18
Kaqu Va Kilasia Tamasa si pa Itiopia
Mani talotaṉa sa popoa soku ia na vaka tepe koari na ovuku pa Itiopia,* Zepa 2:12
sapu garunu la tie pa votiki popoa
gore lulia sa ovuku pa vaka sapu taveteni kuli rini.
La, gamu pu hoke tuturei paleke inavoso,
la koari tie geledi meke memehe kapudi,
koari tie ta matagutaedi koarini pa seu na tata,
na butubutu ṉiṉiradi sapu lopu ta tumae dia zinama,
meke dia pepeso si ta paqapaqaha koari na ovuku.
Gamu doduru tinoni pa kasia popoa,
gamu pu koa koasa popoa pepeso,
pana tava sage sa pitipiti koari na toqere,
si kote dogoria mo gamu,
meke pana ta ivu sa buki,
si kote avosia mo gamu.
Hiera gua si zama nia e Zihova koa rau:
“Kote koa lopu kulu si Arau pa Qua vasina pa Maṉauru meke dodogoro Qua,
guana maṉini sapu vuga pa totoso rimata dada,
babe na puni pana munumunu pa totoso pakepakete.”
Ura, sipu lopu ele pakepakete, totoso nolo sari havoro
meke podalae sagana sari qurepi,
si kote seke pani rina kana sari liho vaqura koasa magu kotokotoana,
kote seke pani meke vagi pani rini sari lelaṉa sapu araha va seu.
Sari tomatedi ri na mia varane si kote ta veko la koari na kurukuru tapuru
meke koari na kurukuru pinomo;
sari kurukuru tapuru kote henai pa totoso dada,
meke sari kurukuru pinomo kote henai pa totoso ibu.
Pa totoso asa sari na vinariponi si kote ta paleke la koe Zihova Tadi na Qeto Minate
koari na tie sapu geledi meke memehe kapudi,
koari tie ta matagutaedi koarini pa seu na tata,
na butubutu ṉiṉiradi meke lopu ta tumae dia zinama,
meke dia pepeso si ta paqapaqaha koari na ovuku,
sari vinariponi si kote ta paleke la pa toqere Zaione, sa vasina tavahesi Pozana e Zihova Tadi na Qeto Minate.

*18:1 Zepa 2:12