25
Na Kinera Vinahesi
1 Zihova, Agoi sa qua Tamasa;
kote va lavata Igo rau meke vahesia sa Pozamu,
ura tavete vura ni Goi sari doduru tinavete variva magasadi,
sari ginugua sapu pukerane tu ta balabala pude va gorevura i Goi.
2 Sari na vasileana nomana si ta evaṉae na remoremo,
sari vasileana ta gobana si huara i Goi,
sari vasileana ṉiṉiradi sapu koai na vetu baṉara tadi na kana si lopu koa;
meke lopu kaqu boka ta kuri pule.
3 Gua ke sari butubutu ṉiṉiradi kote pamaṉa Nigo;
sari vasileana nomadi tadi na butubutu kaleadi kote matagutu Nigo.
4 Koa Goi si govete atu sari na habahuala meke koa valeana,
na hinarupu tadi na tie sapu loke dia meke tasuna,
na tometomeana pa totoso raneboṉi
meke na aqoroana koasa rimata si Goi.
Ura sari hiniva tadi tie kaleadi
si guana raneboṉi sapu raza la pa gobagoba,
5 meke guana maṉini pa popoa qega.
Agoi va noso i sari ṉinoveoro tadi na butubutu karovodi;
gua sa opoadumuna sa lei sapu va ibuna sa maṉini,
ke sari kinera va kinakinai tadi tie ṉoṉovala si lopu koa.
Va Namanama ia Tamasa si Keke Inevaṉa
6 Koasa toqere Zaione si kote va nama ia e Zihova Tadi na Qeto Minate
sa inevaṉa sapu tale ginani arilaedi mo si koa pude tadi doduru tiena sa kasia popoa,
na inevaṉa vaeni taguena,
na inevaṉa masa kurukuru ta vizatadi.
7 Koasa toqere asa si kote va rizu pania Sa
sa opoadumu tanisa minate sapu gore koari doduru tie,
sa poko sapu nobidi sari doduru butubutu;
8 meke sa minate si kote onolo pania Sa pude kaqu beto hokara.
E Zihova Tadi na Qeto Minate si kote puha pani sari kolomata
koari doduru isumata;
kote va rizu pani Sa sari na kinurekure tadi Nana tinoni
koasa doduruna sa popoa pepeso,
gua si zama vura nia e Zihova.*1 Kor 15:54; Rev 7:17, 21:4
9 Koasa rane asa si kote zama si arini,
“Hinokara, Asa tu sa nada Tamasa;
raṉea gita si Asa, meke harupu gita Sa.
E Zihova tu si raṉea gita;
mada qetu nia sa Nana tinaharupu.”
Kaqu Va Kilasia Tamasa si pa Moabi
10 Sa Limana e Zihova si kote lavelave nia sa toqere Zaione;
ba sari tie pa Moabi si kote ta neti gore.
Kote guana duduli sapu ta neti gore pa ebasadi rina kurukuru.*Ais 15:1 kamo hinia 16:14; Zer 48:1-47; Izk 25:8-11; Em 2:1-3; Zepa 2:8-11
11 Kote repaha sagei rini limadia
guana tie huhuvena sapu repahi sari limana pude tunuru.
Kaqu vagi pania sa Tamasa sa dia vinahesi pule
be vea tumatumae gua si arini pa limadia.
12 Kote va gore pani Sa sari goba ululudi te Moabi,
kote va eko goreni Sa;
kote va gore lani sa pa pepeso,
gore kamo hokara la pa kavuru.
*25:8 1 Kor 15:54; Rev 7:17, 21:4
*25:10 Ais 15:1 kamo hinia 16:14; Zer 48:1-47; Izk 25:8-11; Em 2:1-3; Zepa 2:8-11