18
Sa Kinera Minataqara te Devita
(2 Samuela 22:1-51)
(Devita sa nabulu te Zihova si kera nia sa kinera hie koasa rane sapu harupia e Zihova se Devita koe Saula meke sari doduru nana kana.)
1 Kei Zihova, tataru nigo rau si Goi,
Agoi mo sa qua ṉiniraṉira.
2 Zihova tugo si na qua patu aqoroana.
Koa tome koa Sa si rau,
ke loke kana si boka ṉoṉovalau.
Asa si na qua vinasare,
na qua Tamasa, na qua patu heheda.
Koa Sa si aqorae si rau, na qua lave,
na ṉiniraṉira meke sa ṉatina sa qua tinaharupu!
3 Tepa tinokae si rau koe Zihova,
sapu garona pude tava lavata,
meke harupau Sa koari na qua kana.
4 Sa tinasuna tana minate si koa pa vari likohaequ,
sari na bogusu tinahuara si nobi tamunau si arau.
5 Sari na tinasuna variva matedi si koa pa vari likohaequ,
meke sa tinapusi tana minate si soqo au.
6 Pa korapa qua tinasuna si tepa la si rau koe Zihova.
Tepaia rau sa tinokae koa sa qua Tamasa,
pa korapana sa Nana Zelepade si avosia Sa sa mamalaiṉiqu,
meke sa qua kinabo si ele avosia Sa.
7 Ke ziziziri sa pepeso meke niniu,
meke madidiri hubidi sari na toqere,
sina ta ṉaziri sa Tamasa.
8 Na tuṉaha si vura pa isuna
meke na nika huruṉuna
meke na motete leradi si vura pa ṉuzuna.
9 Sira tukelia Sa sa maṉauru,
meke gore mae,
na lei huporona si koa pa kauru Nenena.
10 Koi pa keke mateana tapuruna meke gore mae si Asa,
rerege mae si Asa koasa givusu.
11 Va poko pule nia si Asa koasa huporo,
meke sari na lei muhodi pu siṉia na kolo si koa pa vari likohaena.
12 Sari na ruku kabukabue aesi
meke na malara nika,
si vura mae pa ṉinedalana Sa.
13 Meke lulusu guana paka maṉauru se Zihova,
meke ta avoso sa mamalaiṉina sa Tamasa Ululuna Hola.
14 Gonani Sa sari Nana tupi
pude va talahuaraei sari Nana kana.
Sa malakapina sa kapi,
si va goveti Sa si arini.
15 Kei Zihova, sipu ta ṉaziri ni na norei Goi sari na Mua kana,
sari na lolomo pa hubi lamana,
meke sari na sinokiraena sa pepeso si ta dogoro,
koasa givusuna sa siniṉomu Goi.
16 Qaqama gore mae pa Maṉauru sa Tamasa meke harupau Sa,
meke daku vura nau Sa pa lamana peava.
17 Harupau Sa si rau koari na qua kana ṉiṉiradi,
meke koari doduru pu kukiti nau,
ura ṉiṉira hola nau rini si rau.
18 Sipu korapa koa si rau pa tinasuna, si mae rapata nau rini,
ba va sare au e Zihova.
19 Toka nau Sa meke va seu au Sa pa tinasuna,
harupau Sa sina qetu nau Sa.
20 Pia au e Zihova si arau,
sina tavete va toṉoto si rau.
Mana nau Sa, sina viaqu,
lopu sea si rau.
21 Ele va tabei rau sari na tinarae te Zihova,
meke lopu va mudia rau sa qua Tamasa.
22 Kopu beto ni rau sari doduru Nana tinarae,
meke lopu hite va kari rau sari na Nana ginarunu.
23 Loke tinazutuqu si rau pa kenuna Sa,
meke ele kopu pulenau si rau pude lopu tavete va sea.
24 Gua asa ke pia au Sa si arau,
sina tavete va toṉoto si rau,
meke gilania Sa sapu loke qua sinea si rau.
