17
Keke Vinaravara tanisa Tie Toṉoto
(Keke vinaravara te Devita)
1 Kei Zihova, mu avoso mae ia sa qua tinepa koa Goi pude harupau pa Mua tinoṉoto.
Mu va avosia sa qua tinepa tinokae.
Mu va taliṉa mae ia sa qua vinaravara hinokara.
2 Mu vilasa poni nau sa tinoṉoto;
sina Agoi gilania gua sapu toṉoto.
3 Gilania Goi sa buloqu,
ele mae koa rau si Goi pana boṉi,
meke ele viliti betoa Goi sa doduruna sa qua tinoa,
ba loke inokoro kaleadi si ta dogoro koa rau.
Loke zinama kaleadi si ta zamae pa beruqu gua,
4 sapu hoke evaṉia ri kaiqa.
Ele va tabei rau sari na Mua tinarae,
meke lopu luli rau sari na hahanana tadi na tie variva mate.
5 Ele ene luli valeania rau sa Mua siraṉa,
meke lopu hite va karia rau si keketoṉa.
6 Kei Tamasa, varavara atu si rau,
sina avosau Goi.
Mu va taliṉa mae au,
Mamu avosi sari na qua zinama.
7 Mamu vata dogoro nia sa Mua tataru nabuna,
Mamu harupau.
Koa Goi si tava sare si rau koari na qua kana,
sina kalavarae si rau koa Goi.
8 Mamu kopu totoko nau gua sapu kopu totoko pule Nigo,
Mamu tomeau pa kaurudi ri na tatapurumu,
9 pude qu tava sare koari na tie kaleadi pu ṉoṉovalau,
na tie variva mate pu koa vari likohae nau.
10 Loke dia tataru si arini,
meke vahesi puleni pa dia zinama.
11 Pitu lulia rini sa qua inene,
meke mae kamo au rini.
Hatahata luliau rini,
pude va mateau, gua.
12 Kekeṉoṉo gua na laione si arini,
sapu tome aqa pude garata va mate au, gua.
13 Kei Zihova, mae toka nau!
Mu turu varipera koari na qua kana,
Mamu harupau koari na tie kaleadi koasa Mua magu varipera.
14 Kei Zihova, harupau koari na tie kaleadi.
Ele vagi rini doduru gua pu kaqu vagi rini koasa kasia popoa hie.
Mu va kilasi gedi pa tinasigiti sapu ele va nama veko poni Goi pude tadirini.
Va hia i tugo sari na tinasigiti koari na tudia meke rina tudia rina tudia.
15 Ba arau si kaqu dogoro Igo pa tinoṉoto,
sina loke kinaleana si evaṉia rau.
Pana vaṉunu rau si maqu qetu qua,
sina toa koa Goi si rau.