16
Nunala sari pa Moabi
1 Mi garunu la ni sari na tuna lami guana vinariponi la koasa baṉara pa popoa,
gamu pa vasileana pa Sela pa kali qega,
mi garunu lani sari na lami koasa toqere pa Zaione.
2 Guana kurukuru sapu taputapuru sage
na ta zuzu vura pa vori,
sari barikaleqe pa Moabi koasa ovuku Anoni.
3 Zama sari barikaleqe Moabi, “Poni gami binalabala,
tozini gami, na sa si kote tavetia gami.
Lavelaveni gami koari mami kana.
Va paere gami na tie govete mami si gami,
meke lopu tozi vurani sari vasidi pu korapa tome gami.
4 Va koa gami mo na tie Moabi pu govete atu koa gamu;
lopu va dogoroni gami koari mami kana.”
Na kote kokoi mo sa tie ṉoṉovala,
meke sa tinahuara si kote noso;
sarini pu mae raraza si kote murimuri taloa.
5 Pa tataru si kote ta tavete si keke habohabotuana baṉara;
sa tie pu va gorevura i sari nana zinama si kote habotu vasina,
keke pa tutina e Devita
keke sapu varipitui pa ṉinoṉo
meke tuturei taveti sa sari na tinavete pa tinoṉoto.
6 Ele avoso nia gami sa vinahesi pule te Moabi,
sa nana vina lavata pule meke sapu doṉo pule nia,
loke nana pinamaṉa pa tie meke doṉo va gore tie si asa,
ba sari nana zinamazama vinahesi pule si kokobadi.
7 Gua ke sari tie pa Moabi si kaqu lukalukana,
doduru si kaqu lukalukana nia rini sa popoa pa Moabi.
Kaqu talotaṉa meke kaboi rini
sari tie pa Kiri Hareseti.
8 Sari na inuma pa Hesiboni si harahara,
meke sari na inuma vaeni pa Sibima si kaleadi.
Sari na koimata koari na butubutu
si neti ṉovali sari vaeni arilaedi,
saripu hoke kamo la pa Zazera
meke araha la gua koasa soloso qega.
Sari liho dia si repaha vura,
meke kamo la gua tu koasa Kolo Matena.
9 Ke kabo si rau, kabo gua ari pa Zazera;
kaboi rau sari na vaeni pa Sibima.
Agoi Hesiboni, agoi Eleale,
totolo sa kolo mataqu na kabo gamu rau!
Sa kukili qetuqetu totoso sagana sari vua huda,
meke totoso pakepakete si noso.
10 Na qinetuqetu si ta vagi palae koari na inuma;
loke tie si kera na kukili koari na inuma vaeni;
loke tie si munamunala qurepi pude vagi napo vaeni,
ura na va nosoa Zihova sa kinukili qetuqetu.
11 Pa buloqu si kaboa rau sa popoa Moabi guana mike,
meke talotaṉa nia maqomaqoqu si pa Kiri Haresi.
12 Totoso la vahesi ri na tie Moabi koari dia vasina hopedi pa toqere,
si na va mabo pule ni mo si arini;
totoso la si arini koari dia beku pude varavara,
si na tinavete hoboro si arini.
13 Arini sari na zinama sapu zama va kenue nia e Zihova pa guguana Moabi.
14 Ba kamahire si zama guahe se Zihova,
“Kamo sa vina betona sa vina ṉeta vuaheni,
ta nae gua sapu hoke nae gunia sa tie ta pusina pa vinariva egoi,
si sa tinolava te Moabi meke sari doduru nana tinoni si kote murimuri.
Ka visavisa tie mo si kote koa hola meke kaqu malohorodi mo.”