1 Kaqu haele sagea rau sa vetu kopu ṉiṉirana meke aqania sa inolaṉa gua sapu kaqu tozi nau e Zihova pude zama nia meke na sa sa zinama sapu kaqu poni nau Sa koa sa qua qinumiqumi.

2 Ele poni nau e Zihova sa inolaṉa hie: “Mu kubere va bakalia koari na patu labelabedi gua sapu va dogoro va bakala nigo Rau, pude boka ta tiro valeana. 3 Mamu kuberia mo, sina lopu ele kamo sa totoso pude tava gorevura si asa. Ba korapa nono mae sa totoso, meke gua sapu va dogoro nigo Rau si kaqu gorevura tugo. Ba guana dinoṉo va mamamatae sa nana minae, ba aqa nia mo, kaqu gorevura hinokara si asa, meke lopu kaqu va sasanae.*Hib 10:37 4 Meke gua hie sa inavoso: ‘Sarini pu vahesi puleni, arini pu tavete va kaleana si lopu kaqu toa, ba arini mo pu toṉoto si kaqu toa pa rinaṉeraṉe.’ ”*Rom 1:17; Qal 3:11; Hib 10:38

5 Na tinagotago si sekesekei ni sari na tie hire. Sari na tie puhi si lopu makudo vahesi puleni, kekeṉoṉo gua sa minate sapu lopu makudo vagi tie, lopu hite vagi betoi rini gua sapu hivani rini. Gua asa ke va kilasi rini sari na butubutu pude na dia vinagi teledia gua. 6 Sari na tie ta raovodi pa vinaripera si kaqu va sisire ni rini sari na dia kana, arini pu ele va kilasi na ṉoṉovali; kaqu vata dogoro nia sa dia vina karikari koa rini. Kaqu zama si arini, “Mi balau gamu pu vagi sari tiṉitoṉa lopu tamugamu, nono mae sa vina kilasa mia gamu! Vea seunae gua si kaqu koa tagotago si gamu meke garunu zukuri saripu veko gale koa gamu pude tabari si arini?”

7 Ba lopu seunae, meke gamu sapu va kilasadi sari na votiki tie si kaqu ta veko gale telemia meke kaqu ta garunu zukuru pude tabaria gamu sa tinoqolo tanisa. Sari na kana si kaqu mae meke va tarazuzu gamu rini si gamu. Kaqu zau vagi rini sari mia tinagotago. 8 Ele zau vagi gamu sari na likakalae tadi na tie koari soku butubutu, ba arini pu toa kamahire si kaqu zau vagi sari na likakalae tamugamu koa gua koasa vina mate tie sapu evaṉia gamu meke koasa mia ṉinovaṉovala nomana koari na tie pa kasia popoa meke sari dia vasileana nomadi.

9 Ta levei mia si gamu koe Tamasa! Va tagotagoa gamu sa mia kinoa tatamana koa ri na tiṉitoṉa pu zau vagi gamu pa vinaripera meke podekia gamu pude toketoke hukata nia sa mia vetu soti pa ṉinovaṉovala meke na tinasuna! 10 Ba sa mia binalabala pude va kilasi sari na votiki tie si va pule atua mo koasa mia puku tatamana sa kinurekure; sina zalo va puzuli gamu sari soku butubutu, ke va tasuna pule ni gamu mo si gamu telemia. 11 Ego sari na patudi rina goba pa vetu ba zutu gamu koari na mia sinea, sari na labete na dedegere pa vetu ba zutu gamu tugo.

12 Ta levei mia si gamu! Sokirae nia gamu si keke vasileana nomana pa kinaleana, meke kuria gamu si asa koasa vina mate tie. 13 Sari doduru tie pu vagi gamu pa vinaripera si ele maboni rini sari na tinavete loke laedi, meke sari doduru vetu pu kuri rini si ta sulu palae mo. E Zihova Tadi na Qeto Minate evaṉia sapu gua asa. 14 Ba sari na tie pa pepeso si kaqu ta siṉie nia rini sa ginilagilanana sa vina lavata te Tamasa, kekeṉoṉo gua na lamana sapu ta siṉie kolo.*Ais 11:9

15 Ta levei mia si gamu! Pa mia tinaṉaziri si na va gorei meke va kurekurei gamu sari na votiki butubutu pu koa tata koa gamu; tedeve lamae si arini guana tie naponapodi. 16 Kaqu ta siṉie kinurekure si gamu, ba lopu na vina lavata. Kaqu naponapo telemia si gamu meke viviri. Kaqu va naponi gamu e Zihova sa mia kapa vina kilasa soti telemia, meke kaqu ta ilirae kinurekure sa mia vina lavata. 17 Maho pani gamu sari na huda pa Lebanoni; ego gamu ba kaqu ta maho palae tugo kamahire; va matei gamu sari na kurukuru ṉame vasina; kaqu va matamatagutu gamu tugo ri na kurukuru ṉame si gamu. Kaqu ta evaṉa sapu gua hie sina koa gua koa sa vina mate tie sapu tavetia gamu, meke koasa mia ṉinovaṉovala nomana koari na tie pa kasia popoa meke sari dia vasileana nomadi tugo.

18 Na sa laena sa beku? Na tiṉitoṉa mo sapu keke tie mo tavetia si asa, meke loketoṉa si boka tozini gamu sa, ba na kinohakoha mo. Na tinavete leana savana si tavete ponia sa sa tie pu tavetena pude kalavarae na va tamasia sapu lopu hite boka zama si asa! 19 Mi balau gamu pu zama ia si keke kukuru huda, “Mu vaṉunu!” babe koa keke patu ta peqona “Mu tekulu!” gua. Boka tozi vura nia na beku si keketoṉa koa gamu? Garo ta pokoe siliva na qolo si asa, ba namu lopu koa ia tinoa.

20 E Zihova si koa pa Nana Zelepade hope; ke madi koa noso pa kenuna Sa sari doduru tiena sa pepeso.