25 Kei Zihova, ta ronuemu si Goi koarini pu soto va nabu koa Goi,
meke va dogoro nia Goi sa Mua tinoṉoto koari na tie toṉoto.
26 Via si Goi koarini pu via,
ba koari na tie sekesekei si guana tie sekesekei guni Nigo rini.
27 Ura harupi Goi saripu va pepekae,
ba va hoqai Goi sarini pu vahesi puleni.
28 Kei Zihova, va toa ekoa Goi sa qua kalalasa,
ke Tamasa, va kalalasa ia Goi sa qua hinuporo.
29 Poni nau Goi sa ṉiniraṉira pude rapati sari na qua kana,
meke sa vinarane pude boka va kilasia rau sa dia vasina varipera ṉiṉirana.
30 E Tamasa si toleṉe gua toṉotodi sari Nana tinavete;
ta ronu hola sari Nana zinama!
Guana lave si Asa koa ri doduru
pu tome koa Sa.
31 E Zihova mo telena si na Tamasa,
Asa mo telena sa nada Patu aqoroana.
32 Asa mo sa Tamasa sapu va ṉiṉira au,
toka nau Sa pa siraṉa gotogotona.
33 Va boka au Sa pude ene koari na vasina tasunadi pa toqere,*Hbk 3:19
meke lopu kaqu hite ta tubarae si arau.
34 Va tumatumae nau Sa pude varipera,
ke boka ṉavea rau sa bokala ṉiṉirana hola.
35 Kei Zihova, lavelave hukata nau Agoi.
Pa Mua ṉiniraṉira si kopu nau Agoi,
meke koasa Mua vina pepekae si tava lavata si rau.
36 Ele va labe poni au Goi sa siraṉa,
ke lopu vagi au ri na qua kana,
meke lopu hite hoqa si arau.
37 Hadu luli rau sari na qua kana meke va kilasi rau si arini,
lopu hite noso si rau osolae va mate betoi rau si arini.
38 Seke va hoqai rau si arini,
ke lopu boka turu pule.
Mate eko mo pa kenuqu rau si arini.
39 Ele poni nau Goi sa ṉiniraṉira pa vinaripera,
meke va todoṉi sari na qua kana pa kenuqu rau.
40 Ele va govete taloai Goi koa rau sari na qua kana,
meke ele va matei rau saripu kukiti nau.
41 Tepa tinokae,
ba loke tie harupi si arini.
Tepa la si arini koe Zihova,
ba lopu olaṉi Sa.
42 Muzara va umumi rau si arini,
guana kavuru pu givusu pani.
Neti va konekonei rau si arini
guana kosiri pa siraṉa.
43 Ele harupau Goi si rau koari na tie va karikaridi;
meke ele va baṉara au Goi koari na butubutu,
sari na tinoni pu lopu gilani rau,
ba nabulu nau rini.
44 Sipu avoso nau rini si va tabe au rini.
Sari na tie karovodi ba mae hoqa todoṉo pa kenuqu rau.
45 Matagutu hola meke neneqara mae si arini pa kenuqu rau.
Tarazuzu meke vura mae si arini koari na dia vasina varipera ta bara va ṉiṉiradi.
46 Toana se Zihova!
Mani tava lavata sa qua patu aqoroana!
Maqu vahesia sa Tamasa,
sa qua hinarupu!
47 Poni nau Sa sa minataqara koari na qua kana,
toka nau Sa pude va kilasi sari na votiki butubutu.
48 Meke harupau Sa si rau koari na qua kana.
Ke Zihova, Agoi va mataqarau si rau koari na qua kana.
Meke lavelave hukata nau Goi koari na tie ṉoṉovala.
49 Gua asa ke kote vahesigo rau si Goi pa vari korapadi ri na butubutu huporodi;*Rom 15:9
meke kera vahesia rau sa Pozamu Zihova!
50 Ponia Tamasa sa minataqara lavata koasa Nana baṉara.
Va dogoro nia Sa sa Nana tataru nabuna koasa pu ele vizatia Sa,
Koa rau Devita meke koari na tutiqu ninae rane ka rane.