11
Sa Binaṉara Bulebulena
1 Na lelaṉa si kote tuvulu vura koasa dadagana e Zese;
koasa karosona si kote ari vuana si keke Lelaṉana sa.*Rev 5:5, 22:16
2 Sa Maqomaqona e Zihova si kote kamo koasa,
sa Maqomaqo ginilagilana meke binokaboka,
sa Maqomaqo vinari tokae pa binalabala meke ṉiniraṉira,
sa Maqomaqo tinumatumae meke pinamaṉana e Zihova,
3 meke kote qetu nia Sa sa vina tabena e Zihova.
Lopu kote vilavilasa si Asa luli gua pa dinogoro pa mata,
babe varipitui pa inavoso pa taliṉana,
4 ba pa tinoṉoto si kote pitui Sa saripu loke dia,*2 Tes 2:8
pa vinilasa toṉotona si kote tavete valeana la si Asa koari pu malaṉa pa popoa pepeso.
Sa kolu pa ṉuzuna si kote seke nia Sa koasa popoa pepeso,
koasa siniṉo pa beruna kote seke va mateni Sa sari tie kaleadi.
5 Sa tinoṉoto si kote dokoho nia Sa
meke sa ṉinoṉo si kote ilupu nia Sa pa kopetena.*Epi 6:14
6 Sari siki variva mate kote koa turaṉi sari tuna sipi,
sari leopadi kote eko turaṉi sari na qoti.
Sari na tuna bulumakao, tuna laione, si kote koa varigara meke ganigani;*Ais 65:25
meke na koburu hite kote kopuni si arini.
7 Na bulumakao kote ganigani turaṉia sa bea,
sari tudia si kote eko varigara,
meke sa laione si kote gani duduli gua na bulumakao.
8 Na koburu si kote lopilopi tata meke qaqama la pa pou tanisa noki variva mate.
9 Lopu kote variva mate babe vari komiti si arini
koasa doduruna sa Qua toqere hopena,
ura sa popoa pepeso si kote siṉia na ginilagilanana e Zihova
gua sapu siṉia kolo sa lamana.*Hbk 2:14
Kote Pule saripu Ta Raovo Taloa
10 Koasa rane asa sa Karoso te Zese*Sa Karoso te Zese si e Zisu. Mi tiro la i Rom 15:12, Rev 5:5, 22:16. si kote turu guana pitipiti tadi na tinoni;
sari butubutu si kote varigara la koa Sa
meke sa vasina koa si Asa si kote tolavaena.
11 Koasa rane asa si kote qaqama vura nia e Zihova sa Limana vina rua totoso
pude vagi pule ni sari ka visavisa tie pu koa holadi koari Nana tinoni:
pa Asiria, pa Izipi Peka, pa Izipi Ulu, pa Itiopia, pa Elami, pa Babiloni, pa Hamati, meke koari na nunusa pa kolo lamana.
12 Kote kave sage pitipiti si Asa pude dogoria ri kaiqa butubutu,
meke varigara ni sari tie Izireli saripu ta raovo taloa;
kote vagi puleni Sa sari tie Ziuda saripu hurakatae lamae koari na hopeke vasidi koasa kasia popoa.
13 Sa kinonokono te Iparemi si kote murimuri
meke sa kinuhana te Ziuda si kote noso;
Iparemi si lopu kote kono nia se Ziuda,
meke se Ziuda si lopu kote kana ia se Iparemi.
14 Kote varigara sari karua meke rapatia si pa Pilisitia pa kali lodu rimata;
meke zau vagi koari tie pa kali gasa rimata.
Kote la va kilasi rini sari pa Edomu meke Moabi,
meke sari tie Amoni si kote va tabe la koa rini.
15 E Zihova si kote va popa ia
sa koqu pa Izipi;
pa limana kote nebe la nia Sa sa givusu maṉinina
koasa Ovuku pa Iuparetisi.
Kote paqaha nia zuapa tototolo hitekedi Sa sa ovuku nomana
pude boka ene karovo vasina pa nenedia sari na tie.*Rev 16:12
16 Kote tavetia Sa si keke siraṉa nomana
pude tadi Nana visavisa tie pu koa holadi pa Asiria,
gua sapu tavete poni Sa sari pa Izireli pukerane
totoso topue vura si arini pa Izipi.