34
Kaqu Va Kilasi Zihova sari Nana Kana
1 Rizu tata mae, gamu doduru butubutu, mamu va avoso mae;
Noso mamu va taliṉa mae, gamu na tinoni!
Mani avoso mae sa popoa pepeso, meke doduru pu koa koasa,
sa kasia popoa meke doduru tie pu koa koasa!
2 Ura bugoro ni e Zihova sari doduru butubutu,
sa tinaṉaziri Tanisa si kamo la koari doduru dia qeto minate.
Na kote va kilasa beto pani Sa,
kote vala ni Sa pude ta seke va mate.
3 Sari tinidia si kote ta gona palae,
meke kote humaṉa hikare sa muzi pa tinidia;
sari toqere si kote tale eharadi.
4 Doduru pinopino pa maṉauru si kote murimuri,
kote huporo podalae pa keke kali hukihukirina kamo la pa keke kalina;
gua sa pepa sapu hitehite ta viqusu sage,
doduru pinopino si kote hoqa
guana elelo haraharadi pa huda vaeni,
guana vua piqi saganana koasa huda piqi.*Mt 24:29; Mk 13:25; Lk 21:26; Rev 6:13-14
5 Sa Qua vedara si va kilasi sari na pinopino pa maṉauru.*Sa vedara te Tamasa si va kilasi sari na pinopino pu vahesi ri na tie Moabi gua ri na dia Tamasa.
Dotu, kamahire si kote gore la va kilasi Rau sari pa Edomu,
sa butubutu pu ele ta vizata pude va kilasa beto pania Arau.*Ais 63:1-6; Zer 49:7-22; Izk 25:12-14, 35:1-15; Em 1:11-12; Obd 1-14; Mal 1:2-5
6 Sa vedara te Zihova si ta poṉa pa ehara,
meke tale deanana,
pa eharadi rina lami na qoti,
meke pa deanadi rina leleqata bulumakao.
Ura se Zihova si vukivukihi pa Bozira
meke na eoṉo si pa Edomu.
7 Meke kote mate turaṉi na bulumakao pinomodi,
sari tuna bulumakao meke bulumakao ṉiṉiradi.
Sari dia popoa si kote bobosi na ehara,
meke sa kavuru si kote heni pa deana.
8 Ura koa nana si keke rane te Zihova sapu kote tubehe hobena si Asa,
na vuaheni vinariva kilasi koa ri na kana te Zaione.
9 Sari na patu lera si kote totolo gore pa Edomu,
sari kavuru si kote lera
meke sa pepeso si kote tale nikana mo!
10 Lopu kaqu tava mate si asa boṉi na rane;
sa tuṉahana si kote sage ninae rane.
Koari na sinage na sage si kote koa ivulu eko mo si asa;
loke tie kote ene nuquru pule gua vasina.*Rev 14:11, 19:3
11 Sari na duduru pa qega meke na nao kote koa hobea;
sari na duduru nomadi meke na raveni si kote tavete vori vasina.
Kote ṉava ia Tamasa sa popoa Edomu,
na aroso padapadana meke sa aroso koa ia na mamamata,
pude pada vura nia sa kinolura meke sa tinahuara tanisa popoa asa.
12 Sari nana palabatu si kote loke butubutu pude totoli nia
meke sari nana koburu tavia si kote murimuri beto.
13 Na huda rakihi si kote toqolia sa doduru korapana sa goba vasileana,
na hilibubuku si kote koa pa korapa vetu baṉara.
Na tometomeana tadi siki pinomo,
na popoa tadi na duduru si asa.
14 Sari kurukuru pa qega si kote ene lamae vasina turaṉi sari siki pinomo,
sari qoti pinomodi si kote vari tioki;
sari kurukuru ene boṉi si kote hiva magogoso
meke la hata lolomo vasina.
15 Sa duduru si kote tavete vori meke opo nana,
kote hira vovoto meke kopuni sa sari tuna, va aqori sa pa kauru tatapuruna;
vasina tugo kote varigara sari na atata,
kote na tamatamaloana si vari kamoi.
16 Doṉo la koasa buka te Zihova mamu tiro ia:
kote koa beto sari na kurukuru hire,
lopu keke si kote loke loana.
Ura Telena zama nia sa tinozi hie,
meke pa Maqomaqona Sa kote varigara ni Sa.
17 Sari dia hinia koasa popoa si poni ni Sa;
sa limana hihia poni gua sapu garodi.
Kote tagoa rini sa popoa ninae rane,
meke kote koa si arini vasina pa sinage na sage.
*34:4 Mt 24:29; Mk 13:25; Lk 21:26; Rev 6:13-14
*34:5 Sa vedara te Tamasa si va kilasi sari na pinopino pu vahesi ri na tie Moabi gua ri na dia Tamasa.
*34:5 Ais 63:1-6; Zer 49:7-22; Izk 25:12-14, 35:1-15; Em 1:11-12; Obd 1-14; Mal 1:2-5