1 Pa rane kekenu koasa sidara, koasa vina manege eke vuahenina sa mami tinaraovo, si zama mae koa rau se Zihova:*Ais 23:1-18; Zol 3:4-8; Em 1:9-10; Zak 9:1-4; Mt 11:21-22; Lk 10:13-14 2 “Tuna na tie, sina zama guahe sari pa Taea pa guguana Zerusalema, ‘Ego, kamahire sapu eko ta huara sa popoa Zerusalema ke arau si kote tagotago, sa sasada la koari na butubutu si ta huara, meke sari tukutukuna si ele tukele mae koa rau. 3 Gua ke hiera gua si zama nia Arau Zihova sa Baṉara: Kei Taea, Arau kana igo si goi, meke kote turaṉa va soku mae butubutu si Rau koa goi, kote kekeṉoṉo gua sa kolo lamana sapu turaṉa va kamo soku bogusu. 4 Kote huari rini sari gobana sa vasileana pa Taea meke daku goreni sari nana vetu hakehakei ululudi; kote sara pani Arau sari na remoremo pude na patu mo sa doduruna sa popoa. 5 Kote na nusa patu si asa vasina, pude va neve vaqara habu si asa, ura Arau si ele zama, zama vura gua si Arau Zihova sa Baṉara. Kote na dia vinagi ari tie varipera tadi na butubutu si asa. 6 Meke sari vasina veko kinoa rini pa raratana popoa si kote na vedara la raza i. Gua pude tumae nia rini sapu Arau tugo se Zihova.

7 Ura hiera gua si zama nia Arau Zihova sa Baṉara: Pa kali gede kote turaṉa mae nia Rau koe Taea se Nebukaneza, sa baṉara pa Babiloni, sa baṉara tadi na baṉara, meke sari nana hose na totopili varipera, sari tie koi pa hose meke na qeto minate nomana. 8 Arini si kote tuqe vedara meke atu huari sari vasileana pa raratana pu koa i gamu; tinavete nama rapata si kote tavete atuni rini, tomotomo la pepeso pa kali goba pude haele nuquru pa korapana, meke ovulu sage dia lave pude raza atu gamu. 9 Asa kote totolini sari na dekuru nomadi pude huara i sari sasada pa goba meke turaṉae dia tiṉitoṉa varipera si kote va hoqai rini sari na vetu hakehakei ululudi na ṉiṉiradi. 10 Sari nana hose si kote soku hola ke kote tale kavurumu si goi. Sari mia goba si kote madidiri koari vevehedi ri hose varipera, totopili susuraṉana meke totopili varipera totoso nuquru si asa koasa mia sasada, gua ri tie sapu nuquru gua koari na lopa pa goba. 11 Sari nenedi rina hose kote haqala betoi sari doduru mua siraṉa; kote va matei sa sari mua tie meke sari mua dedegere ṉiṉiradi si kote va hoqa gorei rini pa pepeso. 12 Kote vagi pani rini sari mua tinagotago meke paleke taloani sari mua likakalae arilaedi; kote va hoqa goreni rini sari mua goba meke huari sari mua vetu leleadi meke gona lani pa kolo hokara sari na patu, na labete, meke sari remoremo. 13 Kote va nosoa Rau sa kera va vevehe tamugoi, meke sa lopi hapu si lopu kote ta avoso pule.*Rev 18:22 14 Kote tavete igo Arau pude na patu mo si agoi, vasina pude la neve vaqara sari tie habu. Lopu kote ta kuri pule si agoi, ura Arau Zihova si ele zama,’ zama vura gua se Zihova sa Baṉara.”

15 Hiera gua si zama la nia e Zihova sa Baṉara koa sa vasileana pa Taea: “Vea lopu kote neneqara na holoqoru sari popoa pa raratana koasa vevehena sa hinoqa tamugoi, totoso silava sari tie bakoradi meke na eoṉo si ta evaṉa koa goi? 16 Kote gore koari dia habohabotuana baṉara sari na koburu tavia pa raratana, veko pani dia poko hade tolavaedi meke va gorei sari dia poko sapu ta piti va sari koari lozi leleadi. Kote pokopoko nia rini sa minatagutu meke habotu pa pepeso, neneqara eko mo meke kote holoqoru nia rini sa hinoqa tamugoi.*Rev 18:9-10 17 Meke kote kabo si arini pa guguamu agoi meke zama atu guahe koa goi:

19 Hiera gua si zama nia Arau Zihova sa Baṉara: Totoso guni nigo Arau na vasileana lavata ta huarana, gugua ari na vasileana lavata sapu loke tie koa i, meke totoso va kamo atui Arau sari na bogusu pa lamana meke puzaka atu koa goi sari kolona, 20 si kote turaṉa gore la nigo Arau si agoi koa rini pu ele gore la pa minate, la somanani sarini pu pukeranedi. Kote va koa igo Arau pa kauruna sa popoa pepeso, koari popoa ta huaradi pukerane, koa rini pu ele gore la pa vasina tadi tie matedi, meke lopu kote pule mae si agoi babe vagia mua lolomo koari tie toadi. 21 Kote va kamo nigo Arau pa keke minate kaleanana hola meke lopu kote koa si agoi. Kote hata igo rini ba lopu kote dogoro pule igo, zama vura gua si Arau Zihova sa Baṉara.”*Rev 18:21