3
Keke Vinaravara te Habakuku
1 Hie si keke vinaravara tanisa poropita Habakuku.
2 Ke Zihova, ele avosia rau gua sapu evaṉia Goi,
ke matagutu si rau.
Ego Mamu evaṉa pulei kamahire
sari na tinavete arilaedi gua saripu ele evaṉi Goi.
Ba Mu tataruni gami mo be guana bugoro si Goi.
3 Taluarae mae gua pa Edomu sa Tamasa,
sa Tamasa Hopena si taluarae mae gua koari na toqere Parani.
Sa Nana tinolava si nobi sari na maṉauru;
meke sa kasia popoa ta siṉie nia sa vinahesina.
4 Mae koasa ṉinedalana sa kapi si Asa;
malara vura pa Limana Sa sa kalalasa,
vasina ta tome sa Nana ṉiniraṉira.
5 Garunu va kenue la nia Sa sa oza,
meke va luli mudi la ia Sa sa minate.
6 Sipu noso si Asa, niu tugo sa pepeso;
koasa Nana dinoṉo si neneqara sari na tie.
Sari na toqere pukeranedi si ta huara va inete;
sari na botubotu pukeranedi si lodu gore,
sari na botubotu pu hoke enei Sa tatasana.
7 Dogori rau sari na tie Kusani si matagutu
meke sari na tie Midiani si tarazuzu.
8 Vegua sari na ovuku si va bugorigo si Goi, Zihova?
Ba vegua sa lamana tu si va ṉazirigo?
Enea Goi sa lei;
sa lei raneboṉi sina Mua totopili;
totoso va mataqari Goi sari Mua tie.
9 Ele va namanama ia Goi sa Mua bokala pude tavetavete nia,
va namanama pude gonani sari na Mua tupi.
Viqala ruaia na kapi sa pepeso.
10 Sipu dogorigo rina toqere si Goi, si neneqara si arini;
titisae gore mae gua pa maṉauru sa kolo;
ovaṉa sari na kolo pa kauru pepeso;
meke sari na bogusudi rini si vosusu sage.
11 Koasa malakapidi rina Mua tupi reregedi
meke sa malakapina sa Mua hopere ṉedalana,
meke kaqu turu noso sa rimata meke na sidara.
12 Ele ene karovia Goi sa pepeso koasa Mua binugoro;
pa Mua tinaṉaziri si neti va konekonei Goi sari na butubutu.
13 Ele vura la si Goi pude harupi sari na Mua tie,
pude harupia sa Mua baṉara ta vizatana.
Ele seke va matea Goi sa koimata tadi na tie kaleadi,
meke namu va puzulu beto pani Goi sa koimata tadi na tie kaleadi meke sari nana tie.
14 Sari na Mua tupi si ele qahaia sa koimata pa nana puku minate varipera
sapu mae guana raneboṉi pude vata huara gami si gami, gua,
puhi gua rina tie pu ṉoṉovala golomi sari na tie habahualadi.
15 Va enei Goi sari na Mua hose,
meke va ṉoroṉoroa sa mamaṉana sa kolo lamana.
16 Ele avoso nia rau sapu gua hie, ke matagutu si rau;
ziziziri pa minatagutu sari na beruqu.
Lehu sa tiniqu
meke ta tubarae sari nenequ.
Kaqu aqa va ṉoṉo nia rau pa qinetu sa totoso sapu korapa mae
pana kaqu va kilasi Tamasa saripu rapatani gita.
17 Be loke vuana sa huda piqi
meke loke qurepi si vura mae koasa vaeni,
be lopu toa valeana sa olive
meke loke huiti si vura mae pa inuma,
be mate beto sari na sipi
meke loke bulumakao koari na bara,
18 ba kaqu koa qetuqetu la mo si rau
sina e Zihova Tamasa sa qua Hinarupu.
19 Poni nau ṉiniraṉira e Zihova si rau
va ṉiṉirai Sa sari nenequ guana nenena sa dia,
meke kopu valeana nau Sa koari na toqere.*2 Samuela 22:34; Sam 18:33