24
Sa Raro Nanarana
1 Koasa vina manege puta rane, koasa vina manege puta sidara pa vina sia vuaheni, si kamo mae koa rau sa zinama te Zihova: 2 “Tuna na tie, kubere gore nia sa rane ṉinoroi, sa rane hokara mo hie, sina koasa rane hie si rapatia sa baṉara pa Babiloni sa vasileana pa Zerusalema.* 2 Baṉ 25:1; Zer 52:4 3 La vivinei nia sa parabolo hie koasa butubutu va karikarina hie: ‘Hiera gua si zama nia e Zihova sa Baṉara:
Va hake ia sa raro; va hake la nia pa nika
mamu va siṉi nia vasi kolo.
4 Voi la nia pa korapana sari minagumagu masa,
doduru masa ta vizatadi, pa nene meke avara.
Va siṉi nia susuri arilaedi tugo;
5 vagia sa sipi nobokona.
Sutuṉu va leana nia huda sa raro;
va qototo ia,
mamu raro i sari na susuri.
6 Ura hiera gua si zama nia Arau Zihova sa Baṉara:
Mani talotaṉa sa vasileana lavata sapu va mate tie,
sa raro sapu nanara ia,
lopu boka ta kapolo palae sari narana!
Va vura tatasa i sari masa na susuri
va vura beto i, lopu vizavizata.
7 Ura sari ehara sapu va zoloro i sa si koa turaṉi mo sa:
na zoloro lani sa pa patu;
lopu zoropo lani sa pa pepeso,
vasina sapu kote boka ta paere koasa kavuru.
8 Pude va gevuru tinaṉaziri meke va tubehe
gua ke vekoi Rau sari eharana sa pa batu patu,
pude mani lopu tava paere.
9 Gua ke hiera gua si zama nia Arau Zihova sa Baṉara:
Mani ta lotaṉa sa vasileana lavata sapu va mate tie!
Arau ba kote sutuṉu va soku ia tugo sa huda.
10 Ke sutuṉu va soku ia sa huda
mamu katua sa nika.
Raro va leana ia sa masa,
heni vala nia pasapasa;
beto mamu va uqui sari susuri.
11 Beto mamu va hakea sa raro kokobana pa nika
osolae maṉini meke lera sa tinina
pude mani kapolo palae sari narana
meke hoqa palae sari bonina.
12 Ba lopu boka tu, vea voriti gua;
sari bonina si lopu boka ta vagi palae,
na nika ba lopu boka ia.
13 Ura sari boni tamugoi si na mua hahanana maqota. Podekia Rau pude va via pani koa goi sari boni, ba lopu hiva tava via pule si agoi osolae hokoto sa Qua tinaṉaziri atu koa goi.
14 Arau Zihova si ele zama. Ele kamo sa Qua totoso pude pitu gamu Rau. Lopu kote aqa si Arau; lopu kote tataru, babe hobe binalabala. Kote ta pitu si agoi koari mua hahanana meke mua tinavete, zama vura gua si Arau Zihova sa Baṉara.’ ”
Mate sa Barikaleqe te Izikeli
15 Kamo mae koa rau sa zinama te Zihova: 16 “Tuna na tie, pa keke sineke mo si kote vagi pania Rau si asa sapu tataru hola nia goi. Gua ba lopu kaqu kabo na talotaṉa babe va honi kolomata si agoi. 17 Mamu kuliusu golomo mo; lopu talotaṉa nia sa tie matena. Va hakea sa mua pusi batu, mamu va sagei sari mua sadolo pa nenemu; lopu va paere ia sa isumatamu babe hena i sari ginani tana variva buroi.”
18 Ke tozi ni arau sari tie pana munumunu, meke pana veluvelu si mate mo sa qua barikaleqe. Munumunu pa koivugona si tavetia rau gua sapu ta tozi nia rau. 19 Meke nanasau ri tie, “Boka tozini gami goi na sa laedi sari ginugua hire? Na sa si hiva tozini gami goi?”
20 Meke zama guahe si arau koa rini, “Kamo mae koa rau sa zinama te Zihova: 21 Tozi nia sa butubutu Izireli, ‘Hiera gua si zama nia e Zihova sa Baṉara: Arau si nama pude va boni ia sa Qua Zelepade, vasina sapu balabala ia gamu loke kana si boka huaria, asa sapu qetu nia gamu pude dogoria meke tataru hola nia. Sari tumia koreo na vineki sapu veko hola i gamu si kote mate pa vedara, 22 meke kote tavetia gamu gua sapu ele tavetia Arau. Lopu va paere i sari isumata mia meke lopu henai sari ginani tadi tie pu koa pa tinalotaṉa. 23 Lopu va gore pani sari pusi batu pa batu mia meke lopu va gore pani sari sadolo pa nene mia. Lopu kaqu kabo na talotaṉa si gamu ba kote gore hiteke mo sari tinimia koa gua koari mia sinea meke kote kabo golomo mo si gamu. 24 E Izikeli si sa mia vina gilagila; mi tavete lulia gua sapu tavetia sa. Pana ta evaṉa si hie si kote mi tumae nia sapu Arau tugo se Zihova Baṉara.’
25 Meke agoi, sa tuna na tie, koasa rane sapu kote huara pania Rau, sa vasina hopena sapu balabala ia rina tie loke kana si boka huaria, sa vasina hopena sapu qetu nia rini, sa tinolava sapu hiva dogoria na tataru hola nia rini, sari tudia koreo na vineki sapu koa hola si kote mate pa vedara. 26 Koasa rane asa si kote kamo mae si keke tie govete maena vasina meke tozini gamu sa inavoso. 27 Pa totoso asa si kote tukelia goi sa ṉuzumu; kote vivinei si agoi koasa tie asa meke kote podalae zamazama si agoi. Ke kote na vina gilagila si agoi koa rini, meke kote tumae nia rini sapu Arau tugo se Zihova.”