10
1 Madi talotaṉa sarini pu tavete tinarae ba lopu pa tinoṉoto,
sarini pu vilavilasa toka kale meke ṉoṉovali sari tie pa vinaripitui.
2 Korodia tokani pa vinilasa toṉotodi sari na malaṉa
meke sa tinokae si lopu ta vala koari na Qua tinoni.
Hiko vagi rini sari na tinago tadi na naboko,
meke gua tugo koari koburu eapadi.
3 Na sa si kote tavetia gamu koasa rane va kilasa gamu sa Tamasa,
sipu korapa mae gua pa seu sa tinahuara?
Koe sei si kote haqala la hata tinokae gamu?
Pavei kote la va naqiti gamu sari mia tinagotago?
4 Loketoṉa pule ba kote mate si gamu pa vinaripera
babe matagutu turaṉi sari pu ta tuqe vagi.
Gua ba, sa tinaṉaziri te Zihova si lopu hite rizu taloa,
sa limana si ovulu sage eko mo, nama pude seke.
5 Zama se Zihova, “Mi talotaṉa gamu pa Asiria,
Gamu pu tavetavete ni gamu Rau pa Qua tinaṉaziri guana na Qua vedara!*Ais 14:24-27; Nehu 1:1 kamo hinia 3:19; Zepa 2:13-15
6 Garunu la nia Rau se Asiria pude rapatia sa butubutu sapu loke dia tamasa,
va tia la nia Rau si asa koari na tinoni pu ta ṉaziri ni Rau,
pude saputu meke hiko vagi dia tinagotago,
pude neti goreni si arini guana nelaka pa sisiraṉa.
7 Ba lopu gua asa si hiva tavetia Asiria,
lopu gua asa si koa pa nana binalabala,
sa nana hiniva si pude huhuara,
pude seke va mate betoi soku butubutu.
8 Zama si asa, ‘Vea lopu na baṉara tu sari doduru qua ṉiha?
9 Huara pania gami sa popoa Kalono gugua mo pa Kasemisi.
Hamati si hoqa pa kenu mami gua mo pa Arapadi.
Meke Sameria si huara gunia tugo gami pa Damasikasi.
10 Tuqe vagi sa Limaqu sari butubutu pu vahesi sari na beku,
sari binaṉara sapu tago beku sapu ari laedi hola ni saripu tadi pa Zerusalema meke Sameria.
11 Ke kote va kilasia gami sa popoa Zerusalema meke sari nana beku pa patu na huda,
gua mo sapu tavete nia gami si pa Sameria meke sari nana beku.’ ”
12 Pana va hokoti e Zihova sari doduru Nana tinavete la koasa toqere Zaione meke Zerusalema, si kote tiqe zama si Asa, “Kamahire kote va kilasia Rau sa baṉara pa Asiria koasa nana vinahesi pule meke sa vina titie pa matana. 13 Ura zama si Asa,
‘Pa ṉiniraṉira tanisa Limaqu si vata evaṉi Arau si hire,
meke pa Qua ginilagilana si
va rizui Rau sari na voloso tadi na butubutu,
meke la tuqe vagi Rau sari dia tinagotago;
guana tie ṉiṉira si Rau totoso seke goreni rau sari dia baṉara.
14 Guana tie sapu qaqama la pa vori,
sa Limaqu sapu qaqama la koari na tinagotago tadi na butubutu;
guana tie sapu vagi varigara vovoto ta veko palaedi si Arau,
totoso varigara ni Rau sari na popoa nomadi;
loke tie hite nebe nia sa tatapuruna
babe tukelia ṉuzuna pude kabo vura.’ ”
15 Boka ovulu sage pule nia sa maho, ululu hola nia si asa pu korapa sokosoko?
Babe boka vahesi pule nia sa so, hola nia si asa pu korapa tuqena?
Boka sekea sa kolu si asa pu taṉinina,
babe na vedara boka ovulia sa tie tuqena?
