SA BUKA TE
ZEPANAEA
Sa Vinabakala
E Zepanaea si ele zama pa Ziuda, pa totoso te baṉara Zosaea, sipu lopu ele tavetia e Zosaea sa hinobe nomana pa Ziuda, sapu va kekere pule ia sa sa butubutu pude vahesi ia sa dia Tamasa. Se Zosaea si koa baṉara koari na vuaheni onomo gogoto made ṉavulu meke kamo pa vuaheni onomo gogoto sia sipu lopu ele podo se Zisu Karisito, ba sa poropita Zepanaea si tozi vura nia sa zinama te Zihova pa totoso papakana mo koari na totoso arini. Sa ginuana sa pozapoza Zepanaea si, “Zihova si lavelave.”
Pa pinodalaena sa buka si tozia sa sapu na tuti baṉara si asa, gorena pa tuti te Hezikaea. Hokara gua ke tumaeni sa meke zama sisigiti nia sa sa hahanana vilavilasa va kaleana tadi na palabatu pa vetu varipitui meke tanisa qinavuna. Koe Zerusalema si zama sisigiti la si asa, sapu ele kilu ia rini sa dia Tamasa, gua. Sa ṉati inavoso te Zepanaea si sa minae tanisa “Rane te Zihova.” Na vina kilasa nomana si korapa mae, kote raza si asa koari pa Ziuda, gua si asa. Ba pa vina betona sa nana zinama si sa inavoso tolavaena te Zerusalema; sari ka visavisa tie sapu koa va toṉoto koa Sa si kote harupi Sa meke kuri pule ia sa Zerusalema vaqurana.
Sari Ṉati Pinaqapaqahana sa Buka
Sa rane vinaripitui te Zihova. Hinia 1:1 kamo hinia 2:3
Sari kinaleadi na sinea tadi na popoa sapu koa tata koe Izireli. Hinia 2:4-15
Sa vina kilasana Zerusalema meke sa tinaharupuna. Hinia 3:1-20
1
Sari Zinama Tuketukele
1 Sa zinama te Zihova sapu kamo la koe Zepanaea, sa tuna koreo e Kusi, sa tuna koreo e Qedalaea, sa tuna koreo e Amaraea sapu sa tuna koreo e Hezikaea, pa totoso sapu koa baṉara se Zosaea sa tuna koreo e Amoni sa baṉara pa Ziuda:*2 Baṉ 22:1 kamo hinia 23:30; 2 Koron 34:1 kamo hinia 35:27
Sa Rane Tanisa Vinari Pitui te Zihova
2 “Kote sara pani Rau sari doduru tiṉitoṉa
koa sa popoa pepeso,”
zama vura gua se Zihova.
3 “Kote sara pani betoni Rau sari tie meke kurukuru;
kote sara pani betoni Rau sari kurukuru pa galegalearane meke sari igana pa kolo.
Sari tie kaleadi si tago kobi remoremo mo si arini
pana va mate pani Rau sari tie koasa popoa pepeso,”
zama vura gua se Zihova.
4 “Kote nadoro vura la nia Rau sa Limaqu koe Ziuda
meke koari doduru pu koa pa Zerusalema.
Kote va mate pani betoni Rau koasa vasina hie sari doduru tie koa holadi pu vahesia se Beolo,
sari pozadia ri na tie huporodi meke sari dia hiama,
5 sarini pu todoṉo pa batu vetu
pa vinahesidi ri na pinopino,
sarini pu todoṉo meke zama va tokotokoro la koe Zihova
beto si la zama tokotokoro pule koasa tamasa Moleki,
6 sarini pu kekere meke lopu luli ia se Zihova
meke lopu hata ia rini se Zihova babe tepatepa la koa Sa.
7 Noso, lopu zama pa Kenuna e Zihova Baṉara,
ura sa rane te Zihova si tata kamo.
Se Zihova si ele va nama pude va vukivukihi;
meke ele va madi Sa sarini pu ruvati Sa.
8 Koasa rane sapu va vukivukihi se Zihova
si kote va lipulipu i Arau sari na koburu tavia
meke sari tuna koreo sa baṉara
meke doduru arini pu va sage i
sari poko sapu karovodi.
9 Koasa rane asa si kote va lipulipu i Arau sari doduru arini pu korodia neti koasa nuqunuquruana vetu,*1 Samuela 5:5
arini pu va siṉi nia tie matedi
meke sinekesekei sa zelepade tadi dia tamasa.
10 Koasa rane asa,” zama vura gua se Zihova,
“si na kabo si kote sage gua koasa Sasada Igana,
na uui si kote mae gua koasa Kukuru Vasileana Vaqura,
meke na vevehe tinahuara lavata*Gina zama nia sa poropita sa hinuara tadi na beku koari na toqere pa Zerusalema. si kote mae gua koari na toqere.
11 Mu uui, agoi pu koa pa vasina maketi;
doduru mua tie holuholu si lopu keke kote koa hola,
doduru pu holuholu pa siliva si kote ta huara.
12 Pa totoso asa si na zuke kote hata ni Rau sari pa Zerusalema,
meke va lipulipu i sarini pu kokoa va leana,
pu guana vaeni koa holana pa nana vovoina,
pu balabala sapu, ‘Loketoṉa si kote tavete ia e Zihova,
be leanana sia ba be kaleanana,’ gua.
13 Sari dia tinago si kote ta vagi taloa,
sari dia vetu si kote ta huara.
Kote tavete vetu si arini
ba lopu kote koa i rini;
kote lete inuma vaeni si arini
ba lopu kote napoi rini sari vaeni.”
Sa Rane Nomana te Zihova
14 “Sa rane nomana te Zihova si tata kamo,
meke tuturei mae sia.
Va avoso! Sa kabo koasa rane te Zihova si kote pasana,
sa uui tadi na varane vasina si kote ta avoso.
15 Sa rane asa si kote na rane tinaṉaziri te Zihova,
na rane tinasigiti meke tinalotaṉa,
na rane tinasuna meke tinahuara,
na rane hupohuporona meke koa ia ninunala
na rane opoadumu ia na lei meke dudukurumu,
16 na rane tanisa kabona sa buki meke sa kukili varipera koari na vasileana ta gobadi
meke koari vetu hakehakei ululudi koari na iio pa goba.
17 Na tinalotaṉa si kote paleke mae nia Rau koari na tie
meke kote ene guana tie bebehudi si arini,
sina ele tavete va sea la si arini koe Zihova.
Sari ehara dia si kote titisae guana kavuru
meke sari lagudia si kote vura guana boni tie.
18 Sari dia siliva meke dia qolo si lopu kote harupi si arini
koasa rane tanisa tinaṉaziri te Zihova.
Sa kono te Zihova si kote va mae ia sa nika
sapu kote gani pania sa doduruna sa kasia popoa,
ura kote va mate va hodaki Sa sari doduru pu koa koasa popoa pepeso.”
*1:1 2 Baṉ 22:1 kamo hinia 23:30; 2 Koron 34:1 kamo hinia 35:27
*1:10 Gina zama nia sa poropita sa hinuara tadi na beku koari na toqere pa Zerusalema.