SA BUKA TE
HABAKUKU
Sa Vinabakala
Sari na zinama tanisa poropita Habakuku si vura mae koari na vuaheni sipu koa baṉara sari na tie Babiloni, meke Zosaea si na Baṉara pa Ziuda pa vuaheni onomo gogoto made ṉavulu sipu lopu ele podo se Zisu Karisito, babe se Zehoiakimi si na Baṉara vasina pa vuaheni onomo gogoto sia kamo lima gogoto sia ṉavulu vesu sipu lopu ele podo se Zisu Karisito. Talotaṉa nia sa sa kinaleana sapu tavetia ri na tie kaleadi hire, ke tepa la si asa koe Tamasa, “Vegua ke lopu zama si Goi sipu ṉoṉovali rini sari na tie pu toṉoto holani si arini?” (1:13) Sa inolaṉa te Zihova si kaqu ta tavete si asa pa nana totoso garona, meke gua asa “saripu toṉoto si kaqu toa sina ṉoṉo pa kenuna sa Tamasa si arini” (2:4)
Sa vinabetona sa hinia karua si na kinorokorotaena sa tinalevei tadi na tie kaleadi; meke hinia ṉeta sina kinera vina betobeto (3:1-19) sapu tozi vura nia sa inarilaena te Tamasa koa sa rinaṉeraṉe toa holana koasa kinera asa.
Sari Ṉati Pinaqapaqahana sa Buka Hie
Sari na qinumiqumi te Habakuku meke sari na inolaṉa te Tamasa. Hinia 1:1 kamo hinia 2:4
Sa tina leveidi ri na tie kaleadi. Hinia 2:5-20
Sa vinaravara te Habakuku. Hinia 3:1-19
1
Qumiqumi nia Habakuku sa Kinaleana
Hie sa inavoso sapu va gilana nia Zihova koasa poropita Habakuku.
Ke Zihova veseunae gua si kaqu tepatepa atu tinokae si rau, ba lopu avosau Goi? Ta ṉoṉovala sisigiti si gami koari na mami kana, ba lopu ele harupu gami Goi koa sa tinasuna. Na venagua ke va dogoro nau tu Goi sa tinasuna gua hie? Na venagua ke va malumia Goi pude doṉo la ia sa tinavete kaleana? Na tinahuara, minate, meke na vina kilasa tie si koa vari likohae nau, na vinaripera na vinaritokei si koa pa doduru vasina. Malohoro meke ta evaṉae loke laena sa tinarae, meke lopu ta evaṉa sa vinilasa toṉotona. Va kilasi ri na tie kaleadi sari na tie leadi, ke ta muliṉae hokara sa tinoṉoto.
Sa Inolaṉa te Tamasa
Meke zamai e Zihova sari Nana tie, “Mi kopuni sari na butubutu tie pu koa pa varikali mia sara, meke kote magasa nia gamu gua sapu kaqu dogoria gamu. Kote tavetia Rau si keketoṉa sapu lopu kaqu boka tava hinokara pana avosia gamu sa guguana sa.* TTA 13:41 Arau mo ponini ṉiniraṉira sari na tie Babiloni, sari na tie variva matagutudi na ṉoṉovaladi sara. Ene la pa kasia popoa si arini pude va kilasi sari na votiki butubutu, gua.* 2 Baṉ 24:2 Va matamataguti na va holoqorui rini sari na tie, meke pa dia vinahesi pule si lulia mo rini sa dia hiniva.
Sari dia hose si rerege holani rini sari na leopadi; variva matagutudi, holani rini sari na siki pinomo oviadi. Sari dia tie varipera koi pa hose si mae guadi pa popoa seu; puzaia ri na hose sa pepeso. Tedoro gore mae si arini guana atata pu rapati sari dia boso.
Sari dia puku minate varipera si rapata nono la meke va kilasi si arini, matagutu beto sari doduru tie sipu vura mae si arini. Sari dia tie ta raovodi si soku hola gua na onone. 10 Va sisireni rini sari baṉara meke hegereni rini sari palabatu arilaedi. Loke bara si boka hukati si arini. Tamunu va ululu nia pepeso rini sa bara meke tiqe zaloa rini si asa. 11 Rizu rerege taloa gua na givusu si arini meke lopu ta dogoro, va tamasi rina tie hire sari dia ṉiniraṉira soti.”
Qumiqumi Pule La koe Zihova se Habakuku
12 Zihova, pa pinodalaena hokara tu si koa na Tamasa si Goi. Hopemu, via, madi, meke toa hola ninae rane si Agoi. Zihova qua Tamasa meke na qua tie kopu. Ele vizati Goi sari na tie Babiloni meke va ṉiṉirai Goi si arini pude boka va kilasa gami rini si gami. 13 Na vegua ke dodogoro Mua meke lopu va kilasi tu Goi sari na tie ṉoṉovaladi na seadi sara? Na vegua ke doṉo totoi mo Goi sari na tie sekesekeidi, na kaleadi sara? Hopemu si Goi pude doṉo la ia sa kinaleana, meke lopu doṉo la i tugo Goi saripu tavete va sea. Ke na vegua ke lopu zama si Goi sipu ṉoṉovali rini sari na tie saripu toṉoto holani rini sari kasa sara?
14 Vata evaṉae gunini Goi na igana babe na rovana menemene sari na tie, pude loke dia koimata pude totolini. 15 Riqihini vinetuṉu ri na tie Babiloni sari na tie gua na igana. Ririhi vagini vaqara rini meke kukili qetuqetu nia rini sa dia vinagi. 16 Hoke vahesi tugo rini sari dia vaqara meke hoke va vukivukihi la tugo koa rini si arini, sina hoke koa valeana na ta tokae ni rini sari dia vaqara koari na tiṉitoṉa leadi pa dia tinoa. 17 Vegua kote tavetavete lani mo rini sari dia magu varipera ninae rane, meke ṉoṉovala la i meke lopu tataruni mo rini sari na tie?

*1:5 TTA 13:41

*1:6 2 Baṉ 24:2