Lolomo Tanisa Dinogodogorae,
na rane pude ta huara gore sari goba
meke pude kabo va ululae koari na toqetoqere.
6 Sari tie pa Elami si vagi sari dia vovoina tupi,
meke sari dia totopili varipera na hose;
sari tie pa Kiri si namai sari dia lave.
7 Sari na lolomo masurudi pa Ziuda si siṉi na totopili varipera,
meke sari tie koi pa hose si turu nama koari na sasada koasa goba pa Zerusalema.
8 Sa ṉiniraṉira te Ziuda pude toketoke nia sa popoa si ta vagi palae.
Koasa rane asa si doṉo hata si gamu
hata tiṉitoṉa varipera pa vetu baṉara ta pozae na Vetu Hudahuda pa Lebanoni;
9 dogoria gamu sapu sa vasileana nomana te Devita
si ta hivae pude ta tuvaka sa goba pa soku vasidi;
meke va naqiti kolo koasa Kopi Kali Gore si gamu.
10 Ele nae i gamu sari na vetuvetu pa Zerusalema
meke huara pani gamu si kaiqa vetu pude tuvakia sa goba koari na patu arini.
11 Tavetia gamu sa kopi pude va naqiti kolo pa vari korapadi ri karua goba
pude tanisa kolo sapu mae guana koasa kopi koana,
ba gamu si lopu hite doṉo la koasa Tamasa pu tavetena,
babe tepa tinokae koa Sa pu balabala va namai si hire pukerane la tu.
12 Sa Baṉara, se Zihova Tadi na Qeto Minate,
si tioko gamu koasa rane asa
pude mi kabo na lukalukana,
pude neri sari batu mia meke va sage poko baika.
13 Ba doṉo la, na hegehegere meke qetuqetu tu si arini,
va mate bulumakao na sipi,
meke korapa henahena meke napo vaeni!
Zama si gamu, “Mada henahena meke napo,
ura na kote mate mo si gita vugo!”*1 Kor 15:32
14 E Zihova Tadi na Qeto Minate telena va avoso nau si hie pa taliṉaqu: “Sa sinea hie si lopu kaqu ta leoso nia gamu osolae kamo sa rane sapu mate si gamu,” gua sa Baṉara, se Zihova Tadi na Qeto Minate.
Na Vina Balau te Sebana
15 Hie si zama nia sa Baṉara, se Zihova Tadi na Qeto Minate:
“La, mamu tozi nia sa tie kopu,
se Sebana, pu kopu nia sa vetu baṉara:
16 Na sa si tavetia goi tani meke esei poni nigo vina malumu
pude gelia sa mua lovu,
meke tavetia sa mua magomagogosoana koasa patu pa kali toqere hie?
17 Mu va balau, na tie arilaemu si goi, ba nama saputu vagi igo e Zihova si agoi
meke buli taloa nigo.
18 Kote molomoloe nigo Sa guana bolo
meke gona la nigo Sa pa keke popoa lavata.
Vasina kote la mate si goi
meke vasina kote la koa sari mua totopili varipera arilaedi,
na variva kurekuremu si goi koari na nabulu tanisa baṉara.
19 Kaqu va rizu igo Arau koasa mua tuturuana,
meke kote tava beto si agoi koasa mua tinavete.
20 Koasa rane asa si kote tiokia Rau sa Qua nabulu, se Eliakimi sa tuna koreo e Hilikaea. 21 Kote va poko nia Rau sa mua poko tinavete
meke vala nia koasa sa mua tinavete meke ṉiniraṉira.
Kote na tamadia rini si asa, arini pu koa pa Zerusalema meke koasa binaṉara pa Ziuda.
22 Kote va hakea Rau pa avarana sa vidulu*Sa vidulu hie si na ṉiniraṉira sapu vagi sa koasa Baṉara pude vilavilasa, viliviliti, na pitui pa tinavete tanisa baṉara. Mi tiro la i sari vesi Rev 3:7; 1:18; MT 16:19. pa binaṉara te Devita;
sapu tukelia sa si loke tie kote boka tuku pule ia,
meke sapu tukua sa si loke tie kote boka tukelia.
23 Kote va soto la nia Rau pa keke vasina nabuna si asa, guana poka pa gobagoba,
kote na habohabotuana variva pamaṉana pa vetu tanisa tamana.
24 Doduru inarilaena tanisa nana tatamana si kote ta dogoro koasa;
kote sigoto koa sa, guana raro na besini sapu sigoto koasa poka.”
25 Zama se Zihova Tadi na Qeto Minate,
“Koasa rane asa, sa poka sapu tava soto va nabu koasa goba si kote ta lobusu vura;
si kote ta daku vura si asa meke kote hoqa,
meke doduru pu sigoto koasa si kote hoqa ilasa ni,” gua se Zihova.