17
Kaqu Va Kilasi Tamasa sari pa Siria meke Izireli
1 Hie sa kinorokorotae te Zihova pa guguana Damasikasi:
“Doṉo la, Damasikasi si lopu kote na vasileana nomana pule
ba kote ta evaṉae na vinarigarae remoremo.* Zer 49:23-27; Em 1:3-5; Zak 9:1
2 Sari vasileana nomadi pa Siria si kote ivulu
kote ari na sipi si eko muliuṉu dia vasina,
loke tie kote va mataguti.
3 Sari goba koari na vasileana nomadi pa Izireli si kote ta huara,
meke sa ṉiniraṉira tanisa binaṉara pa Damasikasi si kote murimuri;
sari visavisa tie pu lopu mate pa Siria si kote kurekure
kekeṉoṉo gua ari pa Izireli,”
gua se Zihova Tadi na Qeto Minate.
4 “Koasa rane asa si sa tinolava te Izireli si kote beto;
sari tinagotago tanisa si kote ta vagi palae.
5 Kote guana totoso ele pakepakete sa tie pa inuma
meke pakete vagi betoi sa sari vuvua pa limana,
kote ta huara gua sa totoso ta vagi palae sari na kiko huiti
koari na inuma pa lolomo Repaemi.
6 Ba kaiqa huiti si kote koa hola dia,
gua sa huda olive totoso ta zoru,
si karua babe ṉeta vua olive si koa hola dia koari na lelaṉa panaulu,
made babe lima si koari na lelaṉa pepekadi,”
gua se Zihova Tadi na Qeto Minate.
7 Koasa rane asa si kote doṉo la si arini koa Sa pu va podakadi,
meke kote liṉana sari matadia la koa Sa pu Hopena pa Izireli.
8 Lopu kote doṉo la i rini sari na hope,
saripu taveti rini pa limadia,
meke lopu kote vahesi rini sari na beku barikaleqe, pozana Asera d,
babe la vahesi koari na hope tana vina uququ oto huda humaṉa lea pu taveti rini pa kakarutu dia.
9 Koasa rane asa, sari na vasileana nomadi pu ṉiṉiradi si kote guana soloso hudahuda sapu ivulu palae,
guari na vasileana nomadi tadi na tie Hivaiti na Amoraiti sapu luara pani rini totoso rapata i ari pa Izireli meke govete si arini.
10 Ura Izireli, muliṉi nia gamu sa Tamasa, mia Hinarupu;
lopu balabala ia gamu sa Patu ṉiṉirana, sa mia vetu ṉiṉira pude lave ni sari na kana.
Gua ke be va namai gamu sari linetelete ta vizatadi
meke letei gamu sari vaeni sapu ta paleke maedi,
11 meke be va toqoli gamu koasa rane ta lete rini,
meke be koasa munumunu letei gamu si liho dia,
gua ba loketoṉa si kote paketia gamu.
Na minoho meke na tinasigiti loke vina betona mo si kote ta pakete.
12 Kei, sa tinaṉaziri tadi na butubutu
si guana ololobagea ta ṉazirina!
Kei, sa ṉoveoro tadi na tie
si vevehe guana puzakana sa tovovo pa lamana!
13 Vea vevehe guana puzakadi rina kolo pa lamana sari na tie,
ba pana gegesi sa Tamasa si govete dia mo,
paleki na givusu guana elelo pa toqere,
guana kavuru pa vivirua.
14 Pana veluvelu si holoqoru sari pa Izireli
ba pana munumunu si loke kana si koa!
Asa sa hinia tadi kasa pu mae hiko vagi likakalae koa gita,
Asa si kote ta evaṉa koa rini pu mae varipera pude vagi va soku koa gita.