2
Sa Binule Loke Vina Betona
(Maika 4:1-3)
Hie si va dogoro nia sa Tamasa koe Aisea sa tuna Emosi pa guguana sa butubutu Ziuda meke sa popoa Zerusalema:
Koari na rane mumudi,
sa toqere vasina turu sa Zelepade te Zihova si kote ta evaṉae,
na ṉati toqere si asa koari doduru;
na kote ululu holani sa sari na toqere.
Soku butubutu si kote totolo la vasina, pude la vahesi.
Soku tie si kote la vasina meke zama,
“Aria, mae mada sage la koasa toqere te Zihova,
koasa vetu tanisa Tamasa te Zekopi.
Kote va tumatumaeni gita Sa sari Nana hiniva,
pude mada ene luli sari Nana siraṉa.”
Sa tinarae si kaqu vura gua pa Zaione,
meke sa zinama te Zihova si kaqu mae gua pa Zerusalema.
Kaqu varipitui ni Sa sari na butubutu lavata,
meke kaqu variva toṉoto ni Sa sari na ninominomi tadi soku ṉavulu tie.* Zol 3:10
Kote tavetavete ni rini sari dia vedara pude geli ni pepeso rini pude lelete,
meke sari dia hopere si pude evaṉae na magu kotokotoana lelaṉa huda vaeni.
Na butubutu si lopu kaqu varipera la koasa keke butubutu,
babe padaraku aqa nia sa vinaripera.
 
Mae, gamu na tutina e Zekopi,
mada ene pa korapana sa kalalasa te Zihova!
Saripu Vahesi Puleni si Kaqu Tava Kilasa
Ura e Zihova si ele veko pani sari Nana tinoni,
sari na tie pa tutina Zekopi!
Na siṉi i na vina hinokara tadi pa kali gasa rimata;
hoke tavetavete potana, babe hata tinokae koari na tomate gugua ari pa Pilisitia,
meke baere i rini sari tie vahesi beku.
Sa dia popoa pa Izireli si siṉia na siliva meke qolo,
loke vina betona sa dia tinagotago.
Sa dia popoa si siṉia na hose,
meke loke vinabetodi sari na dia totopili varipera.
Sa dia popoa si siṉia na beku;
vahesi rini sari tiṉitoṉa taveti rini pa limadia,
pa kakarutudi tavete ni rini.
Ke sa tie si kaqu tava pepekae
meke sari tinoni si kaqu kurekure;
Mu lopu taleosoni.
 
10 Kote ṉame nuquru la pa bae koari na toqere,
la tome pa korapa pepeso si arini,
pude tome nia sa tinaṉaziri te Zihova
meke sa ṉinedala variva magasana tanisa Baṉara.* Rev 6:15; 2 Tes 1:9
11 Sari matana sa tie doṉo pule nia si kote tava kurekure
meke sa vinahesi pule tanisa si kote tava pepekae;
e Zihova eke mo si kaqu tava lavata pa rane asa.
 
12 Koa nana sa rane te Tamasa Tadi na Qeto Minate
pude va kilasi sarini pu vahesi puleni meke doṉo va sage puleni,
meke va pepekae i sarini pu va ululu puleni.
13 Kote maho goreni Sa sari doduru huda sida ululudi pa Lebanoni,
meke sari doduru huda oaku nomadi pa Basani.
14 Kote va memehi Sa sari doduru toqere,
meke sari na toa ululudi.
15 Kote daku goreni Sa sari doduru vetu hakehakeina ululudi
meke sari doduru goba vari likohae pa vasileana.
16 Kote va lodu pani Sa sari doduru vaka ene holuholu,
meke doduru vaka leleadi.
17 Sa vina titie tana tie si kote tava gore palae,
meke sa vinahesi pule tana tie si kote tava pepekae.
E Zihova eke mo si kote tava ovulu sage koasa rane asa,
18 meke sari doduru beku si kote lopu koa beto.
 
19 Pana kamo se Zihova pude niu ia sa popoa pepeso,
si kote ṉame nuquru pa pou pa korapa pepeso sari Nana kana.
Kote tome nia rini sa tinaṉaziri te Zihova
pa korapa bae pa kali toqere,
pa minatagutu si kote tome nia rini sa ṉinedala variva magasana tanisa Baṉara.
20 Koasa rane vinaripitui asa si kote gona pani rini
la koari na kurezu na veke
sari dia beku siliva na qolo
saripu taveti rini teledia pude vahesi i.
21 Kote govete nuquru la pa korapa bae si arini,
la tome koari na patupatu pa kali toqere.
Kote podekia rini pude tome nia sa tinaṉaziri te Zihova
meke sa ṉinedala variva magasana tanisa Baṉara
pana gasa si Asa pude niu ia sa popoa pepeso.
 
22 Noso, lopu veko la nia sa mua rinaṉeraṉe pa tie,
ura na tie mo si asa pu siṉo nia mo isuna.
Na sa sa laena sa tie?

*2:4 Zol 3:10

*2:10 Rev 6:15; 2 Tes 1:9