16 Gua ke, sa Baṉara, Zihova Tadi na Qeto Minate,
si kote garunu la nia si keke minoho koari nana varane sapu toa valeana tinidi;
pa korapana sa nana tinolava si kote pidala vura sa nika
meke kote huruṉu si asa.
17 Tamasa sa zuke pa Izireli si kote ta evaṉae na nika,
Asa pu hopena si kote huruṉu;
pa korapana keke rane si kote sulu
meke gani pani Sa sari nana hiqohiqo rakihi.
18 Sa tinolava tadi nana hiqohiqo na pepeso masurudi
si kote ta huara palae,
guana tie mohona sapu gore hiteke tinina.
19 Meke sari na huda koa holadi pa nana soloso si kote visavisa,
meke na koburu hite ba kote boka kubere goreni mo.
Ka Visavisa Tie Izireli si Kote Pule Mae
20 Koasa rane asa sari ka visavisa tinoni pa Izireli,
sarini pa butubutu te Zekopi pu lopu mate,
si lopu kote kalavarae la koe Asiria pu seke goreni
ba kote hinokara kalavarae la si arini koe Zihova,
Asa sapu Hopena pa Izireli.
21 Ari ka visavisa tinoni si kote kekere pule,
arini pu koa hola pa butubutu te Zekopi
si kote pule la koasa dia Tamasa Ṉiṉirana.
22 Kei Izireli, ve soku guana onone pa masa sari mua tinoni,
ba kote ari ka visavisa mo si kote pule.
Na tinahuara si ele ta zamae vura,
sapu garogaro meke toṉoto.*Rom 9:27
23 Uve, sa Baṉara, Zihova Tadi na Qeto Minate kote va gorevura ia,
sa tinahuara sapu ta zama vura la koasa doduruna sa pepeso.
Kaqu Va Kilasia Zihova se Asiria
24 Gua ke, hie si zama nia sa Baṉara, e Zihova Tadi na Qeto Minate:
“Kei gamu na Qua tinoni pu koa pa Zaione,
mi lopu matagutu ni sari pa Asiria,
pu sekeni gamu kolu
meke avaṉani gamu vedara, gua ari pa Izipi.
25 Lopu seunae si kote ibu mo sa Qua binugoro atu koa gamu,
meke sa Qua tinaṉaziri si kote taliri la pa tinahuara tadi pa Asiria.”
26 Kote hiliburu ni iku sekesekeana e Zihova Tadi na Qeto Minate si arini,
gua pa totoso seke goreni Sa sari pa Midiani pa patu pa Orebi;
meke kote huhuku nia kolu Sa sa kolo
gua totoso va kilasi Sa sari pa Izipi.
27 Koasa rane asa si kaqu vagi pani Rau pa avara mia sa minamata tadi kasa,
gua tugo sa ioki pa rua mia;
sa ioki si kaqu tava moku
sina ele noboko si gamu.
28 La nuquru koasa vasileana lavata pa Aiata sari kana;
meke hola gua pa Miqoroni;
veko paki dia pinaleke pa Mikimasi.
29 Ene gua koasa karokarovoana pa toqere si arini, meke zama,
“Kote hola boṉi si gita pa Qeba.”
Neneqara sari pa Rama;
meke govete sari pa Qibea, sa popoa te Saula.
30 Kabo vura, gamu tudia vineki ri pa Qalimi!
Va avoso, gamu pa Laisa!
Olaṉa, gamu tie pa Anatoti!
31 Sari tie pa Madimena si govete beto;
sari pa Qebimi si tome.
32 Pa rane ṉinoroi si kote noso sari Asiria pa Nobi;
kote hiru ni limadia la koasa toqere pa Zaione,
koasa toqere pa Zerusalema.
33 Doṉo la, sa Baṉara, e Zihova Tadi na Qeto Minate,
pa Nana ṉiniraṉira si kote koku pani Sa sari lelaṉa huda nomadi.
Sari huda ululudi si kote ta maho gore,
saripu gele hola si kote tava pepeka.
34 Kote maho goreni Sa sari hiqohiqo muqe;
sari huda pa Lebanoni si kote hoqa pa kenuna Asa pu Ṉiṉira Hola.